Read Saluan MAZMUR 50 Bible Online

MAZMUR 50 - Saluan bible

MAZMUR 50

¹Mazmur i Asaf. O Tumpu, Tumpu Anu Balakuasa hondo, notataemo; Ia nompoto'imo hi songko-songko na dunia lengkat pe'e mae ikabete'an sampe tinoka toka i sasu kinsoban.

²Lengkat mae i Sion kota' anu ma'ima' hondo Tumpu tinokamo mae ka' binalasahayamo.

³Tumpunto tinokamo mae ka' madi' ahi' ola momohokot, ma'isa pe'e Ia mamba mae, apumo na tongkoi moona mae toka lewa' moak ka' nu tikubi nu antong anu talalo ahi' daka'.

⁴Ilaganyomo na langit tiba tano' da nu sakisi nu aha na Ia momputusi palakala nu mian anu palesayamo hi Ia.

⁵Ia notatae, “Posihukakon iwi-iwi' na mian anu palesayamo hi Beleng-Ku, anu nombaumo palajanjian tiba Aku ka' pinohosonmo nu koloban anu kinolotmo.”

⁶Langit nompoitamo da Tumpu na momputusi palakala nu mian anu palesayamo hi Ia ka' da Iamo ahi' na timbali mian kopiannyo.

⁷“Potombihingakon mae, o mian anu palesayamo hi Beleng-Ku, Aku mongka'oho'mo motatae, O Israel, Aku mongka'oho'mo timbali sakisi mongkona belemiu; Aku aiya Tumpu, Tumpu nu belemiu.

⁸Misa' kalana koloban nu belemiu sahingga Ku tudu'mo na belemiu; koloban anu opotunu nu belemiu na saja' ahi' daagi' aiya i ahop-Ku.

⁹Aku madi' mompalalui sapi' anu o'ala mae i uno nu pangkun nu belemiu, kabai mee' anu o'ala mae atina' ipahasan nu potuu'on nu belemiu;

¹⁰kalana iwi-iwi na binatang anu i uno nu alas Aku na tumpu-Nyo ka' potuu'on imada-madalan nu bungkutnyo.

¹¹Iwi-iwi' na tomonsi' kiijo' mae i bungkutnyo suele ahi' Aku na tumpu-Nyo, tiba iwi-iwi na anu konyawanyo ipadang tampat anu ewa.

¹²De maluanyo Aku mo ohop, madi' pilenje ku poto'i hi belemiu kalana apaa na anu i unonyo nu dunia Aku mule' ahi' na tumpu-Nyo.

¹³Aku madi' mongkaan antok nu sapi' lakinyo, madi' mule' ahi' monginum baso' nu mee' lakinyo.

¹⁴Palasombahkon na koloban bau pontalima kaseh hi Tumpu, tionyo ahi' nu ganapi' na anu jinanji'mo nu belemiu Anu Matangkas na Kuasa-Nyo.

¹⁵Pongkakase mae hi Beleng-Ku de nu tokaimo nu kasusa'an, Aku mompobebasmo belemiu, ka' opuji'mo nu belemiu na Aku.”

¹⁶Panyo kona hi mian anu ma'idek na kinyonyoanyo pinoto'imo nu Tumpu, “Beleyum madi' ko hak montaeakon atulan-Ku, ka' basisik mongkona palajanjian-Ku.

¹⁷Kalana beleyum madi' mongka'oho' montalima pokinde'-Ku, ka' monggagakon iwi-iwi' na palentah-ngKu.

¹⁸De beleyum montoamo samian anu biasa mombuling, beleyum montihomo ia, ka' beleyum mogandi-gandimo tiba to mia-mian anu saja' masala'.

¹⁹Beleyum saja' montaeakon potatae anu ma'idek, ka' saja' ka oho' mongakali.

²⁰Beleyum monsisik anu madi' totu'u utus nu beleyum, ka' sola' mompobau-bau utus nu beleyum anu omput nu puso nu beleyum.

²¹Aijo'mo na anu sola' nu bau, panyo ola Ku hokotakon, jadi nu tutugi nu beleyum Aku sumo beleyum. Panyo uuka aiya Ku pisala'imo na beleyum, ka' iwi-iwi' aijo' Ku pojadimo da nyata' hi beleyum.

²²Soba palahatikan, belemiu anu mongkolilimi Tumpu; bala ingati mae dumo belemiu Ku silakai, ka' madi' ko anu momposalamat.

²³Mian anu monsombahkon bau pontalima kaseh salaku bau kolobannyo, ia aijo' na moholomati Aku; ka' mian anu momposadiai jalan da kajalanan-Ku Ku potiju'je hi ia na kasalamatan anu lengkat aiya hi beleng-Ku.”