Read Saluan AMSAL 7 Bible Online

AMSAL 7 - Saluan bible

AMSAL 7

¹Sabole-bole otutugi na potataengku, o anaku ka' boli okolilimi apaa na anu ku palentahkon hi beleyum.

²O tutugi na to poki-pokinde' ku da beleyum tumuu' ma'ima'. Obatuki ima-ima' na pangajalanku susumo beleyum monjagai batu numata nu beleyum.

³Sabole-bole otutugi na pangajalanku haha aijo', ka' o una' i uno nu kinyonyoa nu beleyum.

⁴O'anggap ahi na kapandean bapikin susumo utus nu beleyum ka' pangatahuan susumo sangalu anu mompaha kanaya.

⁵Kapandean bapikin mompojo'on bele nu hi boune anu lewa' masala' ka' mule' hi boune anu lewa' monggoda nu potataenyo anu toto mata-matami'.

⁶Daagi kino sansinaan tinoangku lengkat mae itolongan nu laiganku.

⁷Lantas tinoangku manjoo' hondo na to oli-olitau anu ma'isa ko anu nu pisumbu-sumbu'; panyo anu talalo hondo pinalahatikanku aha iwi-iwi' aijo' daagi ko samian anu ponga' hondo.

⁸Tempo'nyo sinaa ohanimo malom gio-gio' pihimo olitau aijo' kino lalajangmo ohani tekuan nu jalan anu mompatui jojoongan nu samian na boune.

¹⁰Boune aijo' te boune anu madi' tataap na jojoong ilaigannyo. Ia saja' toka kiijo' isohipi' nu jalan, lapas mule' mambamo ilapangan kabai tuminjo montanda'i ipopanga'an nu jalan. Kalakuannyo baani ka' madi' monsumbu' ma'ambang. Tinoangku ia nosabatmo mae ka' nipake susumo mian anu lewa' masala' ka' nonsingkabotimo olitau aijo' ka' pande hondo na ia mombee'i sisik.

¹³Ia nontanggogolimo olitau aijo' ka' sinungannyomo. Madi' kino amba-ambangnyo ia notataemo,

¹⁴“Sinaa aiya aku tionyo ahi mombayanmo apaa na anu iniatkumo ka' kalana tanga'an aijo' aku monsombahkonmo kuluban.

¹⁵Mokonyo aijo' aku nosabatmo molio beleyum da beleyum mongkaan ilaiganku. Uuka aiya aku nompahakabotmo tiba beleyum.

¹⁶Kamale'anku ilatasankumo nu hude anu mimbunga-bunga anu lengkat mae i Mesir,

¹⁷ka' pinipi'kumo nu minya-minya' mur, cendana, ka' kayu manis.

¹⁸Uuka aiya imbo' da kita ko bia-biang pe'e da o'oa'i na kasanangan nu bakusinta sampahu uuka.

¹⁹Langkai'ku madi'ko anu ilaigan hau-haunyo ilumambanan anu majo'on.

²⁰Ia nomboa manjoo' hondo na doi, ka' ia ma'isa mae minsusule' i uno nu ohua' na duminggu aiya.”

²¹Sumo aijo'na boune aijo' lewa' monsale'i olitau aijo' ka' lewa' nombujuk sahingga nongka'ohomo na ia.

²²Madi' binapikin na ia balomo lau-laus nombatuki boune aijo' susumo sapi' anu okolotmo ka' susumo mian anu tinalungku'mo oboamo ka' montalimamo hukuman anu pinosadiamo hi mian anu ponga';

²³madi'mo pin hihis nu pana' molampasmo atenyo. Susumo tomonsi' laha-lahap montujuimo so'o, sumo aitumo na olitau aijo' madi' nu sumbu' na butongnyo mohumpakmo kasilaka'an.

²⁴Kalana aijo' to ana-anak potombihing pe'e mae na aku. Palahatikan na to poki-pokinde'ku.

²⁵Boli opojohok na boune anu sumo aijo' anu ola saja' mompagala monggoda kinyonyoa nu beleyum; boli mamba molio ia,

²⁶kalana ia nompateimo manjoo' hondo na to momo'ane. Madi'mo pinoko bilang na konjoo'nyo na anu inatemo kalana ia.

²⁷De mamba ilaigannyo aijo' alati'nyo mongalamo jalan kodo-kodo' da mokiijo'mo ijalan kasilaka'an.