Read Saluan MAZMUR 78 Bible Online

MAZMUR 78 - Saluan bible

MAZMUR 78

¹Nyanyian pangajalan i Asaf. Potombihing mae na pangajalanku, o, to bansa-bansangku, palahatikan mae na potataengku.

² Aku montaeakonmo sa'angu' na ibalat ka' kantuang, ka' mompoto'imo alati'nyo nu tangki-tangki'on tempo'nyo naipuan mae,

³hahan anu i hongomo mami ka' tinalimamo mami, anu sinisikakon nu mompolee' mami.

⁴Kami madi' mompohowini hi to ana-anak mami; kami kahanda' mombebakon hi lee' mami anu aiya mae i ahop mongkona kuasa nu Tumpu ka' kalajanyo anu toto daka-daka', ka' mule' apa-apaa na palabuatannyo anu okabangangi.

⁵Hi bansa Israel binee'annyomo atulan-Nyo, ka' hi lee' i Yakub binee'an-Nyomo palentah. Ia nompokaumo mompolee'to da mompogulu'akon hi to ana-anak nu aha,

⁶da lee' mami anu aiya mae i ahop, suele monsumbu', lantas sabole-boleh monsisikakon hi to ana-anak nu aha.

⁷Tiba jalan anu sumo aijo' aha singkonaje mule' ahi' ola samata-mata taha'iman hi Tumpu, ka' madi' nukolilimi nu aha na palabuatan-Nyo, panyo saja' ahi' tulu-tulutan hi palentah-Nyo,

⁸da aha madi'mo susumo mompolee' nu aha anu mongka'ima'i saja' motomuhuk ka' mingkalakuan palagenta; tulunan anu madi' totu-totu'u palesaya ka' madi' tulu-tulutan hi Tumpu.

⁹Tulunan mae nu bansa i Efraim anu ko toongon pana' ka' hihisnyo bau pahampate mopalaimo tempo'nyo nahampatemo.

¹⁰Aha nolanggaimo palajanjian nu Tumpu hi aha, ka' madi' mongka'oho' tulu-tulutan hi atulannyo.

¹¹Aha mongkolilimimo anu lewa'mo binaunyo, ka' hahan anu okabangangi pipinotoa-Nyomo hi aha.

¹² I ahop nu mompolee' nu aha, Tumpu nombaumo anu okabangangi i lipu' nu Mesir, i i hatanyo nu Zoan.

¹³ Ia nongga'atmo ambai namba poti-potimbiha' lantas nontaapakonmo aha; uee pinotinjo-Nyomo susumo bandungan.

¹⁴ Ia nolaya'mo aha, ka' kundom na binau pinohohungi de sinaamo ka' apu na binau pinonjingkai de pihimo.

¹⁵ Ia nombiha'mo bungkutnyo nu batu i tampat padang anu mateges, ka' pino'inumanmo na aha sampe nolabi-labimo.

¹⁶Batu sumo puge'nyo na kodaka'nyo pinokaunyomo da nonsabatakon uee, Lantas no'ilimo na uee susumo kaunyo.

¹⁷Panyo aha saja' ahi' nombau dosa' hi Tumpu, tempo'nyo i tampat anu mateges aha notomuhukmo hi Anu Matangkas na Kuasa-Nyo.

¹⁸ Aha nontotonggolakonmo nonsobai Tumpu, nontuntutmo kaanon anu nuka'ima'i nu aha.

¹⁹Aha madi'mo nohongo-hongo Tumpu, ka' notataemo, “Pa' moko ala ahi' na Tumpu mombee'i kita anu okaan i tampat padang anu mateges aiya?

²⁰Memang Ia nonsapahimo bungkutnyo nu batu anu mokut hondo, sahingga uee no'ilimo mabohos hondo. Panyo Nupoko ala ahi' suele montoukai roti ka' mombee'i antok nu binatang hi mian anu palesayamo hi Ia?”

²¹Nohongo potatae aijo', Tumpu notambuha'mo ka' nolambanimo mae mian anu palesayamo hi Ia, binoakon-Nyomo apu; tambuha'nyo hi aha kino sida-sidanyomo,

²²kalana aha madi'mo pinalesaya hi Tumpu, hi kuasa-Nyo anu moko ala momposalamat aha.

²³Maumo sumo aijo', panyo pinalentah-Nyomo ahi' na langit, da montuhea'kon iwi-iwi' na sabatannyo.

²⁴ Ia nontau'akonmo gandum lengkat mae i suluga', aijo'mo manna da nukaan nu aha.

