Read Saluan AMSAL 28 Bible Online

AMSAL 28 - Saluan bible

AMSAL 28

¹Mian anu ma'idek na kinyonyoanyo mopadeka' maumo madi' ko anu mololoi, panyo mian anu hodi' na kinyonyoa, na baani ahi' susumo singa.

²De bansa baladosa', pamalentahnyo mobolo-bolos de polaya'nyo pande, bansanyo tataap balatahan ka' tataap talasanggo.

³Anu balakuasa momposansala mian anu kasiasi, sumomo ujan daka' anu mongidei mo anu opadakmo.

⁴Ihe na madi' montoongi atulan mosambiha' hi mian anu ma'idek na kinyonyoanyo, ihe na montuluti atulan mongewa mian anu palaganta.

⁵Ka'adilan madi' nu sumbu' nu mian palaganta, panyo mian anu monsombah Tumpu, totu-totu'u monsumbu' ka'adilan.

⁶Sahanyo mian kasiasi anu madi tageo' na kinyonyoanyo, ka'de mule' mian anu kaya anu madi' adin.

⁷Olitau ka' langkoyang anu montuluti atulan atina'mo na mian anu pande. Panyo mian anu mosangalu tiba mian anu loyan na balanja mongambangi tuumanyo.

⁸Ihe na kinayamo kalana mongala bunganyo ka' talalo ahi' mongkekedi da ka'untungan, manjoo' kakaya'annyo aijo' saidi mae manabu' hi mian anu kokalibosan ka' hi mian anu kasiasi.

⁹De beleyum madi' montuluti atulan nu Tumpu Allah, Tumpu Allah suele mongoa'i monguahi na mohongo do'a nu beleyum.

¹⁰Ihe na pagala monsale'i mian anu madi' tageo' na kinyonyoanyo da mombau anu ma'idek, ia saidi mae minsoop mo i uno nu so'o. Mian anu belesi' na kinyonyoanyo saidi mae obalakati, sahingga mohumpakmo kantumuu'an ma'ima'.

¹¹Mian anu kaya saja' mongoa'i butongnyo pande, panyo mian kasiasi anu manonong nusumbu' ihe sabenanyo na ia.

¹²De mian anu manonong na balakuasa, iwi-iwi' na mian mongoa'i ka'sanangan, de mian anu ma'idek na kinyonyoanyo na mompalentah, mian da'isan matisulukmo.

¹³Ihe na momposuluk dosa'nyo, madi' mohumpak kauntungan. Ihe na mongakui ka' madi'mo mombau, saidi mae nukalibosimo nu Tumpu.

¹⁴Saja' oholomati na Tumpu, sahinga beleyum saidi mae mohumpakje kabilahian iuno nu kantumuu'an. De beleyum panggaga hi Ia, beleyum mohumpakmo kasilaka'an.

¹⁵Mian anu ma'idek na kinyonyoanyo mongkuasai mian anu madi' ko apa-apaanyo. Sumomo singa anu molohu'mo kabai beruang anu mololoi'mo.

¹⁶Anu balakuasa monsansalai mian sangga'at madi' ko pikilan anu ma'ima'; anu balakuasa mongkaddeki anu madi'adin mompalentah motau-taun.

¹⁷Samian na anu saja' mompatei mian, saja' nu oa'i ololoi' sampe ia silaka, madi' ko samian pe'e na moko ala montahan ia.

¹⁸Mian anu tumuu' madi' ko anu o'pisala'i kantumuu'annyo saidi mae ia salamat. Mian anu minggeo-geo' na kantumuu'annyo, saidi mae mohumpak balaa'.

¹⁹Topo ale' anu mokalaja makeke anu nukaan sukup; mian anu ola mongide-idei sinaa pokalaja'an saidi mae mongoa'i kakulangan.

²⁰Mian anu madi' tageo' na kinyonyoanyo nubalakati nu Tumpu, panyo mian anu kahanda' da malia' kaya, madi' nupala'i nu hukuman.

²¹Madi' ma'ima' na mombeda-bedakon samian ka'samian, panyo daagi'je mule' ahi ko mian kopian anu ka'oho' madi' adin ola kalana da mohumpak doi sangkiding.

²²Mian anu mangoa mongka'oho' da malia' kaya; madi' nusumbu' saba' kasiasi malia'mo montokai ia.

²³Mian anu mombee'i pokinde ahennyo lebe o'angga'i nulingkudui na mian anu ola saja' mompuji-puji'.

²⁴Ihe na buling hi tu'anyonyo ka' monsangka aijo' misa' dosa', pokakana mo tiba anu lewa' mombuling sangga'at.

²⁵Lebe mompentingkan posi butong, monsaduakon painggagan, beleyum lebe untung de palesaya hi Tumpu.

²⁶Ihe na mosi akui pongka'oho'nyo, madi' ko pikilan ma'ima', Ihe na mombatuki ajalan nu mian anu pande saidi mae salamat.

²⁷Ihe na mombe'i mian anu kasiasi, ia madi' kakulangan. Ihe na ola mompojohok kapalaluan nu mian anu kasiasi, nukona nu kutuk.

²⁸De mian anu ma'idek na kinyonyoanyo balakuasa, mian da'isan matisuluk; de mian anu ma'idek na kinyonyoanyo silaka; mian anu adin timbali bebas na mompalentah.