Read Saluan MAZMUR 75 Bible Online

MAZMUR 75 - Saluan bible

MAZMUR 75

¹Anu mongkapalai panyanyi. Ingala i lagu nu nyanyian: Boli mompatei. Mazmur i Asaf. Nyanyian.

²Kami monsombah Belento, o Tumpu, kami montalima kase, hi Belento ka' mombebakonmo kalaja nu Belento anu talalo hondo okabangangi.

³Tumpu notataemo, “Toka i tempo'nyo anu tinantukan-Kumo, Aku momputusimo ulusan anu adin hondo.

⁴Bisuannyo tano' tiba iwi-iwi' na anu jojoong i unonyo gayu'anmo Aku na mompo'ule' mompohoson ohi'nyo iwi-iwi'.”

⁵Kona hi mian anu lewa' buulon, Ku taloakonje da bolimo daagi' lewa' buulon.

⁶Ka' hi mian anu ma'idek na kinyonyoanyo, da bolimo daagi' lewa' ko tige-tige boli mosi puji' butong kabai motatae takabun.

⁷Kalana anu momputusi ulusan misa' molengkat mae i sasu kabete'an kabai i sasu kinsoban misa' mule' molengkat mae i sasu utara kabai i sasu selatan.

⁸Panyo posi Tumpu ahi' na momputusi ulusan, Ia na mompototu'u samian ka' mompisala'i sangga'at.

⁹Tumpu motambuha' sumomo mangko' aijo' i lima-Nyo, mangko' aijo' ko isinyo anggur anu molangui hondo. Tumpu mombubusakonmo isinyo, iwi-iwi' na mian anu ma'idek na kinyonyoanyo i dunia aiya tionyo ahi' monginum sampe mingkot.

¹⁰Panyo aku sabole-boleh saja' mombebakon Tumpu i Yakub, monyanyi, nyanyian anu bau pompuji' Ia.

¹¹Ia molepo'imo kahosonan nu mian anu ma'idek na kinyonyoanyo, panyo mian anu manonong na ko pintu-pintuangnyomo ahi' na kahosonannyo.