Read Saluan AMSAL 18 Bible Online

AMSAL 18 - Saluan bible

AMSAL 18

¹Mian anu madi' mongka'oho' mosangalu tiba mian sangga'at alati'nyo ola mompalahatikan posi butongnyo; iwi-iwi' na pikilan nu mian sangga'at madi' nu talima.

²Mian anu ponga' madi' mongka'ima'i obee'i pikilan da monsumbu' ia ola ahi' mongka'ima'i saja' monsisik isi nu kinyonyoanyo.

³Dosa' ka' anu moko ambang lumajang mosangalu. De o alumo, tantu mule' ahi' lewa'mo opobau-bau.

⁴Potatae nu mian timbali salaku polengkatan mae nu anu moko pande, maleeng susumo ndalangon, molino susumo uee anu mo'ili.

⁵Madi' ma'ima' de matihapa hi mian anu palaganta ka' monsansala mian anu madi' ko sala'nyo.

⁶De mian anu ponga' na motatae, ia monsaduakon painggagan ka' opoita da odoke.

⁷Potatae nu mian anu ponga' mompohansun posi butongnyo; ia sino'omo nu posi potataenyo.

⁸Mompitana' aijo' ma'ima' hondo na o'oa'i mian mongka'ima'i da olonyom na pitana' aijo'.

⁹Mian anu madi' mombau pakalaja'annyo pokakana na ko ideknyo tiba mian anu mongka'ima'i mongidei.

¹⁰Tumpu aijo' sumo laigan tangka-tangkas anu mahoson hondo; mokiijo'mo na kalambanan nu mian anu madi' tageo' na kinyonyoanyo da mohumpak tampat anu madi'ko anu mompoposia.

¹¹Panyo mian anu kaya monsangka halata'nyo mo na monjagai ia, susumo mesen anu matangkas ka' mahoson na titikup i kota.

¹²Mian anu takabun saidi mae madi'mo ohalagai, mian anu madi'buulon oholomati.

¹³Montaami padahan ma'isa pe'e ohongo atina' palabuatan anu ponga' ka' madi' ma'ima'.

¹⁴Mongindi da tumuu', mian moko ala montanggung kasansala'an; imadi'mo moko ala mongindi apa-apaa, madi'mo mule' ko apa-apaa anu otaha'imani.

¹⁵Mian anu manonong saja' megot molio ilimuu'; mian anu pande saja' mongindi da mohumpak pangajalan.

¹⁶Palasen aijo mombau jalan ka' molaya' mian mamba hi to mia-mian anu talasanggo.

¹⁷Anu momona motatae i uno nu pongulusan mo palakala saja' otoa totu'u, panyo anu nusisik aijo' o'uji' mo de tokamo na sampo bali'nyo.

¹⁸Tiba ondean, painggagan timbali opoko ala opobelenti ka' mule' pompahasala'an hi bubu' aha mian anu balakuasa suele timbali opoko ala oputusi ima-ima'.

¹⁹Utus anu ingideanmo na kinyonyoa lebemo susa' na mongohani molingkuduimo kota anu mahoson; painggagan sumomo ponsupati tumban daka' nu kota' anu ko bentengnyo.

²⁰Potatae anu otaloakon daagi' ko ka'ahenannyo mae anu tionyo o'oa'i.

²¹Jila' ko kuasanyo momposalamat kantumuu'an kabai mongidei; mian tionyo ahi' montanggung apaa na anu tinaloakonnyomo.

²²Mian anu nohumpakmo bengkele', nohumpakmo kauntungan, bengkele' aijo'mo na balakat lengkat mae hi Tumpu.

²³Mian anu kasiasi de mompoita mompake atulan mian anu kaya de montaami tolosega.

²⁴Daagi' ko sampo bela' anu madi' tulu-tulutan. Daagi' mule' ko anu lebe mompahakona hondo nulingkuduimo utus.