Read Saluan MAZMUR 41 Bible Online

MAZMUR 41 - Saluan bible

MAZMUR 41

¹Anu mongkapalai panyanyi. Mazmur i Daud.

²Mohumpak kantumuu'an ma'ima' na mian anu mompalahatikan mian anu madi'mo mahoson; Tumpu na montulungi ia de nu tokaimo nu kasusa'an.

³Tumpu na monjaga ia ka' mompotuu' ia, Ia na mombee'i kantumuu'an ma'ima i dunia aiya, ka' madi' mombee' ia hi lima nu mian anu monsampobali' ia.

⁴Tumpu na montulungi de nu tokaimo nu sakit, ka' mompo ule' butongnyo mahoson.

⁵Aku notatae, “Aku binaladosa'mo hi Belento o Tumpu, kalibosiakon mae na aku ka' opa alinakon mae na aku.”

⁶Sampobali'ku nontaloakonmo potatae anu ma'idek mongkona hanku aiya, pongka'oho' nu aha da aku silakamo ka' okolilimimo.

⁷To mia-mian anu toka mae montoa aku, madi' hodi'na kinyonyoa nu aha. Aha sola' mongala lele anu ma'idek apaa na anu jinadimo aiya i butongku, lantas sola'mo nu leangakon nu aha iyaya mae.

⁸Iwi-iwi' na mian anu mongka'ideki mae aku sola'mo mo oyong; aha sola'mo molelek apaa na anu ma'idek hondo aiya hi belengku.

⁹Aha notatae, “Panyakitnyo tinadokmo hondo, ia madi'mo bisa po ule' mobula.”

¹⁰ Pakalaus mule' sangalu anu mompahasumbu' hondo ka' ku palesaya hondo, mian anu nongkaanmo tiba aku nompopo ambangmo mae aku.

¹¹Kalibosi mae na aku o Tumpu, po alinakon mae na aku, da timbali ku balosakon na palabuatan ma'i-ma'idek nu aha sampobali'ku.

¹²De maluanyo aku madi' nu pokala nu sampobali'ku, atina'je ka' kusumbu' taalu' Belento sanang ahi' mae hi belengku.

¹³Belento nontulungimo mae aku kalana aku madi' tageo' na kinyonyoa, ka' nompobee'mo aku tumuu' hingga-hinggat tiba Beleyum sampe toka sidu-sidutu'.

¹⁴ Opuji' na Tumpu, Tumpu Israel! Opuji' na Ia uuka aiya ka' sampe toka sidu-sidutu'! Jadimo mae sumo aijo. Amin!