Read Saluan MAZMUR 25 Bible Online

MAZMUR 25 - Saluan bible

MAZMUR 25

¹Mazmur i Daud. Hi Belento, o Tumpu, na pompotokanku do'angku,

²O Tumpu-ngku, aku palesayamo hi Belento! Boli pojohok na aku opopo'ambang, ka' boli nu soso'oya'i nu anu monsampo bali' mae aku.

³Anu madi' montapali Belento, na opopo'ambang panyo anu palesaya hi Belento na madi' ahi' ise-ise' na kinyonyoa.

⁴Potiju' mae pa' mosia na pongka'oho' nu Belento, o Tumpu, poto'i mae pa' apaa na anu tionyo ku bau.

⁵Pokinde'i mae ka' potinganakon mae na aku da tumuu' mombatuki pongka'oho' nu Belento, kalana Belentomo na Tumpu anu momposalamat aku, aku saja' montaha'imani Belento.

⁶Boli okolilimi na kanonongan ka' kalibosan nu Belento, o Tumpu, anu pinotoamo nu Belento salatanmo pe'e momonanyo mae.

⁷Ampuniakon mae na dosa' ka' kasala'an tempo'nyo aku daagi' olitau, inau'akon mae na aku i uno nu kalibosan ka' kanonongan nu Belento.

⁸Kalana Tumpu manonong ka' adin, Ia na mompotiju' jalan hi mian anu sinala'mo na jalan.

⁹Tumpu na mompotingaan mian anu madi' kobubuun, ka' mompokinde'imo aha mosia na pongka'oho'-Nyo.

¹⁰Mian anu mohongo-hongo hondo apaa na anu jinanji'-Nyomo ka' hi atulan-Nyo, saja' nukalibosi nu Tumpu ka' madi' nu kolilimi.

¹¹O Tumpu, ampuniakon mae na aku susumo anu jinanji'mo nu Belento, kalana dinaka'mo hondo na kasala'anku.

¹²Tumpu nompokinde'imo mian anu palesayamo jalan anu tionyo otului.

¹³Aha saja' tumuu' bilahi, makumpu nu aha na montoongimo tano' pusaka' nu aha.

¹⁴Tumpu bela' nu mian anu palesayamo, Ia mompoto'i pa' apaa na nu kahanda'i hi aha.

¹⁵Matangku saja' mokiijo' hi Tumpu, kalana Ia nomposalamatmo aku da madi' kinona nu balaa'.

¹⁶Toa mae na aku, ka' kalibosi mae na aku, kalana aku iliingmo ka'sinansalamo.

¹⁷Kasusa'an nu kinyonyoangku mompaka pintuangmo po'uhanakonmo mae na aku da madi'mo sansala.

¹⁸Toakon mae na kasansala'anku ka' kasusa'anku, ka' ampuniakon mae na dosa'ku iwi-iwi'.

¹⁹Toamo ahi' manjoo' hondo na sampobali'ku; aha mongka'ideki mae hondo aku.

²⁰Jagai mae ka' posalamatakon mae na aku, da aku madi' ma'ambang, kalana aku mihohunghi Belento.

²¹Ku amalakon da ka'ima'an ka' madi' tageo' na kinyonyoa saja' aiya i uno nu kantumuu'anku, kalana aku montaha'imani Belento.

²²O Tumpu, po'uhanakonmo mae na mian anu palesayamo hi Belento da madi'mo mongoa'i iwi-iwi' na kasansala'annyo.