²⁵Ia nombee'imo aha anu okaan sampe nolabi-labi; aha nongkaanmo roti nu malaekat.

²⁶Ia suele nompokaumo mae mombun sasu mae kabete'an da tinobung mae, ka' mule' kalana kuasa-Nyo mombun sasu salatan tinobungmo mae.

²⁷Ia nontau'akonmo mae to tomo-tomonsi' da okaan nu to mia-mian anu palesayamo hi Ia, konjo'nyo sumomo bone' madi'mo pinoko bilang.

²⁸Tinua-Nyomo na tomonsi' haha aijo' i pinongkema'an nu aha i duhu-duhuk nu tampat kajojoongan nu aha.

²⁹Lantas kinaanmo nu aha sampe nobosu kalana binee'anmo nu Tumpu apaa na anu kinahanda'anmo nu aha.

³⁰Panyo napisu nu aha ma'isa kinokapa'osannyo; jadi daagi' hau-haunyo aha mongkaan,

³¹Tumpu notambuha'mo ka' nompahampateakonmo aha; pinateannyo na to mia-mian Israel anu ma'isa langkai' ka' bengkele' ka' anu toto babaani.

³²Maumo sumo aijo' mian anu palesayamo hi Ia sabole-boleh ahi' mombau dosa', Ia nombau iwi-iwi' na anu okabangangi panyo madi' ahi' aha pinalesaya.

³³Sahingga Tumpu nongkodo'imo kantumuu'an nu aha sumo ola nonsawohakon sawo kantumuu'an nu aha sataun toka sataun ola i ningkot lewa' nongoa'i buhuk.

³⁴De Tumpu nompateimo pa' aha sangkuka na aha, sangga'at mompele-pele'mo ka' po'ule'mo balatobat hi Ia.

³⁵Aha tonginau'mo saba' Tumpu aijo'mo na nonjagai aha, ka' saba' Anu Matangkas na Kuasanyo aijo'mo na nomposalamat aha.

³⁶Panyo aha ola nombaleko'i Ia, anu, nutaeakon nu aha madi' ko anu totu'u.

³⁷ Aha madi' tulu-tulutan hi Ia, ka' madi' montoongi palajanjian-Nyo.

³⁸Panyo Tumpu mongkalibosi ka' mongampuni mian anu palesayamo hi Ia, ka' madi'mo nompatei aha. Saja'mo ia nongintim tambuha'-Nyo, ka' madi' ahi' mompotudun pusanyo.

³⁹Ia tinonginau'mo saba' aha aijo' ola manusia anu madi' tumuu' toka sidu-sidutu', susumo mombun motulu ka' madi'mo mae minsusule'.

⁴⁰Talalomo ahi' na aha saja' notumuhuk hi Ia, ka' nonsakiti kinyonyoa-Nyo tempo'nyo aha kiijo' mae i tampat padang anu mateges.

⁴¹Saja'mo ahi' na aha nonsobai Tumpu nongideimo kinyonyoa nu Anu Susi' hondo, Tumpu nu aha Israel.

⁴²Aha madi'mo nongka'ima'i kakuasa'an-Nyo i sinaa tempo'nyo ia nomposalamatmo aha madi' pinatean nu anu nongewa aha.

⁴³Tempo'nyo Ia nombaumo hahan anu okabangangi kiijo' mae i Mesir, ka' hahan mule' anu okabangangi i tampat padang kiijo' mae i Zoan.

⁴⁴ Iwi-iwi' na kaunyo nu aha ingabali'-Nyomo, tinimbalimo baso', sahingga madi'mo talakana na nu inum nu aha na ueenyo.

⁴⁵ Sinakisa'-Nyomo na aha nu lalo anu tahahumo hondo na konjo'nyo, ka' nompojohokmo tano' nu aha da pinoko'idekmo nu bahangkakak.

⁴⁶ Ianompotokamo mae koe' tiba kihi-kihi' anu nongingkotimo bua' nu sosu'anon ka' isi nu ale'.

⁴⁷ Kau' anggur nu aha ingidean-Nyomo nu ujan batu, ka' iwi-iwi' na kau' ara nu aha ingideannyomo nu dondu'ok anu tebeen.

⁴⁸Ia nompojohokmo ujan eis nongkampitimo potu'on nu aha ka' kilat nonsosakmo binatang nu aha iwi-iwi'.

