Read Saluan MAZMUR 86 Bible Online

MAZMUR 86 - Saluan bible

MAZMUR 86

¹Do'a i Daud. Potombihingakon mae na do'angku, o, Tumpu, ka' taami mae na aku, kalana aku kasiasi ka' madi' mahoson.

²Jagaiakon mae na kantumuu'anku, kalana Belento mongkalibosi mae aku, posalamatakon mae na posaihon nu Belento aiya anu pinalesayamo hi Belento.

³Belentomo na Tumpungku, kalibosi mae na aku o, Tumpu kalana sansina-sinaa aku balado'a hi Belento.

⁴O, Tumpu, polame'akon mae na kinyonyoa nu posaihon nu Belento aiya, kalana hi Belentomo na pomboanku kinyonyoangku.

⁵Belento manonong, o, Tumpu, ka' kahanda' mongampuni, mian anu balado'a hi Belento, saja' nukalibosi nu Belento, nukalibosan anu madi' ko kamingkotannyo.

⁶Boli mae okolilimi na do'angku, o, Tumpu, potombihingakon mae na potataengku mongkakase da otulungi mae.

⁷Tempo'nyo aku sinusa'mo, aku binalado'amo hi Belento, kalana belento montaami mae aku.

⁸O, Tumpu, madi' ko tumpu sangga'at susumo Belento madi' ko anu moko ala mombau apa-apaa susumo anu binaumo nu belento.

⁹ Iwi-iwi' na bansa anu pinotimbalimo nu Belento saidi' mae, tokamo o Tumpu kahanda' monsombah Belento ka' mompuji' Belento anu talasanggo aijo'.

¹⁰Kalana Belento mahoson ka' baani ka' mombaumo hahan anu okabangangi, olamo samata-mata Belentomo na Tumpu.

¹¹Pogulu'akon mae, apaa na anu, nu kahanda'i hi belengku, o, Tumpu, da ku batuki ka' ku tuluti totu-totu'u; potimbali mae na aku da tulu-tulutan ka' totu-totu'u na kinyonyoangku.

¹²Aku montalima kase hi Belento, totu-totu'u hondo na kinyonyoangku, o, Tumpungku; aku mompuji'mo kakuasa'an nu Belento sampe toka sidu-sidutu'.

¹³Kalana Belento saja' mongkalibosi aku, ka' kalibosan nu Belento tahahumo hondo; Belento nohangkatmo nyawangku da boli jojoong kaiyong i uno nu kubun.

¹⁴O, Tumpu, mian anu buulon mambamo mae montumbuhi aku, sanggombu na mian anu toto sisinggi kahanda'mo mompatei mae aku; aha madi'mo mompajuli Belento.

¹⁵Panyo Belento, o, Tumpu, Tumpu anu pangkalibosi ka' manononghondo, sabaan hondo, saja' mongkalibosi, ka' manonong.

¹⁶Palahatikan ka' kalibosi mae na aku, pohosonakon mae, ka' posalamatakon mae na aku, susumo tinangku, aku suele monsombah ahi' Belento.

¹⁷Bee'i mae tanda na aku, da pontoan taalu' Belento mongkanonongi ahi' mae aku, o, Tumpu da mian anu mongka'ideki mae aku, ma'ambangmo, de nutoamo mae nu aha na Belento montulungimo mae aku ka' mohase'mo mae aku.