Read Saluan MAZMUR 95 Bible Online

MAZMUR 95 - Saluan bible

MAZMUR 95

¹Imbo' da kita manyanyi bau pompuji' Tumpu, montaligalai anu momposalamat kita!

²Imbo' da kita mangadap hi Ia ka' manyanyi nyanyian bau pontalima kaseh, montaligalai Ia ka' manyanyi, nyanyian anu bau pompuji'.

³Kalana Tumpu aijo'mo na Tumpu anu talasanggo hondo, Tomundo' anu baani, anu molingkudui iwi-iwi' na pilogot.

⁴Ia mongkuasai bahagian anu toto leleeng aiya i dunia, bawonyo nu bungkutnyo iwi-iwi' suele Ia na tumpu-Nyo.

⁵Ia mongkuasai ambai, kalana Ia na nompotimbali, katano'an suele limanyo na nombau.

⁶Imbo' da kita tolodadupu monsombah Ia, tolodadupu i ahop nu Tumpu, anu nompotimbali kita.

⁷ Kalana Iamo na Tumpunto, kita mian anu, Nu potuu' susumo domba anu lewa' Nu laya'. Sinaa uuka aiya potombihing mae na potatae-Nyo:

⁸ “Boli panggaga na belemiu susumo mompolee' nu belemiu kiijo' mae i Meriba, susumo tempo'nyo aha kiijo' mae i Masa, i tampat padang anu mateges.

⁹Kiijo' mae na aha nonsobaimo Aku, maumo ahi' aha nontoamo palabuatan-Ku.

¹⁰Pinatompulu' na taun na kopinnyo na aku lewa' nonguahi nontoa aha; Aha notataemo: Totu-totu'u, bansa aijo' madi' tulu-tulutan! Aha madi' mompajuli iwi-iwi' na palentah-ngKu.

¹¹ Sahingga kalana anu notambuha'mo, aku binasumpa'mo, aha madi'mo timbali minsoop i lipu' aijo' da milawe hingga-hinggat tiba aku.”