Read Saluan MAZMUR 56 Bible Online

MAZMUR 56 - Saluan bible

MAZMUR 56

¹ Anu mongkapalai panyanyi. Ingala i lagu nu nyanyian: Malapatii' anu i momo'mo, lengkat mae i da'erah anu majo'on. Mazmur i Daud tempo'nyo mian nu Filistin nohakopmo ia kiijo' mae i Gat.

²Kalibosiakon mae na aku, o, Tumpu kalana aku tinumbuhanmo mae, saja'mo aku sinansala nu to mia-mian anu monsampobali' mae aku.

³Sansina-sinaa na aku opahampeja'akon nu mian anu nongewamo mae aku; manjoo' hondo na mian anu nonsampobali'mo mae aku, o Tumpu Anu Matangkas na Kuasa-Nyo.

⁴Salatan aku nabuhukmo, aku nontaha'imanimo Belento.

⁵Aku nompuji'mo Tumpu kalana nonginau'mo apaa na anu jinanji'Nyomo; aku palesayamo hi Ia, sahingga aku madi'mo nabuhuk, manusia madi' moko ala mombau apa-apaa hi belengku.

⁶Sansina-sinaa na mian anu monsampobali' mae aku mongusahakon da madi'mo mingkona na pikilanku mompotutugakon apa-apaa, saja'mo aha bala'usaha monsilakai mae aku.

⁷Aha babola-bolak i tampat paninsulukan, mompotomatakon mae iwi-iwi' apaa na anu ku bau, ka' molio jalan pa' mosia na mompatei aku.

⁸Pa' daagi' mule' ko kasalamatan na aha anu lewa'mo mombau anu ma'idek? Tambuha'imo na aha ka' silakai-Mo, o!

⁹Belento nombilangmo iwi-iwi' na sinaa anu pinakengkumo lewa' namba noyaya, ka' nonsumbu'mo konjoo'nyo nu lolu'ku; pa' madi'o nu posoop i uno nu lekengan nu Belento na kasansala'anku aiya?

¹⁰I sinaa aku nongkakasemo nomoita tulung hi Belento, mian anu monsampobali' mae mopalaimo, kalana ku sumbu' Tumpu nontinjohimo mae aku.

¹¹Aku mompuji'mo Tumpu, kalana apaa na anu jinanji'Nyomo.

¹²Aku palesayamo hi Ia, sahingga aku madi'mo mabuhuk, manusia madi' moko ala mombau apa-apaa hi belengku.

¹³Aku mombaumo apaa na anu jinanji'kumo hi Belento o, Tumpu ka' monsombahkonmo koloban bau pontalima kaseh hi Belento.

¹⁴Kalana Belento nonjagaimo aku da madi' sinilaka, jinaganmo nu Belento na aku da madi' tinombahangkang. Sahingga aku tinumuu'mo kalana Tumpu na nonjagai mae, i uno nu jingka anu nonjingkaimo iwi-iwi' na anu tutuu'.