Read Saluan MAZMUR 96 Bible Online

MAZMUR 96 - Saluan bible

MAZMUR 96

¹Nyanyiakonmo na nyanyian anu sala'je ingajan bau pompuji' Tumpu! Panyanyimo puji' na Tumpu, o, belemiu songko-songko na dunia!

²Panyanyimo puji na Tumpu, ka' puji' na Ia; sansina-sinaa bebakon na lele anu moko lame' saba' Ia nomposalamatmo kita.

³Sisikakon na Ia aijo' talasanggo hondo hi to bansa-bansa, ka' apa-apaa na palabuatan-Nyo anu talalo hondo daka'.

⁴Kalana talasanggo hondo na Tumpu, ka' talalo hondo o puji', tionyo ahi' talalo okabuhuk molingkudui iwi-iwi' na pilogot.

⁵To pilo-pilogot nu bansa sangga'at ola samata-mata patong bapilogotan, panyo Tumpu aijo'mo na anu nompotimbali aita' langa.

⁶Ia talasanggo hondo ka' oholomati. Laigan-Nyo kahokuasa ka' ma'ima'an.

⁷ O puji' na Tumpu, o belemiu manusia, o puji' na Ia anu talasanggo ka' anu mahoson!

⁸O puji' na sanggo-Nyo anu oholomati ka'b oa na koloban i uno nu Laigan-Nyo.

⁹Osombah na Tumpu, mompusok baju' anu opake de monsombah mo Ia! Langkakatanmo i ahop-Nyo, o dunia songko-songko!

¹⁰Polelemo hi to bansa-bansa, “Tumpu aijo' Tomundo! Dunia mahoson madi' opoko ala ogayu'; Ia momputusi hukuman nu to bansa-bansa adin hondo.”

¹¹Balame-lame'mo o langit tiba tano'! Pombuhokmo o ambai ka' isinyo iwi-iwi'!

¹²Balame-lame'mo, o tampat padang tiba iwi-iwi' na anu tutuu' kiijo'. Iwi-iwi' na kau' i uno nu alas montaligalaimo.

¹³Kalana Tumpu tokamo mae mompalentah i dunia, Ia momputusimo hukuman nu to bansa-bansa, adin ka' madi' tageo'.