Read Saluan MAZMUR 89 Bible Online

MAZMUR 89 - Saluan bible

MAZMUR 89

¹ Nyanyian pangajalan i Etan, mian nu aha Ezrahi. Kanonongan nu Tumpu Anu Daka' na Kuasa-Nyo.

²Kalibosan nu Belento, o, Tumpu, saja'mo ku nyanyiakon, kanonongan nu Belento saja'mo ku bebakon sampe molundu-lundu na tulunan.

³Kalana ku sumbu' na kalibosan nu Belento sampe toka sidu-sidutu', kanonongan nu Belento mahoson hondo susumo langit.

⁴Belento notataemo, “Aku nombaumo palajanjian tiba mian anu pinile'anKumo; Aku binasumpa'mo hi Daud, posaihon-Ku:

⁵ ‘Kalaja'an nu beleyum sabole-boleh ku potinjo sampe toka sidu-sidutu', molundu-lundu na tulunan nu beleyum ka' to maku-makumpu nu beleyum monjojoongi.’ ”

⁶Sidang nu aha mian nu suluga' nompuji'mo palabuatan nu Belento anu okabangangi, ka' nonyanyiakonmo kanonongan nu Belento o, Tumpu.

⁷Aita' mae i langit madi' ko anu susumo Belento o, Tumpu, madi' ko malaekat nu suluga' anu mompokakanai Belento.

⁸Belento oholomati nu aha to mia-mian anu susi', nakabuhuk hondo nu aha iwi-iwi' anu montikubi mae Belento.

⁹O, Tumpu, Tumpu Anu Daka' na Kuasa-Nyo, ihe na anu susumo Belento na kohosonnyo? Belento manonong hondo i han iwi-iwi' o, Tumpu.

¹⁰Belento mongkuasai ambai anu daka' hondo na bokonnyo, ka' nompobelentimo bokonnyo anu okabuhuk hondo.

¹¹I Rahab, ulo daka-daka' nu ambai, i hungku'anmo nu Belento ka' pinateanmo nu Belento, lima nu Belento anu tala-talalo hondo mahoson na nompatundu'mo iwi-iwi' na anu monsampobali' Belento.

¹²Langit ka' tano' Belento na tumpu-Nyo, dunia ka' iwi-iwi' na isinyo Belento na nompotimbali.

¹³Belentomo na nompotimbali utara ka' selatan, Bungkutnyo nu Tabot ka' Hermon nontaligalaimo Belento.

¹⁴Talalo hondo daka' na kuasa nu Belento ka' talalo hondo daka' na kahosonan nu Belento!

¹⁵Ka'adilan ka' atulan aijo'mo na bau usoinyo nu kalaja'an nu Belento, kalibosan ka' kanonongan otoa i han iwi-iwi' apaa na anu, nubau nu Belento.

¹⁶Mohumpak ka'ima'an na kantumuu'an nu bansa anu lame' na kinyonyoanyo monsombah Tumpu, anu tumuu' i uno nu jingka de Belento tokamo mae o, Tumpu.

¹⁷Sansina-sinaa aha sanang na kinyonyoanyo ka' sabole-boleh palesaya, kalana kanonongan nu Belento.

¹⁸Belento nompo'untungmo hondo kami mahampate, kalana samata-mata kanonongan nu Belento sahingga kami inguntungmo na nahampate.

¹⁹Kalana anu nonjagai mae kami aijo'mo mian anu pinile'anmo mae nu Belento, o, Tumpu; tomundo' mami Belento Tumpu Israel na tumpunyo anu Susi'.

²⁰Naipuan mae tempo'nyo Belento nanintoa, Belento nompoto'imo hi posaihon nu Belento ano tulu-tulutan. “Aku nontulungimo samian anu baani hondo, samian anu pinile'an-Kumo aijo' hi aha mian da'isan ka' i hangkatkumo na sanggonyo.

²¹ Aku nongkabotmo i Daud, posaihonku, ka' jinujuhankumu nu lanya' susumo biasa opake de mohangkatmo samian timbali tomundo'.

²²Kahosonan-Ku saja' monjagai ia, kuasang-Ku na mompohoson ia.

²³Ia madi' nupoko ala nu patundu' nu anu monsampobali', ka' madi' nupoko ala nusansala nu mian anu ma'idek na kinyonyoanyo.

²⁴Iwi-iwi' na anu monsampobali' ia Ku pateimo, Ku patei maumo pa' ihe na anu mongka'ideki ia.

²⁵Aku sabole-boleh mongkalibosi ia ka' mongkanonongi ia, ka' ku potimbalimo da mompaka pahosonmo na kakuasa'annyo.

²⁶Kalaja'annyo ku paka po'ewamo, lengkat mae i Ambai anu i Totonga'nyo toka-toka i Kaunyo nu Efrat.

