Read Saluan MAZMUR 9 Bible Online

MAZMUR 9 - Saluan bible

MAZMUR 9

¹Anu mongkapalai panyanyi. Lagunyo ingala i lagu nu Mut-Laben. Mazmur i Daud.

²Totu-totu'u hondo na kinyonyoangku kahanda' montalima kaseh hi Belento, o Tumpu, ka' mombebakon anu binaumo nu Belento anu talalo hondo okabangangi aijo'.

³Aku bilahimo ka' lame'mo kalana Belento ka' mompuji'mo sanggo nu Belento, o Tumpu Anu Matangkas na Kuasa-Nyo.

⁴I ahop nu Belento sampobali'ku nobalikmo ka' nopalaimo; aha tinosumpunmo ka' tinohumpukmo ka' sinilakamo.

⁵Kalana Belento mompalentah salaku mian kopian anu adin hondo; Belento nontinjohimo mae palakalangku.

⁶Belento nohukumo to bansa-bansa ka' nompateimo to mia-mian anu ma'idek na kinyonyoanyo; aha kinolilimanmo sampe toka sidu-sidutu'.

⁷Anu monsampobali' mae kami sinilakamo iwi-iwi', kota' nu aha iwi-iwi' ingideanmo nu Belento madi'mo daagi' ko anu lewa' monginau'.

⁸Tumpu mompalentah sampe toka sidu-sidutu'; Ia nompotinjomo kapalentahan-Nyo da oputusimo na dunia.

⁹Adin hondo na ia mompalentah to bansa-bansa ka' momputusi aha madi' tageo'.

¹⁰Tumpu aijo' tampat pinsendo'an nu mian anu sinakisamo, tampat pingkongan de kasusa'anmo.

¹¹Mian anu monsumbu' Belento montaha'imani hondo Belento, o Tumpu, mian anu monsombah Belento madi' nupala'i nu Belento.

¹²O puji' na Tumpu anu mompalentah aita' i Sion! Osisikakon apaa na anu binau-Nyomo hi to bansa-bansa!

¹³Kalana Ia monginau' mian anu nongoa'imo kasansala'an ka' madi' mongkolilimi aha anu tinolokihismo; mian anu talalo buhingison hi sangko mian mohumpak hukuman hi Ia.

¹⁴Toa mae, na sampobali'ku monsansalamo aku; kalibosiakon mae na aku, o Tumpu, po'uhanakon mae na aku da boli silaka,

¹⁵da ku puji' na Belento i ahop nu mian anu jojoong i Yerusalem. Aku montaligalaimo kalana lame'mo kalana Belento nomposalamatmo aku.

¹⁶To bansa-bansa anu madi' monsumbu' Belento nanabu'mo i bolo' anu pinosi kekemo nu aha; aha kinonamo nu so'o anu posi ahamo na nonta'an so'o.

¹⁷Tumpu nompotoamo butong-Nyo kalana kaputusan-Nyo anu adin hondo. Mian anu ma'idek na kinyonyoanyo nohumpakmo hukuman sinaduakonmo nu anu pinosi baunyomo.

¹⁸Silaka aijo'mo na kahimpusannyo nu mian anu ma'idek na kinyonyoanyo, to bansa-bansa anu madi' mompajuli Tumpu.

¹⁹Madi' sampe tokamo sidu-sidutu' na mian anu kasiasi okolilimi; mian anu sansala madi' ahi' saja'mo, madi'mo ko anu nu taha'imani.

²⁰Tinjomo mae, Tumpu, putusimo mae na to bansa-bansa, bolimo mompojohok manusia saja'mo buulon na butongnyo.

²¹Sahanyo aha mabuhuk, o Tumpu, ka' da aha sinsumbu'mo taalu' aha ola ahi' manusia.