Read Saluan AMSAL 6 Bible Online

AMSAL 6 - Saluan bible

AMSAL 6

¹O ana-anaku, pa' beleyum toho'mo binalajanji' hi sala' samian da montanggungimo samaya'nyo.

²Pa' ugaat tinompolausmo na potatae nu beleyum ka' tinompolausmo kalana nonjanji'mo na beleyum.

³De totu-totu'umo sumo aijo' o anaku beleyum kinuasanmo nu mian aijo'. Panyo sumo uuka na obau da beleyum madi'mo otuntut; palia-lia' mamba hi mian aijo' sampa pagala opoita da ia madi'mo montuntut hi beleyum.

⁴Bolimo pe'e mamba hoyot ka' bolimo pe'e mingkain.

⁵Lapasakon na butong nu beleyum i so'o aijo' susumo tomonsi' kabai kijang anu nolapasmo hi topo bebas.

⁶Mian anu moluluk tionyo ahi' montoa pa' mosia na soom tumuu' ka' balagulu' hi ia.

⁷Soom madi' ko anu mongatun, madi' ko anu mongkuasai kabai ko anu mongawasi.

⁸Panyo tempo'nyo nu pompadakan aha mompo unamo anu okaan da okaan nu aha de tempo'mo nu kakulangan.

⁹Hipian nakopinnyo na mian anu moluluk daagi saja' hoyot? Hipian na ia mongka oho'mo mobula?

¹⁰ Ia milawe suha-suhang ka' momposolung limanyo ka' motatae, “Ah, aku ihoyot ola sinasaingoni', ka' aku natatundu'mo.”

¹¹Panyo hau-haunyo ia hoyo-hoyot tinokanmo mae nu kakulangan ka' kasiasi suele tinokamo mae susumo anu mombuling ko toongonnyo anu bau pompatei.

¹²Mian anu ma'idek na kinyonyoanyo tiba mian anu madi' ko adatnyo iyayamae na tampat ia saja' baleko'.

¹³Matanyo maha kinta'an salaku bau tanda da moleko'imo.

¹⁴Kinyonyoanyo anu mabusik kahomo tanga'an anu ma'idek ka' monsaduakonmo pahantuda'an iyaya mae.

¹⁵Iwi-iwi' aijo' monsaduakonmo kasilaka'an anu monti-montiik mongkonamo butongnyo, ka' ia hansunmo totu-totu'u.

¹⁶Popitu' na han na anu nu ka'ideki nu Tumpu ka' madi' timbali Nupojohok. Palabuatan anu buulon, nganga' anu baleko' lima anu mompatei mian anu madi' kosala'nyo, pikilan anu montanga'i hahan anu ma'idek, tengke anu kosia-sia' mamba ipalabuatan anu ma'idek, sakisi anu sabole-bole saja' baleko' ka' mian anu saja' monsaduakon pahantuda'an hi bubu' sangalu.

²⁰O anaku obau apaa na anu pinalentahkonmo nu tuuma nu beleyum ka' boli okolilimi na to poki-pokinde' nu tina nu beleyum.

²¹Saja' o inau' ka' boli okolilimi na potatae nu aha ka' o una' ikinyonyoa nu beleyum.

²²Pangajalan nu aha iwi-iwi' timbali molaya' beleyum de mamba moyaya, monjagai beleyum de pihimo ka' mombee'i pangajalan hi beleyum de beleyum mobulamo.

²³Sinin na pangajalan nu tu'anyo nu beleyum sumomo sulu' anu majingka; pokinde nu aha mompotingaan hi beleyum jalan nu kantumuu'an anu ma'ima'.

²⁴Tiba jalan anu sumo aijo' beleyum majo'onmo hi to bou-boune anu lewa' masala', ka' sisin na potatae nu bengkele' nu mian sangga'at anu kahanda' monggoda.

²⁵Boli beleyum tagoda kalana montoa butong nu aha handa, boli tagoda imata nu aha anu kahanda'mo monsale'i.

²⁶Anu lewa' masala' timbali otamboi nu kaanon sa'angu na lean, panyo masala' tiba bengkele' nu mian sangga'at tionyo ahi' obayan nu nyawa.

²⁷Pa' timbali na mian montangkung apu, ka' madi' mopapu na baju'nyo?

²⁸Pa' timbali na mompeja' oba nu apu ka' madi' mohohut na tengkenyo?

²⁹Aijo' pokakanamo na bahayanyo tiba bakusinta bengkele' nu mian sangga'at. Ihe na mombau sumo aijo' madi'mo luput ihukuman.

³⁰De mian mombuling kaanon, maumo ia mo ohopmo ia o alumo nu mian.

³¹Ka' de ia o hakop ia tionyo ahi' po ule' mombayan pimpitun lipat; kalana aijo' manjoo'mo ahi na halata'nyo mingkot iwi-iwi'.

³²Panyo mosia na mo'ane anu masala'? Ia mosi ideimo posi butongnyo! Talalo ponga' hondo na ia!

³³Ia osakisamo ka' mule' ia o alumo. Sanggonyo tinimbalimo nabusik sampe toka sidu-sidutu'.

³⁴Saba' kalana palabuatannyo aijo', langaki nu boune aijo' minsihipmo, sahingga ia motambuha'mo hondo. Ka' de ia mombalosakon ia madi'mo daagi ko kalibosan.

³⁵Ia madi'mo opoko ala ohase' nu doi; pontamboi mau sumo apaamo na konjoo'nyo madi'mo moko ala mohuhusi tambuha'nyo.