Read Saluan MAZMUR 98 Bible Online

MAZMUR 98 - Saluan bible

MAZMUR 98

¹Mazmur. Nyanyiakonmo hi Tumpu na nyanyian anu sala'je ingajan, kalana apa-apaa na anu binau-Nyomo talalo ahi' okabangangi! Ola samata-mata kakuasa'an ka' posi kahosonan-Nyo. Ia nohumpakmo ka'untungan na, nahampate.

²Tumpu nombebakonmo ka'untungannyo nahampate; Ia nombebakonmo ka'adilan-Nyo hi to bansa-bansa.

³Ia nonginau'mo kalibosan ka' kanonongan-Nyo, hi Israel, hi mian anu palesayamo hi ia. Iwi-iwi' na bansa, i songko-songko na dunia nontoamo ka'untungan nu Tumpunto nahampate.

⁴Lewa' otaligalai na Tumpu, o belemiu songko-songko na dunia! O puji' na Tumpu nu nyanyian ka' lewa' montaligala lame-lame'.

⁵Nyanyiakon na nyanyian bau pompuji' Tumpu, ka' okuti'akon kasapi'.

⁶Puhi na tolompet ka' po'onyi' daka-daka', otaligalai na Tumpu, Tomundo'to.

⁷Pombuhokmo mae na belemiu ambai tiba iwi-iwi' na isinyo dunia ka' iwi-iwi' na anu monjojoongi.

⁸Bakas da kaunyo iwi-iwi' mohapa'imo lima, ka' iwi-iwi' na puge'nyo montaligalaimo lame-lame' i ahop nu Tumpu.

⁹Kalana ia toka mae da momputusimo hukuman nu dunia; iwi-iwi' na bansa oputusimo na hukuman-Nyo, ka' adin ka' madi' hondo sala'.