Read Saluan MAZMUR 90 Bible Online

MAZMUR 90 - Saluan bible

MAZMUR 90

¹Doi i Musa, posaihon nu Tumpu. O, Tumpu, Belentomo na bau pihohungan mami molundu-lundu na tulunan mami.

²Ma'isa pe'e bungkutnyo iwi-iwi' pinotimbali, ma'isa pe'e tano' ka' dunia tinali' nu Belento, Belentomo na Tumpu anu sampe toka sidu-sidutu', madi' ko katampu'unannyo ka' madi' ko ka'ahenannyo.

³Belento nonsaimo mian ninsusule' i pinolengkatannyo mae, tinimbalimo abu' susumo salatanmo pe'e momonanyo.

⁴ De hi belento 1.000 na taun ola susumo sansinaa na kopinnyo, sinaa nabongi'an mae anu ihikuhakonmo ola, susumo monjaga pihi mobolo-bolosan.

⁵Belento nonganjuhakonmo kami; kami ola susumo nongipi, susumo hemput anu milondekmo;

⁶salatan subu-subumo ia tololojutmo ka' timbokamo, panyo mangkalualemo salatan malomo.

⁷Kami tinolokengkengmo i tambuha' nu Belento, ka' nohopu'mo kalana pusa nu Belento.

⁸Belento nompo'una'mo kasala'an mami i ahop nu Belento, dosa' mami anu sulu-suluk kinantoaanmo hi Belento.

⁹Kantumuu'an mami kodo' kalana tambuha' nu Belento, taun-taun nu umun mami mingkot ola susumo monsawohakon sawo.

¹⁰Kopinnyo nu kantumuu'an mami ola pitumpulu' na taun de kami mahoson, yo montokai ualumpulu' na taun. Panyo madi' mo sanang ka' sansalamo na ota'up mami; salatan tumuu'mo sasaingoni', kami mule' madi'mo ahi' otoa-toa.

¹¹Ihe na monsumbu' tambuha' nu Belento anu taha-tahahumo kabai mangalati' hondo pa' mosia na ka'ahenannyo nu tambuha' nu Belento?

¹²Bee'i mae pangalati'an na kami da osumbu' mami na kantumuu'an anu ola kodo-kodo' aiya da kami timbali mian anu ma'ima' na kinyonyoanyo.

¹³O, Tumpu, sampe toka hipian na Belento motambuha'? Po'ule'mo mae toka ka' kalibosiakonmo mae na to posa-posaihon nu Belento haha aiya.

¹⁴Bee'imo mae na kami kalibosan nu belento de subu-subumo, da kami lame'mo ka' saja'mo manyanyi i uno nu kantumuu'an mami.

¹⁵Bee'i mae na kami kantumuu'an anu ma'ima' anu sitimbangmo tiba kasansala'an mami anu ingoa'anmo mami i taun-taun kami nongoa'i kasansala'an.

¹⁶Potoamo mae hi kami to posa-posaihon nu Belento na anu binaumo nu Belento ka' kakuasa'an nu Belento anu talasanggo hondo hi to lelee' mami.

¹⁷O, Tumpu mami, balakatiakon mae na kami, da anu okalaja mami iwi-iwi' ko hasinnyo ahi'.