Read Saluan MAZMUR 55 Bible Online

MAZMUR 55 - Saluan bible

MAZMUR 55

¹Anu mongkapalai panyanyi. Okuti'akon kasapi. Nyanyian pangajalan i Daud.

²O Tumpu, potombihingakon mae na do'angku, boli ola mosiloi de mohongomo anu ku kakase.

³Palahatikanakon mae na aku ka' taami mae na aku, aku silakamo nu kasusa'anku.

⁴Kinyonyoangku nangada'mo kalana anu monsampobali' mae aku notomuhukmo mae ka' mian anu ma'idek na kinyonyoanyo nonsansalamo mae. Kalana aha momposusa'mo mae kantumuu'anku, ka' pinusamo hondo na monsampobali' mae aku.

⁵Kinyonyoangku talalomo hondo mangada', mongkabuhuk silaka aijo'mo na saja' ku tutugi.

⁶Aku sinaingkukubanmo nu kinyonyoa anu binata-batamo ka' nabuhukmo, nansihimo na bulungku bau nu buhuk.

⁷Ah, de aku ko polipiknyo susumo malapatii' aku lumahapmo molio tampat anu madi' ko anu mompoposia.

⁸Memang, aku lumapmo majo-majo'on hondo, ka' jojoongmo i tampat anu mateges.

⁹Aku sampamo molio tampat pihohungan da madi' nukona nu tombosisi' ka' antong anu daka' hondo.

¹⁰O Tumpu, pobingongakonmo na aha iwi-iwi' anu monsapobali' mae aku, bolimo daagi' mompahakona na aha basale', kalana i uno nu kota' tinoangkumo na kabaanian nu aha ka' anu saja' mahantuda'.

¹¹Sinaa ka' pihi aha lewa'mo mamba momoya mombau anu ma'idek ka' monsaduakonmo mian sahingga madi'mo kaposa'angu'an.

¹²Iyaya mae daagi' ko anu sinilakanmo; anu nonsansalamo mian ka' anu nongakalimo mian, saja' mo jinadi i pasan tampat anu lewa' pompobalukan apa-apaa.

¹³De maluannyo anu monsampobali' mae aku na mongalu mae aku, daagi' timbali ku intimakon. De maluannyo anu mongewa mae aku na mompobau-bau mae aku, daagi' timbali aku naninsuluk da madi' ia montoa mae.

¹⁴Panyo taalu' beleyum ahi', sangalungku, sampobela'ku, sangalungku anu mompaha kanaya hondo na nombaumo mae anu ma'idek hi belengku.

¹⁵U'utu mae kita mompaha kanaya paing kali-kalibosian, ka' timbali monsombah Tumpu hingga-hinggat i Laigan nu Tumpu.

¹⁶Bakas da anu monsampobali' mae aku monti-montik silakamo ka' daagi' tutuu' mintatau'mo i dunia nu mian anu sinilakamo, kalana kalakuan anu ma'idek kiijo' i laigan nu aha, kiijo' i kinyonyoa nu aha.

¹⁷Panyo aku mongkakasemo hi Tumpu, Tumpuje na momposalamat aku.

¹⁸Sinaa ka' pihi aku lewa'mo bapisala' ka' lewa'mo humang, ka' pinotombihing-Nyomo mae na potataengku.

¹⁹Ia nomposalamatmo mae aku da madi' pinatean nu sampobali' anu nontumbuhimo mae aku, anu nambamo mae mongewa aku.

²⁰Tumpu anu nompalentahmo salatanmo pe'e dunia, Ia na mompotombihing mae aku ka' mompatundu'mo aha. Kalana aha madi' mongka'oho' balatobat, ka' madi' mabuhuk hi Tumpu.

²¹Anu u'utu mae toho'binau sangalungku nolambanimo mae to sanga-sangalunyo, ia madi'mo nontoongi anu jinanji'nyomo.

²²Potataenyo ma'ima'hondo na ia mombisalai, panyo i uno nu kinyonyoanyo mongka'ideki. Ia basisik madi' ko pesa-pesa, panyo monsusuk, sumomo bajak na ko tajomnyo.

²³De bata-batamo na beleyum kalana mabuhukmo asanakonmo hi Tumpu, sahingga Iaje na montulungi beleyum; kalana mian anu hodi' na kinyonyoanyo, madi' ola nu pojohok nu Tumpu na ia opatundu.

²⁴Panyo Belento, o, Tumpu, montuamo aha i uno nu bolo' anu talalo hondo maleeng. To mia-mian anu pangakali ka' anu lewa' mombubusakon baso' madi' nutokai nu aha na umun nu aha maumo ola sambahagian. Panyo aku palesayamo ahi' hi Belento.