Read Saluan AMSAL 20 Bible Online

AMSAL 20 - Saluan bible

AMSAL 20

¹Inumon anu moko palangu mombau mian madi'mo mingadat ka' lewa'mo hengge'. Ponga' ahi' na mian anu monginum sampemo malangu.

²Tambuha' nu tomundo' sumomo polohu' nu singa, mian anu monsaduakon da ia motambuha' alati'nyo monsilakai posi butongnyo.

³Ola ahi' mian anu ponga' na mongka'ima'i mahanggaga; kalakuan anu o puji' aitumo mongawahi pahanggagan.

⁴Anu topo bau ale' anu moluluk madi' mokalaja ale'nyo de tokamo na lonunyo ahennyo de tempo'mo nu pompadakan ale'nyo madi' ko hasinnyo apa-apaa.

⁵Apaa na anu i kinyonyoa nu mian lapangnyomo uee nu bubung anu maleeng; panyo timbali nu tauk nu mian anu mangalati'.

⁶Manjoo' na mian anu mangaku butongnyo salaku sangalu panyo anu totu-totu'u tulu-tulutan, mahan na okabot.

⁷To ana-anak untung hondo de ko tuumanyo anu manonong ka' kantumuu'annyo madi' tageo' na kinyonyoa.

⁸De tomundo sumuhangmo i kulusi pomputusian palakala, nu toa iwi-iwi' na anu ma'idek na kinyonyoanyo.

⁹Daagi' ko mian, anu moko ala motatae “Kinyonyoangku belesi, aku madi'mo binala dosa'?”

¹⁰Pontimbang ka' pongukun anu mongakali madi' nuka'ima'i nu Tumpu.

¹¹Palabuatan nu anak timbali osumbu' pa' kalakuannyo ma'ima' ka' madi' tageo'.

¹²Bihing bau pohongo ka' mata bau pontoa ohu-ohua' aijo' Tumpu na nompo timbali.

¹³Mian anu ola mongka'ima'i hoyot timbali kasiasi. Mian anu makeke na mokalaja ko kaanon manjoo'.

¹⁴Anu mongoli saja' motusa' kalana halaga'nyo mahan. Panyo salatan ingolinyomo sanangmo na ia ihalaganyo nu balang anu ihumpaknyomo aijo'.

¹⁵Potatae anu ko isinyo ilimu', lebe ko halaga'nyo molingkudui' mosoni' tiba intan.

¹⁶Ihe na mongka'oho' montanggungi samaya' nu mian sangga'at, timbali o'ala na halata'nyo salaku bau ponggadei anu jinanji'nyomo.

¹⁷Halata' anu ihumpak ola kalana nongakali, momonanyo matami'na o'oa'i panyo ahennyo mae o'oa'i sumomo bone'.

¹⁸Tanga'an ko hasinnyo kalana pinopikilakon mo; kalana aijo' boli pe'e mombau apa-apaa de madi' opopikilakon pe'e ma'i-ma'ima'.

¹⁹Mian anu sanang lewa' monsisik mian sangga'at, madi' moko ala monguna' lahasia; boli mogandi-gandi tiba mian anu ola' manjoo na potatae.

²⁰Mian anu montotobi'akon tu'anyonyo, kantumuu'annyo madi'tuusan, sumomo sulu' anu mompoho' mo i pihi anu pinikatmo.

²¹Halata' anu monanyo sampa i humpak lia-lia' ahennyo taalu' misa' balakat.

²²Boli mombalosi ka'idekan tiba ka'idekan palesaya na Tumpu, Ia na anu montulungije.

²³Timbangan ka' batu timbangan anu madi' totu'u madi' nu talima nu Tumpu.

²⁴Noko tantukanmo nu Tumpu na jalan kantumuu'an nu manusia i dunia aiya; mokonyo aijo' mausia madi' moko ala monsumbu' jalan nu kantumuu'annyo.

²⁵Maisa pe'e monjanji monsombahkon koloban hi Tumpu opikin mo ahi ima'-ima'. Da boli beleyum mompele-pele' imihinyo mae.

²⁶Tomundo anu pande monsumbu' ihe na mian anu ma'idek nakinyonyoanyo; ia mohukumje aha madi' ko ampunnyo.

²⁷Kinyonyoa nu manusia sumomo jingka anu lengkat mae hi Tumpu. Anu monjingkai songko-songko na kinyonyoa.

²⁸De Tomundo mompalentah nu kinyonyoa anu moliboa, hodi ka' adin, saba' ia tataap balakuasa.

²⁹Mian anu daagi' olitau o'akui kalana kahosonannyo, ka' mian anu tu'anyomo o'angga'i kalana uanonmo.

³⁰Toto minsan kasusa'an anu o'oa'i mongalini palabuatan anu ma'idek, ka' mompobelesi' kinyonyoa nu manusia.