Read Saluan MAZMUR 7 Bible Online

MAZMUR 7 - Saluan bible

MAZMUR 7

¹Nyanyian i Daud humang hi Tumpu, kalana i Kus mian nu Benyamin ai-aijo'.

²O Tumpu-ngku, aku mihohung hi Belento; posalamat mae ka' polapas mae na aku hi iwi-iwi' na mian anu mololoi' mae aku.

³Boli opojohok mae na aha sumo singa monsa'umo mae ka' mohela'mo aku ka' madi'mo ko anu montulungi mae aku.

⁴O Tumpu-ngku, de aku nombaumo anu tageo' na palabuatan, nombaumo anu ma'idek hi sangalungku, kabai nompolugi'mo anu mongewa mae, padahan madi' kosababnyo, de bisuannyo aku nombaumo sumo aijo',

⁶pojohokmo da aku ololoi' ka' nu hakop nu anu monsampobali' mae, lantas nu pateimo ka' nu pojohokmo aijo' i tano'.

⁷Tinjomo ka' potambuha'mo mae na Belento, o Tumpu, ka' ewamo na to mia-mian anu mongewamo mae aku. Tinjomo ka' tulungimo mae na aku, kalana Belento montuntut ka'adilan.

⁸Posihukmo na to bansa-bansa montikubi Belento ka' kuasaimo na aha lengkat mae atina' i kasuhangan nu Belento i suluga'.

⁹Belentomo na momputusi manusia; bee'i mae na aku ka'adilan, o Tumpu kalana aku madi' ko kasala'an.

¹⁰ Bolimo opobee' na kalakuan nu mian anu ma'idek aijo'mo mian anu palagaga ka' pododoakon na kinyonyoa nu mian anu ma'ima' na kinyonyoanyo kalana Belento Tumpu anu adin, anu moko ala mongkiop hondo kinyonyoa nu mian ka' pikilan nu manusia.

¹¹Anu monjagai aku aijo'mo Tumpu anu momposalamat mian de hodi' na kinyonyoanyo.

¹²Tumpu aijo'mo na mian kopian anu adin hondo, anu saja' mohukum mian anu ma'idek na kinyonyoanyo.

¹³De maluanyo kalakuan nu aha madi' mongabali' saba' Ia nompotoukamo toongon anu bau pompatei. Ia nomboitmo bajak-Nyo ka' kahanda'mo ahi' mompeletakon pana'-Nyo lantas nompeletakonmo hihis-Nyo iwi-iwi' anu ko apunyo.

¹⁵Soba toa, na mian anu ma'idek na kinyonyoanyo, montanga'imo mombau anu ma'idek; ia nontanga'imo mombau anu ma'idek ka' mongakalimo anu nu mian.

¹⁶Ia nongkekemo bolo' da manabu' na mian sangga'at, panyo posi iamo ahi' na nanabu' i unonyo.

¹⁷Jadi posi kalakuannyomo ma'i-ma'idek aijo' na nohukum ia ka' ia sinakisamo nu posi kasinggiannyo.

¹⁸Aku montalima kaseh hondo hi Tumpu kalana Ia talalo adin hondo, pinuji'kumo nu nyanyian na Tumpu Anu Matangkas hondo kakuasa'an-Nyo.