Read Saluan MAZMUR 80 Bible Online

MAZMUR 80 - Saluan bible

MAZMUR 80

¹Anu mongkapalai panyanyi. Ingala i lagu nu nyanyian: Bunga Bakung. Mazmur mongkona han anu sinakisianmo i Asaf.

² O, Polaya' nu Israel, potombihingakon mae, Belento na nolaya'mo lee' i Yusuf susumo potu'on, sanggombu. Belento na anu sinumuhangmo aita' i malaekat, tinokamo mae, na'ima'mo hondo na tinoa, hi ahop i Efraim, Benyamin tiba hi Manasye.

³Potoamo mae na kakuasa'an nu Belento hi kami, ka' tokamo mae posalamat na kami.

⁴O, Tumpu, po'ule' mae pokopianiakon na' kantumuu'an mami; polibos maena montoa kami, da kami salamat.

⁵O, Tumpu Anu Daka' na Kuasa-Nyo, sampe toka hipian na kopinnyo na Belento motambuha', maumo mian anu palesayamo hi Belento balado'amo?

⁶Kami lewa' humang aijo'mo na kaanon mami anu binee'mo nu Belento lolu' nanjoo'mo hondo na o inum mami.

⁷Pinojohokmo nu Belento na to bansa-bansa anu mompaha ohani mompahantuda'akon mae tano' mami aha anu monsampobali' mae kami kinumojomo kalana sinanangmo.

⁸O, Tumpu, Anu Daka na Kuasa-Nyo po'ule' mae pokopianiakon na kantumuu'an mami; polibos mae na montoa kami, da kami salamat.

⁹Mian anu palesayamo hi Belento sumomo kau' anggur anu i lalinmo mae nu Belento lengkat mae i Mesir. Bansa haha aijo' sangga'at i laa'mo nu Belento, lantas sinu'anmo nu Belento na kau' aijo' i lipu' nu aha.

¹⁰Belento nontoukaimo tano' da bau kajojoongan nu aha; sahingga ia nimbakatmo leleeng ka' nonsongkohimo iwi-iwi' na lipu'.

¹¹Ia nohohungimo to bungku-bungkutnyo ka' to panga-panga'nyo nombolungimo kau' aras anu toto tale-talenga'nyo.

¹²Panga'nyo toto ise-ise' nantademo manta-mantan tinoka-tokamo i Ambai anu i Totonga'nyo, iwi-iwi' na londeknyo tinoka-tokamo i Kaunyo nu Efrat.

¹³O, Tumpu, kadaka' tinua'akonmo nu Belento na balabatnyo, sahingga de ko mian anu motulu montipumo bua'nyo?

¹⁴Bau' nu kuhat lewa'mo mombangkedi sampe nahutakmo, ka' kinaanmo nu binatang anu jojoong i tampat padang na lewa' mongkaan.

¹⁵O, Tumpu, Anu Matangkas na Kuasa-Nyo, po'ule'mo mae toka, toa mae lengkat atina' i suluga' ka' palahatikan mae mian anu palesayamo hi Belento.

¹⁶Posalamat mae na mian anu sumomo kau' anggur anu posi Belento na nosu'an, ka' sumpenyo nu anggur anu pinohosonmo nu Belento.

¹⁷Anu monsampobali nonta'amo ka' nompapuimo; bakasmo na aha da silakamo nu tambuha' nu Belento.

¹⁸Jagai mae na mian anu pinile'anmo nu Belento, anak nu manusia anu pinohosonmo, nu Belento da Belentomo na Tumpu-Nyo.

¹⁹Sahingga kami madi'mo daagi' mompala'i Belento; jagaiakon mae na kantumuu'an mami, sahingga kami mompuji'mo Belento.

²⁰O, Tumpu, Anu Daka' na Kuasa-Nyo, polibos mae na montoa kami, da kami salamat.