Read Saluan MAZMUR 45 Bible Online

MAZMUR 45 - Saluan bible

MAZMUR 45

¹Mazmur nu aha sa'anakan i Korah. Nyanyian mongkalibosi. Anu mongkapali panyanyi. Ingala ilagu nu nyanyian; Bunga bakung.

²Potatae anu toto ima-ima' nosabatmo mae lengkat ikinyonyoangku kusombahkonmo na laguku aiya hi tomundo'. Sumomo ahi' pena bau-bau pontulis nu samian na anu pande mongkalang nyanyian, jila'ku sinadiamo montaeakon sya'ir.

³Belento na anu talalo ahi' handa nu hungku'i na manusia, potatae nu Belento saja' kaho ka'ima'an, mokonyo aijo' Belento nu balakati nu Tumpu, sampe toka sidu-sidutu.

⁴Potakos na bajak nu beleyum ilampeokan o tomundo' anu baani hondo, belento talalo ahi' talasanggo ka' ma'ima' na otoa!

⁵Lambanimo ka' babaani da ohumpak na kamajuan montinjohakon kahondoan tiba ka adinan anu pantas salaku manusia; tiba kahosonan nu belento atina' po agomo da untung na mahampate!

⁶Pana' nu beleyum mata-matajom molampasmo sule nu mian anu mongewa mae beleyum, to bansa-bansa singkapmo motua' i ahop nu tengke nu beleyum.

⁷Tumpu mombee'imo kuasa beleyum da mompalentahmo kakuasa'an nu beleyum pin hondo sampe toka sidu-sidutu'; beleyum adinmo na mompalentah layat nu beleyum.

⁸Beleyum mongka'ima'i anu totu'u ka' mongka'ideki anu ma'idek; mokonyo aijo', Tumpu, Tumpu nu beleyum nompile'imo beleyum, ka' nompo ima'mo kantumuu'an nu beleyum ka' nolingkuduimo to tomu-tomundo' sangga'at.

⁹Baju' nu beleyum nanohongmo mur, gaharu, tiba cendana; pahaik musik ilaigan nu tomundo' anu ihiasan nu gading nompolame'mo beleyum.

¹⁰Misa' ola dayang-dayang na kiijo' ilaigan nu tomundo. Panyo daagi' mule' ahi' ko to lalangkoyang nu tomundo'. Ikoanan nu kadela nu tomundo' tinjo-tinjo na bengkele' nu tomundo'. Nipakemo nu palahiasan mosoni' anu madi' kogalo'nyo.

¹¹O to Lalangkoyang nu tomundo' potombihing mae na potataengku kolilimimo na bansa tiba to sanga-sangalu nu beleyum.

¹²Handanyo nu beleyum nomposanangmo kinyonyoa i tomundo', ia tuan nu beleyum, hongo-hongo na ia.

¹³Mian anu jojoong i Tirus momboamo mae palasombahan hi beleyum; mian anu kaya bala usahamo mae mongala kinyonyoa nu beleyum.

¹⁴Langkoyang i tomundo' ninsoopmo ka' na'ima'mo hondo na otoa baju'nyo sinujian nu mosoni'.

¹⁵Ia nibaju'mo nu baju' anu mongangahan na buhitnyo, lantas ia binoamo hi tomundo' sinosapi'an nu to sanga-sangalunyo te to lalangkoyang anu daagi' ise'. Aha suele pinosadiakonmo hi tomundo'.

¹⁶Aha montaligalaimo ka' lame'mo salatan binoamo ninsoop ilaigan nu tomundo'!

¹⁷Belento, tomundo'ku, saidi' mae mohumpakmo anak manjoo' hondo to momo'ane da montoongi ahi' kalaja'an nu mompolee' nu beleyum. Anu nu pojadimo nu belento mongkuasai songko-songko na dunia.

¹⁸Tiba nyanyian aiya ku bebakonmo na sanggo nu belento sampe molundu-lundu na tulunan to bansa-bansa mompuji'mo belento sampe toka sidu-sidutu'.