Read Saluan AMSAL 14 Bible Online

AMSAL 14 - Saluan bible

AMSAL 14

¹Sa'angu' na auan timbali maju kalana pande na boune mongatun panyo nu idei nu kaponga'annyo.

²Mian anu madi' tageo' na kinyonyoanyo mabuhuk ka' moholomati Tumpu Allah; panyo kantumuu'an nu mian anu tageo' na kinyonyoanyo mongambangi Ia.

³Kalana kaponga'annyo, mian anu waweng saja mosi puji butongnyo; panyo mian anu pande nu jagai nu posi potataenyo.

⁴De madi' ko sapi' bau pompajeko hasin nu ale' madi' ko anu ohumpak; panyo kahosonan nu sapi' anu ohumpak na hasin nu ale' manjoo'mo.

⁵Sakisi anu madi' tageo' na kinyonyoanyo saja' montaeakon anu sahondo-hondonyo; panyo sakisi anu madi' opalesaya saja' baleko'.

⁶Mian anu takabun madi' timbali pande; panyo mian anu pande dengke na balagulu'.

⁷Boli masangalu tiba mian anu ponga'; madi' ko anu nu ajanakon hi beleyum.

⁸Mian anu pande monsumbu' mompopikilakon apaa na anu tionyo obau, panyo mian anu ponga' nu akali nu kaponga'annyo.

⁹Mian anu ponga' madi' mompajuli pa' dosa'nyo o ampuni kabai madi'; panyo mian anu manonong mongindi da o ampuni na dosa'nyo.

¹⁰Lame' kabai susa' kiijo' una-una' i uno nu kinyonyoanyo; panyo mian sangga'at madi' moko ala mongoa'i.

¹¹Laigan nu mian anu manonong tataap madodo; panyo laigan nu mian anu ma'idek na kinyonyoanyo mohobo'mo.

¹² Daagi ko jalan anu otoa hodi'; panyo imihinyo mae jalan aijo' mompanjolongimo kasilakan.

¹³Moko lapas kumojo ugaat ko anumo humang; panyo kalame'an timbalije mule' mingahen nu kasusa'an.

¹⁴Mian anu ma'idek na kinyonyoanyo saidi' mae monta'up bua'nyo nu palabuatannyo anu ma'i-ma'idek aijo'; panyo mian anu manonong saidi' mae mohumpak bua'nyo nu palabuatannyo anu mano-manonong aijo'.

¹⁵Mian anu ponga' mompalesaya sinin na potatae; panyo mian anu pande na saja' ahi' bapikin ima-ima' na mombau apa-apaa.

¹⁶Mian anu manonong saja' balajaga-jaga ka' mati kojo'on ipalabuatan anu ma'idek; panyo mian anu ponga' pusing na ubaknyo lapas mae sanangje na kinyonyoanyo.

¹⁷Mia nanu saja' motambuha' ponga' na mompopikilakon apa-apaa; panyo mian anu pande sipatnyo sabaan.

¹⁸Mian anu madi' ko anu nupisumbu-sumbu' timbalimo ponga'; panyo mian anu pande mompaka pintuangmo na ilimu'nyo.

¹⁹Mian anu ma'idek na kinyonyoanyo saidi' mae ta'aluk hi mian anu madi' tageo' na kinyonyoanyo; mongkakase da okalibosi.

²⁰Mian anu kasiasi madi' oka'ima'i nu tosanga-sangalunyo; panyo mian anu kaya manjoo' na balaa'nyo.

²¹Ihe na mongalu mian sangga'at mombaumo dosa'; panyo ihe na mongkanonongi mian kasiasi saidi' mae kantumuu'annyo sanang.

²²Ihe na bala usaha mombau han anu ma'ima' saidi' mae opalesaya ka' oholomati; panyo ihe na montanga'i palabuatan anu ma'idek jalannyo sinala'mo.

²³Sinin na usaha daagi ko ka untungannyo; panyo sisik anu madi' kogunanyo monsaduakon mian kasiasi.

²⁴Mian anu pande opuji' kalana kapandeannyo; panyo mian anu punga' osumbu' kalana kaponga'annyo.

²⁵De samian na sakisi motatae totu'u, ia mompotumuu' nyawanyo; panyo de ia baleko' ia monsangaluimo sangalunyo.

²⁶Mian anu tulu-tulutan hi Tumpu madi' lewa' pusing na bapikin; ka' to utu-utusnyo ko anu monjagai.

²⁷Tulu-tulutan hi Tumpu aijo'mo na polengkatan mae nu kasanangan nu kantumuu'an; ka' jalan bau pompojo'on kasilakan.

²⁸Anu mohangkat sanggo itomundo' talasanggo kalan layatnyo da'isan; panyo de madi' ko layatnyo ia madi' moko ala balakuasa.

²⁹Mian anu pande madi' sampa pusa; panyo mian anu ponga' madi' moko ala sabaan.

³⁰Kinyonyoa anu madi' lewa' mangada' momposehat butongnyo; panyo anu saja' pusa nakinyonyoa sumomo panyakit anu monsilakai.

³¹Ihe na manonong hi mian anu kasiasi, moholomatimo Tumpu Allah-nyo; panyo ihe na mongkabisa'i mian anu lupe sumomo mongalu anu Nompotimbali ia.

³²Mian anu ma'idek na kinyonyoanyo mohumpak kabinasa'an kalana palabuatannyo anu ma'idek; panyo mian anu manonong madi' opoposia kalana hodi' na kinyonyoanyo.

³³Kapandean bapikin saja' kiijo' i uno nu pikilan nu mian anu manonong; panyo pikilannyo nu kabisa'i nu pikilan nu mian anu ponga'.

³⁴Kaadilan ka' kanonongan mohangkat sanggo ma'ima' nu bansa; panyo dosa' monsaduakon bansa timbali ma'ambang.

³⁵Tomundo' sanang hi pegawenyo anu pande; panyo ia pusa hi pegawenyo anu madi' moko ala molakukan kalaja'nyo.