Read Saluan MAZMUR 5 Bible Online

MAZMUR 5 - Saluan bible

MAZMUR 5

¹Anu mongkapalai panyanyi, o tiopakon puloit. Mazmur i Daud.

²O Tumpu, potombihingakon mae na potataengku, toakon mae na kasusa'anku.

³De timbali talimakon na anu ku kakase aiya ka' tulungiakon mae na aku, O Tomundo'ku ka' Tumpu-ngku.

⁴Kalana hi Belento na pompotokanku do'a aiya, o Tumpu, potombihingakon mae na anu ku kakase aiya salatan subu-subumo. Daagi' subu ku boamo na anu ku sombahkon ka' ku tanda'imo na pontaami mae nu Belento, o Tumpu.

⁵Belento Tumpu anu madi' mongka'ima'i hahan kalakuan anu ma'idek; mian anu ma'idek na kinyonyoanyo madi' timbali singkabot tiba Belento.

⁶Belento madi' sanang na montoa mian anu mingkinyonyoa matangkas, oka'ideki nu Belento na mian mombau anu ma'idek.

⁷Nupatei nu Belento na to mia-mian anu mongka'ima'i lewa' baleko' anu saja' mongakali ka' anu saja' mompatei otoa nu Belento madi' ko angga'nyo.

⁸Panyo kalana talalo hondo Belento mongkalibosi, aku timbali minsoop i uno nu Laigan nu Belento. Aku tolodadupu monsombah mongahopi Laigan nu Belento anu susi', ka' ku sombah na Belento kalana talalo ku angga'i.

⁹O Tumpu, manjoo' hondo na anu mongewa mae aku! Potiju' mae na aku mombau apaa na anu nu kahanda'i, ka' potiju' mae na jalan nu Belento anu tionyo ahi' ku jalani.

¹⁰ Kalana potatae nu anu mongewa mae aku madi' ko anu opalesaya; kinyonyoa nu aha nobuke'mo nu tanga'an anu ma'idek. Potatae nu aha matami' hondo mompai godamo panyo kinyonyoa nu aha kahomo anu mabusik.

¹¹Hukumo na aha o Tumpu, pobakas da aha silakamo kalana posi tanga'an nu aha na monsaduakon. O laa' na aha kalana nanjoo'mo na dosa' nu aha, kalana aha notomuhukmo hi Belento.

¹²O'amalakon da iwi-iwi' na mian anu mihohung hi Belento mohumpak kabilahian ka' lewa' montaligalai sampe toka sidu-sidutu'. Jagaiakon na to mia-mian anu mongka'ima'i Belento da aha saja' mongoa'i kalame'an kalana Belento.

¹³Kalana Nu balakati na mian anu mohongo-hongo Belento, Nu jagai na aha nu kalibosan nu Belento.