Read Saluan AMSAL 22 Bible Online

AMSAL 22 - Saluan bible

AMSAL 22

¹Mian anu madi' ko palabuatan maidek lebe ko angga'nyo nulingkudui na halata' anu manjoo'; nu kalibosi nu mian lebe ma'ima' nulingkudui naobee'i salaka' tiba mosoni'.

²Mian kaya ka' mian anu kasiasi daagi ko sa'angu' na han anu pokakana: Tumpu na anu nompotimbali aha iwi-iwi'.

³Mian anu pande mongawahi de montoa mo anu monsilakai mian anu ponga' lumajang lau-laus lantas nukonamo nu balaa'.

⁴Mian anu tulu-tulutan hi Tumpu ka' madi' buulon, saidi mae mohumpak kabilahian, ka' oholomati.

⁵Pohakop ka' pontua daagi hijalan nu mian anu geguan, patijoko'oni iwi-iwi' aijo' de beleyum mongka'oho' da salamat.

⁶Pangajali na samian na anak ijala-jalan nu kantumuu'an anu patut hi ia; sahingga de toka'mo na tempo'nyo de ia langkai'mo kabai bengkele'mo kantu-kantumuu'annyo montulutimo sumo aijo.

⁷Mian anu kasiasi nu kuasai nu mian anu kaya; mian anu monsabon nukuasai numian anu momposabonakon.

⁸Mian anu motugan kageguanan mompadak hasinnyo balaa', ahennyo kuasanyo kahanda' buhingison saidi mae lanyapmo.

⁹Mian anu manonong nu balakati nu Tumpu kalana Ia mombee'i dale' hi mian anu madi' ko apa-apaanyo.

¹⁰Laa' na mian anu kahanda' mongambangi sahingga belentimo na painggagan, po'ualian ka' paingalu-aluan.

¹¹Mian anu mongka'ima'i kinyonyoa anu madi' tageo' ka' madi kasan na potataenyo, timbali bau sangalu nu tomundo.

¹²Momponyata kabaleko'an nu mian anu geguan, nu halagai nu Tumpu da ilimu' anu totu'u tataap ma'ima'.

¹³Anu moluluk mongka'ima'i jojoong i laigan; ia notatae, “Daagi' ko singa i sambiha'nyo, aku nu sa'umo i tonga' nu jalan.”

¹⁴Ponsale'i nu mian anu lewa' masala' sumomo bau mohakop; mian anu nu tambuha'i nu Tumpu nanabu'mo i unonyo.

¹⁵Pantasnyomo na to ana-anak mombau hahan anu madi' totu'u, panyo pondoke moko ala mongajan aha da obabali'i na kalakuan.

¹⁶Ihe na mongka'oho' timbali kaya, tiba jalan monsansala mian anu kasiasi ka' mombee'i palasen hi mian anu kaya, imihinyo mae timbalimo kasiasi hondo.

¹⁷Potombihing mae aku mongajanakonmo hi beleyum pokinde nu mian anu pande na bapkin. Palahatikan na pangajalanku.

¹⁸Beleyum saidi mae sanang de pangajalanku aijo' nu una' i kinyonyoa nu beleyum. Kalana tiba jalan anu sumo aijo' beleyum sinadiamo de beleyum ka'oho'mo mompake.

¹⁹Aku mongajanakon mo hi beleyum uuka aiya kalana aku mongka'oho da beleyum palesaya' mo hi Tumpu.

²⁰Tolumpulu' na pokinde' noko tuliskumo obee' hi beleyum, to poki-pokinde' anu ko ilimu'nyo ka' pokinde' anu ma'ima';

²¹ka' mian anu mongajanakon hi beleyum apaa na anu totu-totu'u madi' sala'. Saidi' mae, de beleyum opokilawa, beleyum timbali montaami potaam anu madi sala'.

²²Boli mompolugi' mian anu kasiasi, ola kalana ia madi' mahoson ka' i pomputusian palakala boli mongagoi anu nu mian anu madi' moko ala mombau apa-apaa.

²³Kalana, Tumpu na monsangaja'i palakala nu aha ka' mongala napas nu mian anu mombee'i kasansala'an aha.

²⁴Bolimo mosangalu tiba mian anu mongka'ima'i pusa ka' sampa pusa.

²⁵Dumo beleyum montiho ia, ka' madi' mo timbali mule' montibahakon kabiasa'an aijo'.

²⁶Bolimo balajanji' montanggungi samaya' nu mian sangga'at.

²⁷Saidi mae de beleyum madi'mo moko ala mombayali, kamale'an nu beleyum nu ala mo nu aha.

²⁸Boli hondo-hondo molalin tempas nu tano' anu noko potataapmo nu mompolee' miu.

²⁹Toho'mo beleyum nontoa mian anu pande na mombau pakalaja'annyo? Mian aijo' opokalajamo i jojoongan nu to tomu-tomundo, misa'mo ola i laigan nu mian biasa.