Read Saluan AMSAL 27 Bible Online

AMSAL 27 - Saluan bible

AMSAL 27

¹ Boli lewa' monsisik anu madi' totu'u mongkona sina dodop, kalana madi' nu sumbu' pa' apaa na anu jadi saidi' mae.

²Boli mosi puji' posi butong; nu beleyum pojohok mian sangga'at je na mombau han anu sumo aijo', ka' mule' mian anu madi' nu sumbu'.

³Batu tiba bone' aijo' daagi' laing, de opokakanakon tiba sakit nu kinyonyoa anu pinontambuninyo mae anu ponga'.

⁴Tambuha' aijo' buhingison hondo ka mohansuni, panyo mongahopi mian minsihip ihe na moko tahan?

⁵Lebe ma'ima' pokinde' anu nyata-nyata' nulingkudui na kalibosan anu madi' olubatakon.

⁶Sangulu mondoke da bau kaima'an, panyo sampo bali' montagogoli nu anu moko silaka.

⁷De mobosu, juu' pe'e madi' o'ala de mo'ohop, anu mapakat pe'e o'oa'i matami'mo.

⁸Mian anu mompala'imo laigannyo, sumomo tomonsi' mompala'imo petanyo.

⁹Susumo minya-minya' anu manohong ka' anu to noho-nohong moposanang kinyonyoa, sumo aitu mule' na kanonongan nu sangalu mompolumu santuu'.

¹⁰Boli okolilimi na sangalu nu beleyum kabai sangalu nu tuuma nu beleyum. I uno nu kasusa'an boli momoita tulung hi utus nu beleyum anu mompaha ohani laigan na lebe kogunanyo nulingkudui na utus anu majo'on.

¹¹O anaku tionyo ahi beleyum pande, da aku sanang ka' timbali mule' montaami de ko anu mongka'ideki.

¹²Mian anu pande mongawahi de montoa balaa' mian anu ponga' lumajang lau-laus lantas nu konamo nu balaa'.

¹³Ihe na mongka'oho' montanggunggi samaya' nu mian sangga'at, o'ala na anu daagi hi ia salaku bau ponggadai palajanjiannyo.

¹⁴Ihe na daagi subu-subu montaeakonmo tabea' hi sangalunyo nu potatae anu talalo daka'; osangka nontaeakonmo pontotobi'akon.

¹⁵Bengkele' anu mongka'ima'i painggaga; sumomo buhok nu ujan anu tinudun mae sinansinaa.

¹⁶Madi' jadi na ia otewa' momohokot; sumomo mombuun madi'opoko ala otahan, ka' lanya' madi' opoko ala okongkomi.

¹⁷Susumo aja' monjatajomi aja'; sumo aitumo na manusia balagulu' hi sangalunyo.

¹⁸Ihe na mongkalesang kau' saidi 'mae mongkaan bua'nyo, Posaihon ohalagai de monsumbu' mongala kinyonyoa nu tuannyo.

¹⁹Susumo uee mompotoa lolung nu ohup nu beleyum; sumo atina'mo mule' na kinyonyoa nu beleyum mompoto'i butong nu beleyum.

²⁰I dunia nu mian anu sinilakamo saja' daagi ko tampat; sumo aitu mule' na anu nu indi nu manusia madi' ko batasnyo.

²¹Mosoni' tiba salaka o uji' i ponsuangannyo; mian osumbu' ikolangka-langkasnyo mosia de ia opuji'mo.

²²Mau pe'e odoke hoso-hoson na mian anu ponga'; madi' mingkot na kaponga'annyo.

²³Palakai ima-ima' na potuu'on nu beleyum;

²⁴kalana kakaya'an madi' sampe toka sidu-sidutu'; ka' mule' kuasa mompalentah madi' tataap sampe toka sidu-sidutu'.

²⁵Hemput i ale' tiba i bungkutnyo olepas ka' olimu' bau pompakan potuu'on nu beleyum aijo' panyo hau-haunyo aijo' po ule' mule' tumuu' na hemput sangga'at.

²⁶I bulu nu to domba-domba nu beleyum na bau pohumpakan pakean nu beleyum ka' sambagian na oli nu to domba-domba nu beleyum na timbali bau pongoli nu beleyum tano' anu salaje ihumpak.

²⁷Aijo' hi iwi-iwi' na mee' nu beleyum sangga'at na pohumpakan nu beleyum susu anu nu inum nu beleyum tiba belemiu salaigan ka' mule' to posa-posaihon nu beleyum.