Read Saluan MAZMUR 49 Bible Online

MAZMUR 49 - Saluan bible

MAZMUR 49

¹Mazmur nu aha sa'anakan i Korah. Anu mongkapali panyanyi.

²Potombihing mae, o iwi-iwi na bansa, pota'an mae na bihing, o mian anu jojoong i dunia,

³maumo mian anu madi' talasanggo, kabai mian anu talasanggo, maumo mian anu kasiasi, kabai mian anu kaya.

⁴Ku taeakonmo na potatae nu pikilan anu pande, pikilanku maleeng hondo.

⁵Ku palahatikanmo na anu kokoonyo nu ibalat nu mian, ka' ku talangkanmo na alati'nyo ka' ku kuti'akon kasapi'.

⁶Aku madi' mabuhuk de nu tokaimo mae nu kasusa'an, kabai de aku nu tumbuhimo mae nu sampobali' anu ma'idek.

⁷Aha aijo' talalo ahi' montakabunakon kakaya'an nu aha ka' mombuulakon halata' nu aha.

⁸Memang totu-totu'u ahi' madi' ko samian na anu moko ala momposalamat utusnyo, kabai mombayan salaku pontobus hi Tumpu.

⁹Maumo apaa na nu bee' madi' moko ala monsukupi; talalo ahi' mahan na olinyo bau pontobus nyawanyo,

¹⁰da ia madi' silaka ka' daagi' timbali tumuu' sampe toka sidu-sidutu'.

¹¹Madi', memang ia montoaje saidi' mae saba' maumo ahi' mian anu pande suele ahi' mate. Mian anu talalo ahi' waweng ka' ponga' bubu' silaka, ka' mompala'imo halata'nyo baumo bagi nu mian sangga'at.

¹²Aha jojoongmo i uno nu kubulan sampe toka sidu-sidutu'; aijo'mo na kajojoongan nu aha sidu-sidutu', maumo ahi' naipuan mae aha ko tano' manjoo'.

¹³Manusia madi' moko ala tumuu' sidu-sidutu'i uno nu kakaya'annyo; susumo binatang ia suele ahi' saidi' mae silaka.

¹⁴Sumo aijo'mo na uki' nu mian anu montakabunakon butongnyo, ka kantumuu'an nu mian aiya mae i ahop anu ola saja' mongka'ima'i potataenyo.

¹⁵Susumo domba, aha tinantukanmo da silaka; kasilaka'an na timbalimo polaya' nu aha. Daagi' subu aha nu pokalamo nu mian anu hodi' nakinyonyoanyo; butong nu aha sampamo mahutak idunia nu mian anu sinilakamo, majo'onmo ikajojoongan nu mian anu kaya.

¹⁶Panyo Tumpu na mompobebasmo ahi' aku, Ia mompobebasmo aku da madi' nu kuasai nu kapatean.

¹⁷Boli mabuhuk de maluanyo samian timbalimo kaya, ka' halata'nyo mompaka panjoo'mo.

¹⁸Kalana de silakamo ia madi'mo daagi' momboa apa-apaa, halata'nyo madi' oboa i uno nu kubun hingga-hinggat tiba ia.

¹⁹Ka' mule' de samian mohumpakmo dale' i uno nu kantumuu'annyo, ka' sola'mo opuji'-puji' kalana kinohasinnyomo na usahanyo,

²⁰ia suele ahi' montuntuni mompolee'nyo, mamba itampat anu pikat sampe toka sidu-sidutu'.

²¹Manusia madi' saja'mo tumuu' i uno nu kakaya'an, susumo binatang, ia suele ahi' silaka saidi' mae.