Read Saluan ANU MOMPOLELE POTATAE NU TUMPU 11 Bible Online

ANU MOMPOLELE POTATAE NU TUMPU 11 - Saluan bible

ANU MOMPOLELE POTATAE NU TUMPU 11

¹Balanjakon na doi nu beleyum isa'angu' na usaha kiijo' mae ilipu' anu isantano'an. Beleyum tionyo mohumpak kauntungan imihinyo mae.

²Balanjakon na doi nu beleyum ingangahan nu badagangan; Olio na usaha jonjoo'. Kalana mian palalu saja balajaga-jaga; mau ma'isa pe'e ko balaa' montokai mae.

³Maumo pa' sasu moya na potua'an nu kau' aijo'; tataap ia matitimpas i tano' potu-potua'annyo. De kundom ko ueenyomo ka' manjoo'mo; ujan daka' tudunmo aiya i dunia.

⁴Ihe na montanda'i sampe mombun tiba jingka ma'ima'mo; madi'mo daagi mosu'an sosu'anon ka' madi'mo daagi mongala hasinnyo.

⁵Tumpu na nompotimbali iwi-iwi' anu idunia aiya; ka' manusia madi' monsumbu' apaa na anu binau-Nyomo, sumo aitu mule' ia madi monsumbu' kantumuu'an anu salaje mae jadi i uno nu ma'alum nu samian na totina.

⁶Daagi subu-subu saumo na bine' nu beleyum; ka' boli mingkain mau mule' malomo, kalana madi' osumbu'to iya na anu sinaunto aijo' na anu tinumuu' ma'ima'. Ugaat ahi' ohu-ohua' tinumuu' ma'i-ma'ima'.

⁷Jingka nu sinaa moko bilahi kantumuu'an; ibeh nako sanangnyo de moko ala ahi' mongoa'i.

⁸Tionyo ahi' beleyum montalima kase; de mintuangmo na umun nu beleyum. Panyo o inau' ahi'; maumo beleyum pin na tumuu' i dunia, lebe mule' ahi' pin na tempo'nyo i uno nu dunia kapatean. Jadi apaa na anu daagi otaha imani? Iwi-iwi' palasuma' ka' madi'mo ko gunanyo.

⁹O belemiu to oli-olitau ka' to lalangkoyang, oa'i pe'e na kasanangan de daagi olitau ka' langkoyang! Balame-lame'mo de belemiu hau-haunyo tumimpasje. Baumo iwi-iwi' apaa na anu nu kahanda'i nu nyawa nu belemiu, ka' mule' baumo iwi-iwi' apaa na anu iniatmo nu kinyonyoa nu belemiu. Panyo o inau' ahi' na Tumpu anu kiita i suluga', Ia na momputusi saidi' mae palabuatanto iwi-iwi'.

¹⁰Bolimo daagi bata-bata ka' mongoa'i susa' i uno nu kinyonyoa nu belemiu kalana ka umolitauan tiba kalangkoyangan nu belemiu malia' hondo tombo liu.