Read Saluan ANU MOMPOLELE POTATAE NU TUMPU 2 Bible Online

ANU MOMPOLELE POTATAE NU TUMPU 2 - Saluan bible

ANU MOMPOLELE POTATAE NU TUMPU 2

¹Aku nontantukanmo da oposanang na butong da ku sumbu' pa' apaa na aijo' kasanangan nu kantumuu'an. Panyo inyata'je ahi taalu' madi' ko gunanyo. Aku sininsumbu'je saba' taalu' kumojo atina'mo na kaponga'an ka' mule' madi' ahi' ko gunanyo na kasanangan. Aku ko kahanda' da timbali pande hondo.

²Aku mongkahanda'i da aku saja' balasanang ka' mule' lewa' bala inum anggur ka' mule'lewa mombau bau-bauon.

³Ku gantang aijo'mo na palabuatan anu kubau, anu talalo hondo ma'ima' hi manusia da mongoa'i kantumuu'annyo anu madi' pin na tumuu' i dunia aiya.

⁴ Kalaja anu toto daka-daka' binaungkumo. Binaungkumo na laiganku. Binaungkumo na taman tiba ale' anu sinuanankumo nu anggur ka mule' ngangahan nu kau' anu okaan na bua'nyo.

⁶Kinekengkumo na kolam da ko ueenyo na taman haha aijo' ka' mule' ale' haha aijo'.

⁷ Posaihonku manjoo' mau anu ingolingku kabai anu ihampe i laiganku. Potuu'onku manjoo' hondo nu lingkudui na anu nu mian anu toho'mo jinojoong i Yerusalem.

⁸ Ingalangkumo na salaka tiba mosoni' hasin anu ingala hi to tomu-tomundo' lengkat mae hi lipu-lipu' anu ku palentah. Anu togu manyanyi mo'ane kabai boune nomposanangmo kinyonyoangku nu nyanyian-nyanyian nu aha. Konjoo'nyo nu to amba-amba hue'ku yayamo na anu ku ka'ima'i.

⁹ Memang akumo na daka' molingkudui anu toho'mo jinojoong i Yerusalem ka' mule' kapandeanku bapikin na lebe matangkas.

¹⁰Sinin na anu ku ka' ima'i tionyo ku lasai sampe aku ma 'osa hondo. Madi' toho' ola kusabanakon na anu ku kahanda'imo mongoa'i kasanangan maumo pa'apaa. Sanang hondo na aku molasai hasin nu kalajangku ka' aijo'mo na tambongku.

¹¹Panyo imihinyo mae pagala ahi' ku selidiki na kalajangku iwi-iwi', ka' mule' lawengku iwi-iwi' kahanda' mompomingkot kalaja aijo', saba' sinumbu'kuje na iwi-iwi' aijo' taalu' madi' ahi' ko gunanyo. Usahangku aijo' madi' ko gunanyo ola susumo mololoi' mombun,

¹²Mau pa' mosiamo samian na tomundo' ola ahi' mombau apaa na anu binaumo nu to tomu-tomundo' ma'isa pe'e kini ianyo. Lantas aku binapikinmo; Apaa na alati'nyo timbali pande kabai madi' sampa mangalati' kabai ponga'?

¹³Memang kusumbu' “kapandean bapikin lebe ma'ima' molingkudui kaponga'an. Susumo jingka lebe ma'ima molingkudui pikat.

¹⁴Mian anu pande timbali montoa mau pa' moya na patujunyo; mian anu ponga' sumomo lumajang anu maha kanyangan.” Panyo kusumbu' mule' ahi' saba nasib anu pokakana mongkona suele aha iwi-iwi'.

¹⁵Sahingga binapikinmo na aku, ‘Nasib anu mongkona aha mian anu ponga' timbali ku oa'i suele. Jadi apaa na gunanyo na kapandeanku bapikin?’ Lantas tinolukumo kodo-kodo' taalu' ilimu' aijo' totu-totu'u madi' ahi' ko gunanyo.

¹⁶Mian anu ponga' malia' okolilimi panyo mian anu ko kapandean bapikin suele madi'mo o ‘inau'’. Mamanga ahi' kita iwi-iwi' okolilimimo i uno nu pikilannyo. Kita iwi-iwi' tionyo ahi' mate mau mian anu pande mau mian anu ponga'.

¹⁷Kalana aijo' kantumuu'an madi'mo ko gunanyo hi belengku, madi'mo ko sangga'atannyo. Iwi-iwi' madi'mo ko gunanyo aku ola ahi' taalu' mololoi' mombun.

¹⁸Iwi-iwi' na hasin nu kalajangku ka' anu i humpakkumo madi' ko gunanyo hi belengku, kalana ku po una'mo ahi' hi mian anu mombolosakon aku.

¹⁹Ka' ihe na monsumbu' pa' ia anu pande kabai anu ponga'? Panyo maumo pa' mosia ia ahi' na timbali montumpui hasin nu kalajangku anu bibinaungkumo tempo'nyo tinumuu' i dunia aiya, salaku balakat nu lawengku tiba kapandeanku bapikin. Jadi aijo' suele madi' ahi' ko gunanyo.

²⁰Uuka aiya aku nompele-pelemo na nokalaja talalomo nakeke.

²¹Saba' manusia bakalaja talalo makeke kalana mompake kapandean bapikin, ilimu', pangatahuan ka' pande na mombau apa-apaa anu nu palalui. Panyo imihinyo mae ia tionyo ahi' mompala'i iwi-iwi' hasin nu lawenyo hi mian anu madi' hondo-hondo kino lisongunyo i han aijo'. Jadi aijo' suele madi' ahi' ko gunanyo ka' mule' ahi' madi' adin!

²²Madi' ko kamingkotannyo na manusia mokalaja maboat ka' talalo susa'; lantas iyamo na hasin nu lawenyo anu nu taha'imani?

²³ Maumo apaa na anu binaunyomo tempo'nyo daagi ia tutuu' ola saja' ia sinansala ka' noko pa idekan kinyonyoanyo. Maumo pihi kinyonyoanyo suele ma' idekan ahi'. Jadi iwi-iwi' aijo' madi' ko gunanyo.

²⁴ Madi' ko anu lebe ma'ma' hi mian de misa' mongkaan ka' monginum ka' mule' molasa hasin nu kalaja. Aku iwi-iwi sumbu'je taalu' aijo' ola halala' nu Tumpu.

²⁵Ihe na anu timbali ola mongkaan ka' ola balasanang pada han madi' ko Tumpu?

²⁶ Tumpu na mombee'i kapandean bapikin, tiba pangatahuan, ka' mule' kabilahian hi mian anu momposanang kinyonyoa-Nyo. Panyo mian anu baladosa' pinalentah-Nyo mokalaja molio lezeki ka' mule' montambun hasinnyo da obee' hi mian anu momposanang kinyonyoa nu Tumpu. Jadi iwi-iwi' aijo' madi' ko gunanyo ola ahi' susumo mompagala mololoi' mombun.