Read Saluan ANU MOMPOLELE POTATAE NU TUMPU 6 Bible Online

ANU MOMPOLELE POTATAE NU TUMPU 6 - Saluan bible

ANU MOMPOLELE POTATAE NU TUMPU 6

¹Aku nontoa mule' ka adilan imadi'anmo anu talalomo hondo nomposusa' manusia i dunia aiya.

²Toto minsan Tumpu mombee'i kakaya'an, kaholomatan, halata' hi toto samian sahingga madi'mo daagi ko anu nu kamilui. Panyo Tumpu madi' mompobee'ia da mongoa'i iwi-iwi' anu bi nee'mo aijo'. Padahan mian anu madi' Nusumbu' na mongoa'i ahi' kakaya'an aijo'. Jadi iwi-iwi' aijo' madi' ko gunanyo ka' monsusa'i kinyonyoa.

³Maumo mian ko anak aha sa'atu ka' mule' pin na tumuu' sahingga nantan na umunnyo panyo de ia madi' mongoa'i kabilahian ka' madi' mule' mohumpak tano' bau polamunan anu pantas, saba aijo' de o ala ipikilanku bunga mea' anu salaje pinohampe lantas sinilakamo aijo' na lebe ma'ima' na nasibnyo nu lingkudui na mian aijo'.

⁴Kalana kona hi bunga mea' aijo' madi' timbali bau pikilan, pa' ia pinohampe kabai imadi'; ia nambamo itampat anu pikat ka' sampa okolilimi.

⁵Ma'isa toho' ia nontoa jingka nu sinaa, ka' mule' ia ma'isa mangalati' mosia na kantumuu'an anu sumo aiya, sahingga ia sinanangmo na kino mamale'.

⁶Aijo' na lebe ma'ima' molingkudui mian anu tumuu' ua atu na taun panyo madi' toho' ko kabilahian. Te misa' ua-ua aha aijo' mamba itampat anu pokakana?

⁷Manusia bakalaja ola molio anu okaan, panyo ia madi' toho' mongoa'i ma'osa.

⁸Jadi apaa na ka' untungannyo nu aha mian anu pande de o potimbang tiba mian anu ponga'? Apaa na gunanyo de mian mule' anu kasiasi na ko kalakuan ma'ima' hi aha mian da'isan?

⁹Iwi-iwi' aijo' madi' ko gunanyo, ola susumo usaha mololoi' mombun. Lebe ma'ima' kita balasanangmo nu apaa na anu aiyamo hi ktia ka' de ola mule' saja' mongindi anu lebe manjoo'.

¹⁰Iwi-iwi' na anu daagimo noko pipinmo dinagi. Kita monsumbu'mo saba' manusia madi' moko ala mombanta mian anu lebe balakuasa molingkudui ia.

¹¹Lebe ia mombanta lebe madi' ko alati'nyo na potataenyo, ka' mule' ia madi' mohumpak ka untungan apa-apaa.

¹²Mosia na mian timbali monsumbu' apaa na anu lebe ma'ima' hi ia i uno nu kantumuu'annyo anu madi' umun ka' madi' ko gunanyo, ka' motulu ola susumo lolung? Mosia na mian timbali mangalati' apaa na anu jadi saidi mae i dunia aiya de ia silakamo?