Read Saluan MAZMUR 37 Bible Online

MAZMUR 37 - Saluan bible

MAZMUR 37

¹Mazmur i Daud. Boli bata-bata kalana palabuatan nu mian anu ma'idek na kinyonyoanyo boli pusa hi mian anu nombaumo palabuatan anu sala'.

²Kalana aha malia' mingkot susumo hemput, ka' mangkaluale susumo sosu'anon anu molumba'.

³Palesaya hi Tumpu, ka' pombaumo palabuatan anu ma'ima' jojoongmo ilipu' aijo' ka' mingkalakuanmo ahi' tulu-tulutan.

⁴Lio na kantumuu' anu ma'ima' nu beleyum hi Tumpu, Ia na mompopuas saidi' mae apaa na anu nu kahanda'i nu kinyonyoa nu beleyum.

⁵Simpalakon hi Tumpu na kantumuu'an nu beleyum, Ia ahi' na otaha'imani, ka' Ia na montulungi beleyum.

⁶Ia na momponyata hannyo beleyum tulu-tulutan susumo jingka ka' kahodi'an nu kinyonyoa nu beleyum susumo sinaa.

⁷Tanda'imo na Tumpu nu kinyonyoa anu saban popea' nu kasabanan, Iaje ahi' na montindaki. Boli bata-bata kalana mian anu kinohasinnyomo i uno nu kantumuu'annyo kabai anu nombaumo palabuatan sola mongakali.

⁸Boli motambuha' kabai ka' mapanas na kinyonyoa, aijo' ola momboa kasilaka'an.

⁹Salana mian anu mombau palabuatan anu ma'idek saidi' mae ogalisimo, panyo mian anu montaha'imani Tumpu ia na mompusaka'i tano' aijo'.

¹⁰Mian anu ma'idek na kinyonyoanyo na sampa magalis de maluanyo olio, ia madi'mo daagi'.

¹¹ Mian anu madi' buulon na saidi' mae mompusaka'i tano' aijo', ka' monta'up kantumuu' anu ma'ima' ka' molabi-labi.

¹²Mian anu ma'idek na palabuatannyo saja' montanga'i anu ma'idek hi aha mian anu ma'ima na palabuatannyo, ka' montoa ia kinyonyoa mongka'ideki.

¹³Panyo nu kokojoi nu Tumpu na mian anu palabuatannyo ma'idek, kalana Nu sumbu' na ka ahenannyo nu mian aijo' maliamo mae toka.

¹⁴Mian anu ma'idek na kinyonyoanyo mongkeatmo bajaknyo ka' mompeletakonmo pana'nyo da opateimo na mian anu kasiasi ka' anu kantumuu'annyo sansala, da okolotmo na mian anu kantumuu'annyo ma'ima.

¹⁵Panyo mian anu ma'idek na palabuatannyo nu posi jalo'je nu bajaknyo, pelet nu aha saidi' mae opaha pato'imo.

¹⁶Balang mau ola sangkiding na daagi' hi aha mian anu ma'ima na kinyonyoanyo lebe ko angga'nyo nu lingkudui na balang anu molabi-labimo hi aha mian anu ma'idek na kinyonyoanyo.

¹⁷Kalana kuasa nu mian anu ma'idek na palabuatannyo nu pato'imo nu Tumpu, panyo anu ma'ima' na kinyonyoanyo na Nu jagai ahi'.

¹⁸Tumpu monjagai kantumuu'an nu mian anu bala iman hondo, halata' pusaka' nu aha tataap sampe toka sidu-sidutu'.

¹⁹De nu tokaimo mae nu kasusa'an aha na madi' ahi' mongoa'i sansala itempo nu kasusa'an i anu okaan aha na sukup ahi' na anu okaan.

²⁰Tetapi mian anu ma'idek na kinyonyoanyo na mohumpakmo ahi kabinasa'an, sampobali' nu Tumpu lanyapmo susumo bunga-bunga ipadang tampat anu loas aha lanyapmo i uno nu tibuk.

