Read Saluan MAZMUR 84 Bible Online

MAZMUR 84 - Saluan bible

MAZMUR 84

¹Anu mongkapalai panyanyi. Ingala i lagu nu nyanyian: Gitit. Mazmur nu aha sa'anakan i Korah.

²Ma'ima' ka' momposanang hondo kinyonyoa na kajojoongan nu Belento, o, Tumpu Anu Daka' na Kuasanyo!

³Kinyonyoangku talalo hondo saja' monginau' Laigan nu Belento, santuu'ku ka' butongku montaligalaimo Tumpu anu tumuu'.

⁴Ka' mule' tomonsi' toto ise-ise binee'anmo laigan ka' tomonsi petajuk suele binee'anmo sa'angu' na peta, bau pompojoongan nu aha soma'nyo koko mezbah nu Belento, O, Tumpu Anu Daka' na Kuasanyo, Tomundo'ku ka' Tumpu-ngku.

⁵Totu-totu'u mohumpak ka'ima'an na mian anu jojoong i laigan nu Belento, ka' saja' monyanyi, nyanyian anu bau pompuji' Belento.

⁶Mohumpakmo ka'ima'an na mian anu obee'imo kahosonan nu Belento, ka' anu ko kinyonyoa mamba montoa Bungkutnyo nu Sion.

⁷Hau-haunyo aha lumajang motulu i bangka'nyo nu Ahelat, tampat aijo' binali'anmo nu aha tinimbalimo mata nu uee, ujan anu momona tinudun nabohos hondo aijo', salakumo balakat.

⁸Kahosonan nu aha nompaka pintuangmo, tempo'nyo ilumajang namba i Sion, i tampat nu Tumpu iwi-iwi' na anu oholomati nanintoamo mae.

⁹Potombihing mae na do'angku, O, Tumpu Anu Daka' na Kuasanyo, potombihingakon mae, O, Tumpu i Yakub.

¹⁰Balakatiakon mae na tomundo' mami, O, Tumpu, jagaiakon mae na mian anu pinile'anumo nu Belento.

¹¹Maumo 1.000 na sinaa na jojoong i tampat sangga'at panyo lebe ma'ima' maumo ola sansinaa na jojoong i Laigan nu Belento. Anu nompile'imo da timbali bau ponjagai sabatan Laigan nu Tumpu-ngku asan boli jojoong i laigan nu mian anu ma'idek na kinyonyoanyo.

¹²Kalana Tumpu na monjagai kita ka' tomundo' anu talasanggo hondo, anu mongkalibosimo mae kita ka' i hangkatnyomo na sanggonto. Ia saja' montalima maumo pa'apaa asan anu ma'ima' na opoita kona hi mian anu kantumuu'annyo madi' ko anu ma'idek.

¹³O Tumpu Anu Daka' na Kuasanyo, mohumpak ka'ima'an na kantumuu'an nu mian anu palesayamo hi Belento.