⁴⁹Ia nompotudunmo tambuha'nyo anu kino suhu-suhutmo i uno nu kinyonyoanyo, sahingga ia nonsaimo mae sanggombu na malaekat anu mompatei. Sahingga i hentemo na kinyonyoa nu aha madi'mo daagi' noko ala gawe.

⁵⁰Ia madi'mo nongintim tambuha'Nyo kabai daagi' nongkalibosi kantumuu'an nu aha, panyo nonsilakaimo aha nu panyakit boboos.

⁵¹ Ia nonsilakaimo to ana-anak tumpe mo'ane hi aha toto sangauan na mian nu Mesir.

⁵² Lantas i laya'nyomo na mian anu palesayamo hi ia susumo sanggombu na domba, ka' nolaya'mo notulu tampat padang anu mateges.

⁵³ I uno nu ia nolaya' aha aijo' madi' ko anu nomposia aha, ka' aha madi'mo nabuhuk, panyo sampobali' nu aha nolomosmo i ambai.

⁵⁴ Lantas mian anu palesayamo hi Ia binoa-Nyomo i tampat anu susi', i bungkutnyo anu ingala-Nyomo.

⁵⁵ I ahop nu mian anu palesayamo hi ia, i laa'-Nyomo na mian anu jojoong i kiijo', lantas binagi-bagiakon-Nyomo na lipu' aijo' hi iwi-iwi' na tulunan nu bansa Israel mian anu palesayamo hi Ia sahingga aha nonjojoongimo iwi-iwi' na kema' nu sampobali' nu aha.

⁵⁶ Panyo aha notomuhukmo ka' nonguji'mo Tumpu Anu Matangkas na Kuasanyo, palentah-Nyo iwi-iwi' madi'mo tinulutan nu aha.

⁵⁷Aha nombaumo kalakuan anu ma'idek susumo mompolee' mae nu aha, ka' madi'mo timbali opalesaya sumomo pompana' anu tinageo'mo.

⁵⁸Aha madi'mo nohongo-hongo Tumpu Allah, tandanyo aijo'mo aha nombaumo tampat ponsomban pilogot, ka' ia madi'mo sinanang hi aha kalana patong nu aha haha aijo'.

⁵⁹Nontoa han aijo', Tumpu notambuha'mo hondo ka' madi'mo hondo-hondo nongkali-kalinga aha.

⁶⁰ Pinala'ian-Nyomo na Kema'Nyo kiijo' i Silo, anu binau kajojoongan-Nyo sama-sama nosangalu aha.

⁶¹ Pinojohok-Nyomo na Peti' Palajanjian da binoa. Peti' aijo' salaku tanda Ia talasanggo, panyo ingalamo nu mian anu nongewa aha.

⁶²Tinambuha'an-Nyomo na mian anu palesayamo hi Ia, mian anu binaumo pusaka'nyo, ka' pinojohok-Nyomo na aha da pinatean nu bajak.

⁶³To oli-olitau nu aha kinaanmo nu apu; madi'mo ko anu nongosoai to lalangkoyang nu aha.

⁶⁴To ima-imam nu aha pinateanmo nu bajak, to balu-balu nu aha madi'mo noko ala nontando'i.

⁶⁵Sahingga Tumpu nobungkutmo sumomo mian anu nobulamo hau-haunyo hoyot. Sumomo mian anu nahosonmo salatan noko inumo anggur.

⁶⁶Ia nompahampateakonmo anu nongewamo ia sahingga nopalaimo na aha ka' nompatundu'mo aha sampe toka sidu-sidutu'.

⁶⁷Panyo ia madi'mo nongkali-kalinga lee' mae i Yusuf ka' madi'mo nompile'i tulunan nu bansa i Efraim.

⁶⁸Anu pinile'an-Nyo aijo'mo tulunan nu bansa i Yehuda, ka' Puge'nyo nu Sion anu kina'ima'an-Nyomo.

⁶⁹Ia nombaumo Laigan-Nyo susumo anu kajo-kajojoongan-Nyo kiita' i suluga' ka' susumo tano' mahoson sampe toka sidu-sidutu'.

⁷⁰ Ia nompile'imo i Daud posaihon-Nyo, ka' nongalamo ia aijo' mae i gombuan nu potu'on,

⁷¹lengkat mae i tampat pinompotu'annyo tinanyo nu domba, da molaya' Israel mian anu palesayamo hi Ia.

⁷²I Daud nonjagaimo aha, kinyonyoanyo madi' lewa' nongakali ka' pande hondo na ia lewa' nompokinde'i.