Read Saluan AMSAL 21 Bible Online

AMSAL 21 - Saluan bible

AMSAL 21

¹Pokakana susumo Tumpu nongatun uee nukaunyo da mo'ili, montuluti pongka'oho'Nyo, sumo aitu mule' na la mongatun pikilan nu tomundo.

²Batu-batu palabuatan nu mian, de ia na mosi oa'i tantu koonyo aijo' maima', panyo Tumpu na anu monsumbu' isi nu kinyonyoanyo.

³Palabuatan anu adin ka' totu'u lebe momposanang Tumpu molingkudui iwi-iwi' na anu opalasombahkon.

⁴Mian anu ma'idek na kinyonyoanyo aijo' baladosa', kalana nukuasaimo nu takabun ka kobubuun.

⁵Tanga'an nu mian anu makeke mongahenakon molabi-labi; usaha anu ko sia-sia' monsaduakon da madi' kokasukupannyo.

⁶Kakaya'an anu i humpak kalana katageo'an nu kinyonyoa malia' hondo molapus ka' momboa mian i bolo' nu kubun.

⁷Mian anu ma'idek na kinyonyoa madi' mongka'oho' montuluti atulan; ia sakisa kalana posi kabuhingisannyo na monsakisa.

⁸Mian anu ko sala'nyo, ia lumajang minggeo-geo' mian anu manonong saja madi tageo' na kantumuu'annyo.

⁹Jojoong i pasu'nyo nu loteng lebe sanang; ka'de mule' jojoong hingga-hinggat isa'angu' nalaigan tiba bengkele' anu mongka'ima'i painggaga.

¹⁰Mian anu ma'idek na kinyonyoanyo saja' mongka'ima'i mombau palabuatan ma'idek maumo pa' hi he madi' ko kalibosannyo na ia.

¹¹Hukuman ko na hi mian anu lewa' mombusiki sanggo nu mian timbali bau pangajalan hi mian anu madi' ko anu nu pisumbu-sumbu'. De mian anu manonong opokinde'i, ia mompaka pandemo.

¹²Tumpu Allah Anu Talalo hondo adin monsumbu' apaa na anu jinadimo i laigan nu anu palaganta. Ia na montua aha sahingga aha silakamo.

¹³Ihe na madi' mongka'oho' mohongo tusa' nu mian anu kinaku langanmo madi' opolahatikan de ia na momoita tulung.

¹⁴Da bau pompoho'i pusa ka' tambuha', bee'imo palasen hoko-hokot.

¹⁵De ka'adilan opojalan saba' mian anu manonong mongoa'imo sanang, panyo mian anu ma'idek na kinyonyoanyo na mabuhukmo ahi'.

¹⁶Mian anu madi' mombatuki mosia na kantumuu'an nu mian anu manonong, tantu saidi mae tokamo i dunia nu mian anu sinilakamo.

¹⁷Mian anu mongka'ima'i ola bala sanang, saidi mae tataap kakulangan; mian anu mongka'ima'i ola molewa-lewa' madi' koko jadi kaya.

¹⁸De mian da'isan nu hukum nu Tumpu, misa' mian anu manonong, panyo mian anu ma'idek na kinyonyoanyo na mohumpak kasusa'an.

¹⁹Lebe ma'ima'jojoong i tano anu mateges ka'de mule' jojoong tiba bengkele' anu ola saja' motawewe ka' lewa' motambuha'.

²⁰Mian anu pande tataap tumuu' bilahi ka' molabi panyo mian anu ponga' ola lewa' mombeasakon halata'nyo.

²¹Ihe na balausaha da ka'adilan ka' mompaha kali-kalibosi obau, saidi mae mohumpak kantumuu'amu bilahi, kaholomatan, ka' mantan na umun.

²²Mian anu pande na monggoliliakon moko ala mompatundu kota' anu nu jagai nu suludadu anu baani hondo, nu hobo'akon na to bente-benteng anu nutakabunakon nu aha.

²³Da boli nu tokai mae nu kasusa'an, tionyo ahi' obala'ingati na anu otaeakon.

²⁴Mian anu kobubuun ka' talalo hondo matangkas na kinyonyoa mongka'ima'i mongalu ka' madi' ko adatnyo.

²⁵Anu moluluk madi mongka'oho' mokalaja; nu posi patei na butongnyo nu hahan anu nukamilui.

²⁶Sansinaa-sinaa ia ola ahi' mompopikilakon mongkona apaa na anu nuka milui. Pada han mian anu madi' tageo' nakinyonyoanyo moko ala mombee'i molabi-labi.

²⁷Tumpu madi' sanang i palasombahan nu mian anu palaganta lebe-lebe mule, de monsombahkon aijo ko makisud ma'idek.

²⁸Katalangan nu anu baleko' madi'timbali opalesaya; panyo katalangan nu mian anu monsumbu' bau-baunyo nu palakala, timbali otalima.

²⁹Mian anu madi' tageo' na kinyonyoanyo nu palesaya totu-totu'u na butongnyo; mian anu ma'idek na kinyonyoanyo madi' mosumbu' ma'ambang.

³⁰Madi' ko kapandean, ilimu', kabai kapandean mompopikilakon anu moko ala balatahan i ahop nu Tumpu.

³¹Maumo i pahampatean oposukup nu ajahan na posadiaon bau pahampate, anu montantukan ka'untungan mahampate ola ahi' samata-mata Tumpu.