Read Saluan MAZMUR 40 Bible Online

MAZMUR 40 - Saluan bible

MAZMUR 40

¹Anu mongkapalai panyanyi. Mazmur i Daud.

²Saban hondo na aku montanda'i bantuan mae nu Tumpu; lantas pinalahatikan-Nyomo mae na aku ka' nompotombihingmo mae anu kinakase'ku.

³Ihela'-Nyomo mae na aku da madi' nanabu' ibolo' anu mombahayaimo aijo', da madi' manabu' itampalang anu hensekon. Pinojoong-Nyomo na aku ibawo nu puge'nyo nu batu sahingga talakana' ahi' na aku kolangka-langkas.

⁴Ingajan-Nyomo na aku manyanyi nyanyian anu salaje' o'ajan, nyanyian bau pompuji' Tumpunto. Manjoo' na mian nontoa ka' nabuhukmo, lantas nompalesayamo Tumpu.

⁵Mohumpak kantumuu'an ma'ima' na mian anu palesayamo hi Tumpu, anu madi' monsombah to pilo-pilogot, kabai momoita tulung hi mian anu buulon.

⁶O Tumpu nanjoo'mo hondo na anu binau nu Belento hi kami, O Tumpu, Tumpu-ngku, Belento madi' ko anu mompokakanai! Nanjoo'mo na anu tinanga'an nu Belento nonompobangangmo kami, madi'mo opoko ala osisik iwi-iwi'.

⁷ Palasombahan tiba kolobana nu okaan madi'mo Nu ka'ima'i, koloban anu opotunu tiba koloban pohapusi dosa' madi' Nu tuntut. Panyo Belento nombee'imo aku bihing, anu timbali bau pohongo potatae nu Belento.

⁸Lantas aku notataemo, “Aiyamo na aku, i uno nu lulunan nu kitab, tinulismo na aku.

⁹Sanang na aku mombau pongka'oho' nu Belento, o Tumpu, atulan nu Belento pino una'kumo i uno nu kinyonyoangku.”

¹⁰De sihukmo na mian anu palesayamo hi Belento, ku polelemo na lele anu moko lame' aijo'mo, Belento nomposalamatmo kami. Madi'mo bele-belenti na han aijo' ku bebakon, Nu sumbu' nu Belento na aijo' iwi-iwi', o Tumpu.

¹¹Lele kasalamatan aijo' madi' ola ku una' i uno nu kinyonyoa, Belento nontulungimo ka' mule' kanonongan mae nu Belento saja' ahi' ku bebakon. De sihukmo na mian anu palesayamo hi Belento, saba' aku na madi' ahi' ola momohokot panyo ku poto'i ahi' na kalibosan tiba kanonongan mae nu Belento.

¹²O Tumpu boli mae belenti na mongkalibosi mae aku; saja' mae ahi' ojagai na aku nu kalibosan tiba kanonongan nu Belento.

¹³Aku tinikumo nu balaa' manjoo' hondo, konjoo'nyo madi'mo opoko ala olekeng. Aku iloloi'mo mae nu to dosa-dosa'ku sahingga aku madi'mo noko ala nontoa. Konjoo'nyo nu lingkuduimo na hambahan nu ubaku nonsaduakonmo aku sahingga binata-batamo.

¹⁴O Tumpu posalamatakon mae na aku, O Tumpu sampamo mae tulungi na aku!

¹⁵Sahanyo mian anu kahanda'mo mompatei mae aku opatundu'mo ka' mopalaimo kalana bingongmo. Sahanyo mian anu mongkokojoi mae aku, kalana kasoe'anku, ololoi'mo ka' o'alumo.

¹⁶Sahanyo mian anu mongkokojoi mae aku tolokengkengmo ka' ma'ambangmo.

¹⁷O'amalakon da iwi-iwi' na mian anu monsombah Belento bilahimo ka' lame'mo ka' iwi-iwi' na anu mongka'ima'i kasalamatan lengkat mae hi Belento tataap motatae, “Memang ahi' talasanggo na Tumpu!”

¹⁸Aku aiya kasiasi ka' madi' mahoson panyo Tumpu mompalahatikan mae aku. Belentomo na anu montulungi mae ka' mule' momposalamat mae aku, boli mae pin, o Tumpungku!