²¹Mian anu ma'idek na kinyonyoanyo monsabon hi mian ka' madi'mo daagi' monsule'akon panyo mian anu ma'ima' na kinyonyoanyo na mombee'i ahi' ka' sanang ahi' na kinyonyoanyo.

²²Mian anu nu balakati nu Tumpu na mompusaka'i ahi' anu' aijo' panyo mian anu Nu kutuki na olaa'mo ahi'.

²³Tumpu montaka' mian ijalan anu nu jalani, Ia mompohoson mian anu kantumuu'annyo situju hi Ia.

²⁴De maluanyo ia manabu' madi' ahi' belaon taha-tahahumo, kalana Tumpu na montoongi limanyo.

²⁵Salatanmo pe'e aku daagi' olitau sampe aku ilangkai'mo ma'isa toho' aku nontoa mian anu ma'ima' na kinyonyoanyo nu pala'i nu Tumpu, kabai lee'nyo tinimbalimo mian anu ola saja' momoita apa-apaa hi mian.

²⁶Ia ola saja monsabolakon ka' mombee'i ka' to ana-anaknyo tinimbalimo balakat hi ia.

²⁷Pala'imo na palabuatan anu ma'idek ka' baumo na anu ma'ima', sahingga sampe toka sidu-sidutu' lee' nu beleyum na monjojoongi tano' aijo'.

²⁸Kalana Tumpu na mongka'ima'i ahi' palabuatan anu ma'ima' ka' adin, mian anu tulu-tulutan hi Ia madi' ola Nu pojohok tumuu' susa'. Ia monjagai aha sampe toka sidu-sidutu', panyo lee' nu mian anu ma'idek na kinyonyoanyo na opateimo ahi'.

²⁹Mian anu bala iman hondo na mompusaka'i tano' aijo' ka' monjojoongi sampe toka sidu-sidutu'.

³⁰Mian anu ma'ima na kinyonyoanyo motatae na pande ahi' saja' ahi' hodi' na ia motatae.

³¹Atulan nu Tumpunyo tonguna' i uno nu kinyonyoanyo, ia madi' mosele mompala'i atulan aijo'.

³²Mian anu ma'ima' na kinyonyoanyo saja' nu doyoni nu mian anu ma'idek na kinyonyoanyo anu moliomo kasampatan da mompateimo ia.

³³Panyo Tumpu na madi' ahi' mompojohok ia da nu kuasai nu sampobali'nyo, kabai pa' ohukumo de maluanyo oputusimo na palakalanyo.

³⁴Tumpumo ahi' na otaha'imani ka' tulutimo nam palentah-Nyo, sahingga Nu hangkatmo na beleyum da mompusaka'imo tano' aijo'; nu toaje na mian anu ma'idek na kinyonyoanyo ogalisimo.

³⁵Aku toho'mo nontoa samian na anu ma'idek na kinyonyoanyo anu mongka'ima'i saja' buulon; ia sumomo ahi' kau' anu molumba' ka' bakatnyo naleengmo.

³⁶Tempo'nyo aku notulu ia imadi'anmo iliongku na ia panyo madi'mo ihumpaku.

³⁷Palahatikan na mian anu ma'ima' na kinyonyoanyo tiba anu hodi' na kinyonyoanyo; mian anu mongka'ima'i paladamean ko ka'ima'an nu humpak aiya mae i ahop.

³⁸Panyo mian anu baladosa' saidi' mae osilakaimo; lee' nu aha saidi mae ogalisimo.

³⁹Nu posalamat nu Tumpu na mian anu bala iman hondo; ka' Nu jagai na aha de ko kasusa'anmo.

⁴⁰Nu tulungi na aha ka' mule' Nu posalamat ka' Nu poluput na aha da madi' nu silakai nu to mia-mian anu ma'idek na kinyonyoanyo, kalana aha ninsondo'mo hi Ia.