Read Saluan MAZMUR 35 Bible Online

MAZMUR 35 - Saluan bible

MAZMUR 35

¹Mazmur i Daud. O Tumpu, ewa na mian anu mongewamo mae aku, pahampateakon na mian anu mompahampateakonmo mae aku.

²Alamo na kanta tiba nu Belento ka' tinjomo mae montulungi aku.

³Hangkatmo na sosuduk tiba talombo' nu Belento da bau pongewa mian anu mololoi'mo mae aku. Poto'imo mae hi belengku talu' Belento momposalamatmo aku.

⁴Sahanyo mian anu kahanda'mo mompatei mae aku opatundu'mo ka' o ambangimo. Sahanyo mian anu binasangaja'mo mongewa mae aku tolosule'mo kalana biningungmo.

⁵Sahanyo aha nu tumputmo nu malaekat nu Tumpu susumo ota' nu tilabakonmo nu mombun.

⁶Sahanyo aha nu loloi'mo nu malaekat nu Tumpu ijalan anu pikat ka' mule' malondo'.

⁷Palasuma na aha nonta'an so'o bau pohakop nu aha aku kabai nongkeke bolo' da bau pohakop aku.

⁸Sahanyo aha nu tokai mae nu kasilaka'an anu madi' osangka-sangka. Sahanyo aha ohakop nu posi so'o nu aha lantas tombahangkangmo ka' silakamo.

⁹Sahingga aku montaligalaimo kalana Tumpu, kinyonyoangku ilame'mo kalana Ia nomposalamatmo aku.

¹⁰Sahondo-hondonyo na kinyonyoangku montaloakon, “Tumpu, Belento madi' koanu timbali pompokakanakonan! Belento nompobebasmo anu madi' mahoson da madi'mo nu kuasai nu anu mahoson, Anu kasiasi ka' sansala da madi'mo sola' obee' kasansala'an.”

¹¹Sakisi-sakisi anu toto ide-idek na kinyonyoanyo nongewamo mae aku, ka' nontuukmo mae aku koonyo nu aha nombaumo hahan anu madi' kusumbu'.

¹²Palabuatanku anu ma'ima' binalosanmo nu aha nu palabuatan anu ma'idek; aku nanabu'mo i uno nu putus asa.

¹³Tempo'nyo aha nasakit aku sinusa'mo ka' madi'mo nongkaan; aku natidukumo ka' binalado'amo,

¹⁴susumo mondo'akon samian na utus kabaisamian na bela anu mompaha kanaya hondo. Aku tinolodukumo nohangi aha au'aitu aku nohangimo posi tinangku.

¹⁵Panyo tempo'nyo aku sinusa'mo, aha sinanangmo ka' sinihukmo mae mongewa mae aku. Aha ilumajang naha ejokanmo mompoponyihing ka' mompobau-bau mae aku.

¹⁶Aha sabole-bolemo ahi' saja' mongkokojoi mae aku, mian anu ilupe'mo ka' mongka'idekimo mae na aha montoa aku.

¹⁷Hipianje, o Tumpu, hipianje na Belento ola mae saja montonto'i? Posalamatakon mae na aku kalana aitu mae aha montumbuhimo mae poluputakon mae na aku da madi' nu kaan nu singa haha aitu.

¹⁸Sahingga aku montalima kasemo hi Belento itotonga' nu mian anu palesayamo hi Belento, ka' mompuji'mo sanggo nu Belento i uno nu kasingkabotan tiba aha.

¹⁹ Boli opojohok na aku opopo ambangmo nu mian anu monsampobali' mae aku padahan madi' ko sababnyo. Boli opojohok na aku okokojoi nu mian anu mongka'ideki mae aku padahan madi' ko sababnyo.

²⁰Potatae nu aha madi' ma'ima' aha nontanga'imo da mongakali hi mian anu tumuu' madi' sola' mombau anu ma'idek.

²¹Aha sola' moloboo' mae hi belengku ka' motatae koonyo nu aha, aha nontoamo palabuatanku.

²²Panyo Belento o Tumpu nontoamo; boli ola momohokot o Tumpu, boli matikojo'on hi belengku.

²³Tinjomo mae montinjohiakon palakalangku o Tumpungku ka' mule' Tumpungku, tulungiakon mae na aku!

²⁴Tinjohi mae na aku, kalana Belento adin, o Tumpungku boli opojohok mae na sampobali' mongkokojoi mae aku.

²⁵Boli opojohok na aha motatae i uno nu kinyonyoa “Talimakaseh kita nompomingkotmo nyawanyo. Apaa na anu kinahanda'anto tinongalamo hi kita!”

²⁶Sahanyo mian anu sanang na montoa kasansala'anku timbalimo bingong ka' mohumpakmo ambang. Sahanyo mian kobubuun mae hi belengku o'alu ka' opopo ambang.

²⁷O'amalakon da mian anu kahanda' montoa aku opobee' na montaligalai ka' balame-lame'. O'amalakon da aha sabole-bole saja' montaloakon, “Totu'u ahi' talasanggo na Tumpu! Ia mongkahanda'i da salamat ahi' na posaihon-Nyo!”

²⁸Sahingga ku bebakonmo na ka adinan nu Belento, ka' mompuji'mo Belento sansina-sinaa.