Read Saluan AMSAL 13 Bible Online

AMSAL 13 - Saluan bible

AMSAL 13

¹Anak anu pande mompalahatikan de tuumanyo mombee'i pokinde'; panyo mian anu ko bubuun madi' mongka'oho' de opisala'i.

²Potatae nu mian anu manonong saja' mohumpak dale'; panyo mian anu tageo' na kinyonyoanyo saja' singgi.

³Mian anu mongati-ati na motatae kantumuu'annyo madi' ko anu mompoposia; panyo mian anu yayamo na motatae saidi mae mohumpak kasusa'an.

⁴Anu moluluk manjoo' na anu nu ka'ima'i panyo sa'angu' pe'e madi' ko anu nu humpak; panyo mian anu makeke mokalaja mohumpak apaa na anu nu ka'ima'i.

⁵Mian anu madi' tageo' na kinyonyoanyo mongka'ideki anu baleko'; panyo kalakuan nu mian anu ma'idek na kinyonyoanyo mongambangi ka' opisala'i.

⁶Palabuatan anu madi' tageo' na kinyonyoanyo montinjohi mian anu hodi' na kantumuu'annyo; panyo palabuatan anu ma'idek na kinyonyoanyo mompatei mian anu baladosa'.

⁷Daagi ko mian anu mingadi-adi' mian anu kaya padahan madi' ko halata'nyo; daagi ko anu mingadi-adi' kasiasi padahan talalo ahi' kaya.

⁸Mian anu kaya tionyo ahi' mompokaluan doi da kantumuu'anyo madi' ko mian anu mompoposia; panyo mian anu kasiasi madi' ko anu kahanda' mompatei.

⁹Mian anu palesaya sumomo sahaya anu majingka hondo; panyo mian anu ma'idek na kinyonyoanyo sumomo sulu' anu mopoho'mo.

¹⁰Takabun ola monsaduakon painggagan panyo mian anu pande mongka'oho' montalima pangajalan.

¹¹Kakaya'an anu ohumpak ola dengke-dengke malia' hondo maga'a; panyo halata' anu ohumpak toto sangkiding saidi mae mompaka pintuang.

¹²De anu lewa' o ima-imani madi' opoko ala ohumpak, kinyonyoa susa'mo hondo, panyo de anu okahanda'i ohumpakmo sanangmo na kinyonyoa.

¹³Mian anu montee pangajalan nu Tumpu monsilakai buntongnyo; panyo mian anu tulu-tulutan hi atulan nu Tumpu Allah saidi mae mohumpakmo tamboonyo.

¹⁴Pangajalan nu mian anu pande aijo'mo na polengkatan mae nu kasanangan i uno nu kantumuu'an; de ko anu kahanda' mompatei pangajalan aijo' na mompotumuu'.

¹⁵Mian anu manonong oholomati; panyo mian anu madi' timbali opalesaya saidi mae tumuu' susa'.

¹⁶Mian anu pande de ma'isa pe'e opopikilakon ma'isa mombau apa-apaa; panyo mian anu punga' lewa' mahataean ikaponga'annyo.

¹⁷Utusan anu madi palesaya monsaduakon kasilaka'an; panyo utusan anu timbali opalesaya aijo' yo ko hasinnyo.

¹⁸Mian anu madi' mongka'oho' opogulu' timbali kasiasi ka' ma'ambangmo; panyo mian anu mompajuli pokinde' saidi mae oholomati.

¹⁹Palias na ko ima'nyo de ohumpakmo na anu oka'ima'i! Mian anu ponga' madi' mongka'oho' mompala'i palabuatan anu ma'idek.

²⁰Mian anu mosangalu tiba mian anu pande saidi mae timbali pande; panyo mian anu mosangalu tiba mian anu ponga' saidi mae mohumpak kasilaka'an.

²¹Mian anu baladosa' saja' otumput nu kasoe'an; panyo mian anu manonong saja' mohumpak kasanangan i uno nu kantumuu'annyo.

²²Mian anu manonong mombee' kakaya'annyo hi to maku-makumpunyo, panyo kakaya'an nu mian anu baladosa' opo una'mo hi mian anu hodi' na kinyonyoanyo.

²³Tano' anu ma'isa ko anu sinu'an timbali mohasinakon manjoo'na anu okaan de obee' da nu kalaja nu mian kasiasi; panyo kalana madi' ko kaadilan sahingga aijo' na monsaduakon tano' aijo' madi' okalaja.

²⁴Madi' mondoke anak bala alati' madi' mongkalibosi ia; panyo de mongkalibosi ia tionyo ahi' baani na mondoke ia.

²⁵Mian anu manonong saja' sukup nakantumuu'an nu aha; panyo mian anu ma'idek na kinyonyoanyo saja' kakulangan.