Read Saluan ANU MOMPOLELE POTATAE NU TUMPU 9 Bible Online

ANU MOMPOLELE POTATAE NU TUMPU 9 - Saluan bible

ANU MOMPOLELE POTATAE NU TUMPU 9

¹Iwi-iwi' aijo' pinopikilakonkumo hondo-hondo. Tumpu na mongatun mian anu ma'ima' na gau'nyo tiba anu pande ka' mule' de mian aijo' mongka ideki kabai mongkalibosi. Madi' ko anu monsumbu' pa apaa na jadi aiya mae imihi.

²Memang nasib anu pokakana bubuu' mongkona mian. Mian anu madi' tageo' na kinyonyoanyo maumo mian anu palaganta, mian anu ma'ima' na gau'nyo kabai anu ma'idek na gau'nyo, mian anu belesi' kabai mian anu mahenyu, mian anu monsombahkon koloban kabai anu madi'. Mian anu ma'ima' na gau'nyo madi' lebemo mohumpak dale' molingkuduimo mian anu baladosa', mian anu binasumpa'mo pokakanamo ahi' tiba mian anu madi' mongka oho' basumpa'.

³Jadi nasib anu pokakana suele mongkona ahi' aha iwi-iwi'. Ka' aijo' sa'angu' na han anu momposusa' kinyonyoa susumo suele iwi-iwi' na anu jinadimo i dunia. Tempo'nyo ia daagi tutuu' kinyonyoanyo nu pobuke'i nu pikilan anu ma'idek ka' mule' nu pobuke'i nu kaponga'an. Lantas monti-montik nu kabotmo na ukunnyo.

⁴Panyo tempo'nyo ia daagi tutuu'; tempo'nyo aijo' daagi ko anu otaha imani. Temisa' dedeng anu daagi tumuu' na lebe bilahi na kantumuu'annyo, nu lingkudui na singa anu madi'mo ko nyawanyo?

⁵Madi' ko madi'nyo nu sumbu' nu mian anu daagi tutuu' na ukunnyo montanda'imo ia; sadangkan mian anu sinilakamo na madi'mo ahi' ko anu nu sumbu-sumbu'. Hi ia madi' ko tamboonyo kabai ko palasennyo; ka' sanggonyo mule' okolilimimo.

⁶Kinyonyoa mongka'ima'i, mongka'ideki, ka' mule' napisunyo, iwi-iwi' silakamo tiba ia. Ia madi'mo daagi mongala bahagian apa-apaa; i han iwi-iwi' anu jinadimo i dunia aiya.

⁷Donganmo pongkaan ka' balame-lame'; inumo sana-sanang na kinyonyoa na anggur nu belemiu, Tumpu madi' kabalatan pakalaus Ia ahi' situju.

⁸Lebe ma'ima ohup nu beleyum balasahaya ka' lame' na otoa.

⁹Oa'i ahi' ima-ima' na kasanangan tumuu' tiba bengkele' anu nu kalibosi; i uno nu kantumuu'an nu beleyum anu ola pinalasuma bibine' nu Tumpu hi beleyum i dunia aiya. Oa'i sansina-sinaa maumo ahi' madi' ko gunanyo. Kalana tamboonyo nu lawe nu beleyum olamo atina'.

¹⁰Baumo na pakalaja'an nu beleyum iwi-iwi' nu kahosonan nu butong nu beleyum. Dumo saidi' mae madi'mo ko pikilan kabai pakalaja'an Madi'mo ko ilimu' kabai kapandean bapikin i dunia nu mian anu sinilakamo. Ka' mokiijo'mo na kalambanan nu beleyum.

¹¹I dunia aiya daagi mule' ko anu tinoangku; pailomba'an madi' saja'mo ko kamanangan na mian anu mopadeka', pahampatean madi' saja'mo ko kamanangan na mian anu mahoson. Mian anu pande madi' saja'mo mohumpak pakalaja'an polioan, ka' mian anu mangalati' madi' saja'mo mohumpak kakaya'an. Ka' mule' suele mian anu ahali madi' saja'mo talasanggo, Kalana maumo ahi' pa' ihe timbali nu tokai mae nu nasib soe'.

¹²Mian madi' monsumbu' pa' hipian na tempo'nyo toka mae. Susumo tomonsi' nu konamo nu so'o ka' mule' ikan nu konamo nu buani'. Sumo aitumo na manusia de nu tokaimo mae nu balaa' isa'angu' na tempo anu madi' sinangka-sangka.

¹³Ka' mule' aiya daagi ko sa'angu' na sonto' anu totu'u hondo mosia na mian moholomati kapandean bapikin:

¹⁴Daagi ko sa'angu' na kota'anu ise' anu madi' da'isan na miannyo. Daagi kinosansinaan samian na tomundo' anu balakuasa hondo tinokamo mae nontumbuhi kota' aijo'. Ia nontikumo ka' kahanda'mo montumbalakon pagan mesen aijo'.

¹⁵I uno nu kota' aijo' daagi ko samian anu kasiasi panyo pande. Ia na nomposalamat kota' aijo'. Panyo kalana ia kasiasi lawenyo kinolilimanmo ka' madi'mo daagi ko samian na anu nonginau' ia.

¹⁶Jadi totu'umo apaa na anu i uno nu pikilanku taalu' kapandean bapikin molingkudui kahosonan. Maumo sumo aijo' kapandean bapikin nu mian anu kasiasi madi' opajuli. Potataenyo madi' ko anu opalahatikan.

¹⁷Lebe ma'ima' mohongo potatae nu samian anu ko ilimu'nyo; ka' de mule' ola loboo' nu samian anu balakuasa i uno nu sa'angu' na gombuan nu mian anu toto ponga-ponga'.

¹⁸Kapandean bapikin lebe ko gunanyo molingkudui toongon anu bau pahampate, panyo tua' mau ola sanjohojut mongidei susu sa'angu' na kuhon.