Read Saluan ANU MOMPOLELE POTATAE NU TUMPU 12 Bible Online

ANU MOMPOLELE POTATAE NU TUMPU 12 - Saluan bible

ANU MOMPOLELE POTATAE NU TUMPU 12

¹O inau' ahi' na anu Nompotimbalimo belemiu daagi pe'e olitau ka' daagi pe'e lalangkoyang, anu ma'isa pe'e tinoka i taun-taun anu saja'mo sinansala. Tempo'nyo aijo' belemiu notataemo, “Kantumuu'aku madi' nohumpak kabilahian.”

²De tokamo na tempo'nyo aijo' mata nu belemiu madi'mo daagi manasa na montoa, sahingga madi'mo majingka na sinaa, bitu'on tiba mandala'. Kundom tinumatampokmo momboamo mae ujan; tataap mohohungi belemiu sumomo anu mompopobuhuk.

³Botokon nu belemiu ilakatnyomo ka' madi'mo ko anu monjagai mae. Tengke nu belemiu anu mamahoson aijo' tasala'mo ka' madi'mo mahoson. Bese' nu belemiu madi'mo sampa' na bau ponyaing anu okaan. Mata nu belemiu pinahamo sahingga madi'mo manasa na montoa.

⁴Kalame'an i jalan madi'mo manasa na ohongo. Onyi' nu musik tiba onyi' nu ponggilinan madi'mo talalo kahongoan. Belemiu madi'mo tohoyot hondo. Mau ola onyi' nu tomonsi' monsaduakonmo madi' tohoyot na belemiu.

⁵Belemiu mabuhuk na mindako i bungkutnyo anu matangkas; ka' lumajang obala ingati ahi'. Ubak nu beleyum inguanonmo ka' tengke nu beleyum nu hela'mo salatan lumajangmo; sahingga lipunmo na kahanda' tiba anu okamilui. Kita mambamo i tampat kajojoonganto anu imihi-mihinyomo, to mia-mian anu tinokanmo nu kapatean ka' lewa'mo montando'i tutuus jalan.

⁶Lante salaka mobotu'mo ka' mosi tade-tademo; sulu' mosoni' manabu'mo ka' moposo'mo; kahohon anu ponsegoti Pontauk uee mobotu'mo ka' ma'idekmo; kuhon hansunmo ka' motatabumo.

⁷Butongto aiya minsusule'mo; timbalimo abu i dunia aiya. Napas te kantumuu'anto minsusule'mo hi Tumpu. Ia na nombee' salaku pongkalibosi'Nyo.

⁸Aku notatae, memang iwi-iwi' aijo' madi' ko gunanyo, iwi-iwi' ola palasuma madi' ko ala-alati'nyo.

⁹Anu saja' Bapikin aijo' ko ilimu' ka' mule' pande; kalana aijo' ingajanakonnyomo hi aha mian iwi-iwi' na ilimu'nyo. Manjoo' na ibalat ginulu'annyomo; lantas inguji'nyomo na han aijo' pa' totu'u.

¹⁰Ia bala usaha da mohumpak potatae anu mongindeke', ka' potatae anu tinulisnyomo memang madi' tageo'.

¹¹Potatae nu mian anu ko ilimu' aijo' sumomo tokon anu matajom, anu nu toong nu samian na polaya' potuu'on, tokon anu nu pake monjagai dombanyo. Ibalat tiba pokinde' pinosa'angu'; sumomo paku' anu pinaku'akonmo hoso-hoson. Iwi-iwi' aijo' suele anu binee'mo nu Tumpu; polaya'to anu sa'a-sa'angu'nyomo aijo'.

¹²O anaku, sa'angu' na han tionyo ahi' nu bala'ingati. Montulisi kitab madi' ko ka ahenannyo; ka' de saja'mo balajan, malawemo na nyawa tiba butong aiya.

¹³Salatan iwi-iwi' pinotutugakonkumo; aiyamo na kasingkatannyo nu anu ihumpaku. Kabuhuk na Tumpu ka' otuluti na palentah-Nyo iwi-iwi'. Kalana makisud aijo' sahingga manusia pinotimbali-Nyomo.

¹⁴Tumpu na saidi' mae momputusi iwi-iwi na palabuatanto, anu ma'ima' tiba anu ma'idek, ka' mule' anu sulu-suluk.