Read Saluan AMSAL 30 Bible Online

AMSAL 30 - Saluan bible

AMSAL 30

¹Aiyamo na anu lewa' pinoto'i i Agur anak i Yake lengkat mae i masa: “Aku kinainmo, o Tumpu, aku kinainmo! Ningkotmo na hosonku!

²Pinonga'mo na aku susumo binatang; madi'mo ko anu opi sumbu-sumbu.

³Madi' toho' ginulu'anku na kapandean bapikin, sangkiding pe'e madi' ko anu ku sumbu' na Tumpu.

⁴Iya na manusia anu toho'mo noliba' ka' nintatau' mae lengkat isuluga? Pa' toho'mo ia nongkongkomi mombun i uno nu limanyo ka' molupi' uee i uno nu baju'nyo, kabai nompotataap mo bata-batas nu dunia? Ihe na ia, ka' ihe na anaknyo? Tantu nusumbu' nu beleyum!

⁵Iwi-iwi na palajanjian-Nyo tataap oganapi. Ia sumomo kanta da molindungi sinin na anu toka mae.

⁶De beleyum montuangi apaa na anu tinaloakon-Nyomo, saba' Nu tewa'mo na beleyum ka' Nu poto'imo saba' beleyum baleko.”

⁷“O Tumpu Allah, ku poita da ma'isa pe'e aku silaka, bee'mo mae hi belengku ohua' na han aiya.

⁸Da boli sampe aku montaeakon potatae anu madi' adin ka' baleko', ka' boli opojohok na aku kasiasi kabai kaya. Ola anu ku palalui na bee'mae hi belengku.

⁹Kalana bisuannyo aku kaya, ugaat aku motataemo, aku madi' mompalalui Beleyum. Ka' de aku kasiasi, ugaat aku bulingmo sahingga mombusikimo sanggo nu Belento.”

¹⁰Boli mompitana' samian na posaihon hi tuannyo, dumo beleyum nu kutuki ka' osangka sala'.

¹¹Daagi' ko mian anu montotobi'akon tuumanyo; ka' madi' moholomati tinanyo.

¹²Daagi' ko mian anu mongoa'i butongnyo susi' padahan ia mahumimi' hondo.

¹³Daagi' ko mian anu mongoa'i butongnyo talalo hondo manonong memang talalo hondo manonong!

¹⁴Daagi' ko mian anu molio Kaanon nu jalan anu talalo buhingison, aha talalo hondo buhingison ka' molio ka'untungan hi mian kasiasi ka' hi mian anu madi' moko ala mombau apa-apaa.

¹⁵Dandango nu katano'an ko anaknyo ohua'; ua-ua'aha aijo' sanggonyo “Bau bagingku!” Daagi' ko opat na han anu madi' toho' ma'osa;

¹⁶dunia nu mian anu sinilakamo boune anu ma'isa toho' nohampeakon, tano' mapeges anu mongindimo ujan, ka' apu anu mokaan mo iyaya mae.

¹⁷Mian anu lewa' mongalu tuumanyo kabai tinanyo anu i langkai'mo ka' binengkele'mo, pantasmo ahi' na o'alin i sambiha'nyo da matanyo nu tungkugi nu papaa' ka' bangke'nyo nu kaanmo nu bonyia'.

¹⁸Opat na han na anu talalo susa' hondo na ku pangalati'i:

¹⁹bonyia anu lewa' lumahap aita ilanga, ulo anu jumolo i batu gahanggan, kapan anu talabut i totonga' nu ndalangon ua aha namian olitau ka' langkoyang anu hau-haunyo bakusinta.

²⁰Sumo uuka na bau-baunyo nu samian na boune anu madi' tulu-tulutan hi langkai'nyo; moko lapas na masala', ia nongkaanmo lantas mongambu'i mo nganga'nyo, lantas motatae mo, “Aku madi' nombau apa-apaa!”

²¹Daagi' ko opat na han anu susa' hondo na otalima i songko-songko na dunia.

²²Samian na posaihon tinimbalimo tomundo, samian na anu ponga' nohumpakmo iwi-iwi' na anu nu kamilui,

²³samian na boune no'osoa mo padahan madi' nu ka'ima'i nu mian, samian na posaihon boune nongagoi mo hak nu nyonyanyo.

²⁴I dunia aiya daagi' ko opat na ngahan nu binatang anu talalo ise', panyo pande hondo, aijo'mo:

²⁵Som, binatang anu madi' mahoson, panyo momposadia kaanonnyo i tempo' nu posinaa.

²⁶Pelanduk, binatang anu madi' mahoson, panyo mombau jojoongannyo i bungkutnyo anu batuon.

²⁷Kihi-kihi', binatang anu madi' ko tomundo'nyo, panyo aha ta'atun hondo na mojiji'.

²⁸Totos, binatang anu opoko ala o hakop nu lima, panyo daagi i ilaigan nu tomundo.

²⁹Opat na han na anu saja' o'inau de opalahatikan na bau-baunyo ia lumajang, aijo'mo;

³⁰Singa binatang anu talalo hondo mahoson hi iwi-iwi' na binatang ka' madi mabuhuk maumo pa' apaa na itina',

³¹mee' lakinyo, manuk lakinyo anu lumajang madi' matiduku na ubaknyo. Ka' itomundo'i ahop nu layatnyo.

³²De ola kalana kaponga'an nu beleyum sahingga takabun mo na beleyum, montanga'i palakala-palakala anu ma'idek, jaga!

³³Kalana de beleyum mongkula susu, beleyum mohumpakmo mantega. De beleyum monjagun suung nu mian baso' batipuhamo. De beleyum monsaduakon da pusa na mian, beleyum suele pokakanamo anu pinainggagamo.