Read Saluan MAZMUR 59 Bible Online

MAZMUR 59 - Saluan bible

MAZMUR 59

¹ Anu mongkapalai panyanyi. Ingala i lagu nu nyanyian: Boli mompatei. Mazmur i Daud; tempo'nyo i Saul nompokaumo mian namba nondoyoni laigannyo da opateimo na ia.

²O, Tumpu-ngku, posalamatakon mae na aku da madi' nupatei nu to mia-mian anu monsampobali' mae aku, jagaiakon mae na aku da madi' nusilakai mae nu to mia-mian anu montumbuhimo mae aku.

³Polapasakon mae na aku da madi' nusilakai mae nu to mia-mian anu ma'idek na kinyonyoanyo, potumuu'akon mae na aku da madi' nusilakai nu to mia-mian anu lewa' mompatei.

⁴Soba toa, na aha nolambanimo mae kahanda'mo mae monsilakai aku, to mia-mian anu toto buhingison nosa'angu'mo mongewamo mae aku; padahan misa' kalana aku nombaumo dosa' kabai nombaumo anu madi' o akui mae, o Tumpu.

⁵Misa' mule' kalana kasala'anku aha kinosia-sia'mo mae ka' mogogou mae.

⁶Tinjomo mae, o, Tumpu Anu Matangkas na Kuasa-Nyo, tulungimo mae na aku. O, Tumpu Israel, sakisiakonmo mae. Pobungkutmo mae, ka' hukumo na to bansa-bansa, bolimo mongkalibosi mian anu ma'idek na kinyonyoanyo anu saja' mombau ka'idekan.

⁷De malomo aha minsusule'mo, mohu'akonmo mae susumo dedeng ka' montikubimo mae kota.

⁸Aha me saja' mompobau-bau ka'mongalu mae potatae nu aha matajom hondo sumomo ahi' bajak, nusangka nu aha madi' ko anu mohongo.

⁹Panyo Belento mongkokojoi aha, o, Tumpu, iwi-iwi' na bansa haha aijo' nu alu nu Belento.

¹⁰Belentomo na timbali bau kahosonanku, olamo Belento na anu ku taha'imani, Belentomo na tampat popalaianku o, Tumpu.

¹¹Kalana Tumpungku manonong Ia tinokamo mae hi belengku, pinobakasnyomo na aku montoa anu monsampobali' mae aku Nupatundu'mo.

¹²Boli osilakai na aha o, Tumpu, da bansangku boli mongkolilimi, ola ahi' aha bolimo oposa'angu' ka' opatundu'mo na aha nu kuasa nu Belento, o, Tumpu anu non jagaimo mae kami.

¹³Kalana aha binaladosa'mo nu potatae nu aha; bakasmo da aha nukonamo nu katabuulan nu aha, kalana aha mongka'ima'i lewa' montotobi'akon ka' mombaleko'i.

¹⁴Silakaimo na aha kalana nonsaduakonmo da Belento notambuha'mo, o, Tumpu, silakaimo na aha iwi-iwi' bolimo ko anu mompotumuu'. Sahingga batu-batu mian monsumbu'je taalu' Tumpu na mompalentah nu Israel, ka' Ia mompalentah songko-songko na dunia.

¹⁵De malomo aha minsusule'mo mae mohu'akonmo mae susumo dedeng ka' montikubimo mae kota'.

¹⁶Aha mamba momoya molio anu okaan, ka' mintaumo de madi'mo mobosu.

¹⁷Panyo aku monyanyiakonmo kahosonan nu Belento; de subu-subumo aku manyanyimo hoso-hoson, monginau kalibosan ka' kanonongan nu Belento. Kalana Belentomo na tampat popalaianku, tampat pihohunganku de susa'mo.

¹⁸O, Tumpu, kahosonanku, ku nyanyimo na nyanyian bau pompuji'-puji' Belento, kalana Belentomo na tampat pihohunganku, o, Tumpu anu ku kalibosi.