²⁷Ia notataeje mae hi beleng-Ku, ‘Belentomo na Tuumangku, Tumpu Allah-ngku anu monjagai mae, ka' anu momposalamat aku.’

²⁸ Ku potimbalimo na ia ana-Ku mo'ane anu tumpenyo, anu talalo hondo talasanggo hi aha to tomu-tomundo' iwi-iwi'.

²⁹Ia sabole-boleh ku kalibosi sampe toka sidu-sidutu', anu jinanji'-Kumo hi ia sabole-boleh mahoson madi' mongabali'.

³⁰Kalaja'annyo sabole-boleh Ku potinjo susumo langit daagi' sabole-boleh aita' i buan nu tano', molundu-lundu na makumpu nu aha monjojoongi aijo'.

³¹Panyo de lee' nu aha molanggai atulanku, ka' madi' tumuu' mombatuki palentah-ngKu,

³²de aha madi' mompajuli anu tinantukan-Kumo ka' madi'mo montuluti atulan-Ku,

³³aha Ku dokemo salaku bau pohukum kalana aha nolanggaimo atulan-Ku, ka' Ku bee'imo balaa' kalana dosa' nu aha iwi-iwi'.

³⁴Panyo aku sabole-boleh mongkalibosi i Daud, ka' madi'mo mongabali' na kanonongan-Ku.

³⁵Anu jinanji'-Kumo hi ia madi'mo Ku kolilimi, sa'angu' pe'e na anu jinanji'-Kumo madi'mo daagi' ku potundei.

³⁶Ola minsan na aku binasumpa' panyo nukonamo sampe toka sidu-sidutu' i uno nu sanggong-Ku anu susi'; aku madi'mo ahi' mombaleko'i i Daud.

³⁷Kalaja'annyo sabole-bole totahan susumo batu nu sinaa daagi sabole-bole otoa, molundu-lundu na anak makumpu nu aha monjojoongi.

³⁸Kalaja'annyo sabole-boleh daagi' susumo bitu'on, anu aita mae i kundom, saja' mae monsakisi'i.”

³⁹Panyo uuka aiya Belento nontambuha'imo i tomundo, Belento nompojohokmo ka' madi'mo nongkali-kalinga mian anu pinile'anmo nu Belento.

⁴⁰Madi'mo kupojadi na palajanjian nu Belento hi posaihon nu Belento, makota'nyo i lumbu'akonmo nu Belento i uno nu hensek.

⁴¹I hobo'akonmo nu Belento na pagan mesen iwi-iwi' i kota' kajojoongannyo, bentengnyo iwi-iwi' i hobo'akonmo nu Belento.

⁴²Iwi-iwi' na mian anu motulu ikiijo' nompohuhuakonmo balangnyo, ia lewa'mo kinokojoan nu aha anu mompaha ohani.

⁴³Belento nompo'untungmo nahampate aha anu monsampobali' mae ia, ka' iwi-iwi' na mian anu nongewa mae ia i lame'mo.

⁴⁴Ka' mule' toongonnyo anu bau pahampate nu aha pinotimbalimo nu Belento madi' ningkaliangan, Belento madi'mo nontulungi ia, nahampate.

⁴⁵Kakuasa'annyo anu tinalasanggomo hondo pinobelentimo nu Belento, kadelanyo nu kalaja'an ingalinmo nu Belento nokaiyong i tano'.

⁴⁶Ka'umolitauannyo kinodo'anmo nu Belento, ka' kinulubanmo nu Belento na ia nu ambang.

⁴⁷Hipian na kopinnyo na Belento madi'mo mae manintoa o, Tumpu? Hipian na kopinnyo na Belento motambuha' anu sumomo apu na komoaknyo?

⁴⁸Inau'akon mae na aku talalomo hondo kinodo' na umunku aiya, pinotimbalimo nu Belento na mian anu ko nyawanyo panyo madi' tumuu' batu.

⁴⁹Ihe na moko ala tumuu' sidu-sidutu' ka' mule' madi' silaka? Ihe na anu moko ala bebas da madi' minsoop i bolo' nu kubun?

⁵⁰O, Tumpu, iya na tanda pontoan kalibosan nu Belento anu momonanyo mae, anu jinanji'mo nu Belento hi Daud salaku tanda kanonongan nu Belento?

⁵¹Inau'akon mae o, Tumpu, mosiamo ahi' na posaihon nu Belento aiya lewa'mo o'alu, aku saja'mo pinopo'ambang nu to bansa-bansa.

⁵²To mia-mian anu monsampobali' Belento nompopo'ambangmo i tomundo' anu pinile'anmo nu Belento, o, Tumpu, lewa' mongkokojoi ia maumo pa' moya na ia mamba.

⁵³O, puji' na Tumpu sampe toka sidu-sidutu'. Timbaliakonmo mae susumo uuka! Amin!