Read Saluan ANU MOMPOLELE POTATAE NU TUMPU 3 Bible Online

ANU MOMPOLELE POTATAE NU TUMPU 3 - Saluan bible

ANU MOMPOLELE POTATAE NU TUMPU 3

¹Iwi-iwi na anu daagi' i dunia aiya jinadimo, tempo'nyo tinakanmo ahi' nu Tumpu.

²Tumpu na nontantukan tempo'nyo nu mompohampe ka' tempo' nu silaka, tempo'nyo nu mosu'an ka' tempo'nyo nu mombubut,

³tempo'nyo opateimo ka' tempo'nyo mompa'alin, tempo'nyo mongidei ka' tempo'nyo mombau.

⁴Tumpu na nontantukan tempo'nyo da humang ka' tempo'nyo kumojo, tempo'nyo da montando'i ka' tempo'nyo monsalelei.

⁵Tempo'nyo da moduhus ka' tempo'nyo madi' timbali moduhus, tempo'nyo montanggogoli ka' tempo'nyo pagala mongintim kinyonyoa.

⁶Tumpu na nontantukan tempo'nyo da okabot ka' tempo'nyo molapusmo, tempo'nyo da monguna' ka' tempo'nyo loyaan,

⁷tempo'nyo da mombeak, ka' tempo'nyo mongka'ut, tempo'nyo ola momohokot, ka' tempo'nyo motatae.

⁸Tumpu na nontantukan tempo'nyo da mongkalibosi ka' tempo'nyo da mongka'ideki, tempo'nyo da mahampate ka' tempo'nyo da baladamemo.

⁹Apaa na hasin nu lawento?

¹⁰Ku sumbu' saba' Tumpu nombee'imo kalaja anu maboat hi kita.

¹¹Ia nontantukanmo tempo' anu madi' sala' hi iwi-iwi' na anu jinadimo. Ia nombee'imo anu oka'ima' into da monsumbu' apaa na aiya mae i ahop, panyo kita madi' moko ala monsumbu' palabuatan nu Tumpu daagi' pe'e i monanyo toka-toka imihinyo.

¹²Ku sumbu' saba' hi kita madi' daagi' ko anu lebe ma'ima' aijo'mo balame-lame' ka' mongoa'i kopinnyo nu kantumuu'anto.

¹³Ka'ima'annyo kita iwi-iwi' mongkaan ka' monginum ka' mongoa'i hasin nu kalajanto. Aitu anu binee'mo nu Tumpu.

¹⁴Ku sumbu' iwi-iwi na usaha nu Tumpu tataap daagi' sampe toka sidu-sidutu'. Madi' bisa' montuangi kabai mongkulangi na mian. Ka' Tumpu mombau sumo aitu da kita mabuhuk hi ia.

¹⁵Anu uuka aiya jinadimo, jinadimo ma'isa pe'e aijo' jinadi. Anu jadije aiya mae i ahop, noko pinomo na jinadi. Tumpu nontantukanmo da anu daagi'mo, poule' mule' jadi.

¹⁶Daagi' mule' ko anu tinoangku i dunia aiya: sabenannyo ahi' daagi' ko ka'adilan ka' ka'ima'an.

¹⁷Kututugi Tumpu momputusi mian anu ma'ima' na gau'nyo ka' mule' mian anu ma'idek na gau'nyo kalana toto sa'angu' na han ka' toto sa'angu' na han anu obau tionyo ahi' jadi i tempo anu tinantukanmo nu Tumpu.

¹⁸Ku ala lia-lia' aijo'mo: Tumpu monguji' kita salaku pomponyata saba' nasibto madi' ko bedanyo tiba nasib nu binatang.

¹⁹Mau mosiamo na nasib nu manusia ka' binatang pokakanamo. Sa'angu' timbali ahi' mate sumo aitu mule' sangga'at. Ohu-ohua' pokakanamo anu binau nu Tumpu. Jadi manusia madi' lebe untung molingkudui binatang kalana ohu-ohua' aitu kantumuu'annyo madi' ko gunanyo.

²⁰Aha montujui tampat anu pokakana. Aha asannyo lengkat i abu' ka' po'ule' mule' minsusule' i abu'.

²¹Madi' osumbu'to pa' roh nu manusia moliba' mokiita' ka' roh nu binatang mintatau' i uno nu tano'.

²²Kalana aitu sinumbu'kumo, saba' madi' ko anu lebe ma'ima' hi manusia, kalana anu lebe ma'ima' mongoa'i hasin nu kalajanyo. Sangga'at madi' ko anu pinoko ala binaunyo. Madi' bisa ia monsumbu' apaa na anu jadi de ia silakamo.