Read Saluan AMSAL 2 Bible Online

AMSAL 2 - Saluan bible

AMSAL 2

¹Otalima na pangajalanku iwi-iwi', o anakku, ka' sabole-bole otutugi' na pokinde'ku iwi-iwi' hi beleyum.

²O intomakon apaa na kapandean bapikin ka' o usahakon da osumbu'.

³O anakku, o usahakon da ko pikilan anu matajom ka' opoita da timbali moko ala mangalati'.

⁴Olio na aijo' susumo molio mosoni', ka'ololoi' na aijo' susumo mololoi' halata' anu sulu-suluk.

⁵Tiba jalan anu sumo aijo' nusumbu'je nu beleyum apaa na alati'nyo mabuhuk hi Tumpu ka' beleyum mohumpakje ilimu' ihe na Tumpu Allah aijo'.

⁶Tumpu Allah na mombee'i kapandean bapikin; lengkat mae hi Ia na pohumpakan nu manusia ilimu' ka' timbali moko ala mangalati'.

⁷Kona hi mian anu hodi' na kinyonyoa-Nyo ka' anu madi' ko kasala'annyo, Nu tulungiakon ka' Nu jagai.

⁸Tumpu monjagai to mia-mian anu saja' adin, ka' monjagai aha anu mongka'ima'i Ia.

⁹De beleyum montuluti aku, o anakku, nusumbu'je nu beleyum apaa na aijo' adin, hodi' na kinyonyoa, ka' ma'ima'. Beleyum suele monsumbu'je mosia na beleyum mongatun kantumuu'an.

¹⁰Beleyum timbalimo pande ka' ilimu' nu beleyum momposanangmo kinyonyoa nu beleyum.

¹¹Mangalati' ka' kapandean nu beleyum na monjagai beleyum,

¹²ka' montewa' beleyum da boli montiho kantumuu'an anu madi' ma'ima' ka' mule' mompojo'on butong nu beleyum da madi' nulelei nu to mia-mian anu saja' monsisik anu ma'idek.

¹³Aha madi'mo mongka' oho' montiho kantumuu'an anu ma'ima'; aha nongalamo jalan anu pintung ka' kahomo dosa'.

¹⁴Palabuatan anu ma'idek aijo'mo na pohumpakan nu aha kasanangan.

¹⁵Kinyonyoa nu aha tageo' ka' kantumuu'an nu aha madi' adin.

¹⁶Beleyum, o anakku, timbalimo monggagakon de pagalamo nu sale'i nu to bou-boune anu saja'mo masala', anu mongusahakonmo da monggoda beleyum nu potatae anu toto ima-ima'.

¹⁷Boune aijo' madi' tulu-tulutan hi langkai'nyo ka' nongkolilimimo anu jinanji'nyomo hi Tumpu Allah.

¹⁸De beleyum mamba i laigannyo aijo' alati'nyo beleyum mongahopimo kasilaka'an. Mamba mokiijo pokakanamo mamba i dunia nu mian anu sinilakamo.

¹⁹Mian anu nambamo hi ia, madi'mo toho' ko anu ninsusule' mae i jalan anu mompanjolongi kantumuu'an.

²⁰Kalana aijo', o anakku, batukimo na sonto' nu mian anu talakana', ka' tumuu'mo mombatuki pongka'oho' nu Tumpu Allah.

²¹Kalana, mian anu tumuu' mombatuki pongka'oho' nu Tumpu Allah, aijo'mo na mian anu hodi' na kinyonyoanyo, ahamo na anu jojoong i lipu' anu jinanji'mo nu Tumpu.

²²Panyo mian anu ma'idek na kinyonyoanyo ka' anu baladosa' nu alinmo nu Tumpu Allah i sambiha'nyo nu lipu' aijo', susumo hemput anu ogautmo i tano'.