Read Saluan NYANYIAN ANU TALASANGGO 1 Bible Online

NYANYIAN ANU TALASANGGO 1 - Saluan bible

NYANYIAN ANU TALASANGGO 1

¹ Nyanyian anu talasanggo tinulis i Salomo.

²Ooki mae na aku nu biwi nu beleyum. Sindua'an nu beleyum lebe ma'ima' nu lingkudui na anggur!

³Beleyum talalo hondo manohong, sanggo nu beleyum sumomo minya-minya' anu nobubusmo; mokonyo aijo' to lalangkoyang monsindua'i beleyum.

⁴Sampamo lia-lia' na kita, o tomundo'ku, boamo mae na aku i uno nu salipi' nu beleyum.

⁵Bakas mau mo'itom panyo aku handa o to lalangkoyang nu Yerusalem; mo'itom susumo kemah nu aha mian nu Kedar, panyo ma'ima' hondo susumo lalanse i laigan nu tomundo' Salomo!

⁶Boli montoa butongku mo'itom, kalana aku saja' nu timpa'i nu singit. To utu-utusku tu'a nontambuha'imo aku ka' nompokaumo aku mokalaja i ale' nu anggur; aku madi'mo kokasampatan na mongulus butongku.

⁷O sindua'anku poto'i mae, iya mae na polaya'an nu beleyum domba haha aijo', Iya mae na pompolukutan nu beleyum aha de malomo? Toho' mule' na aku susumo mian anu lewa' mamba momoya hi aha gombuan nu domba nu to sanga-sangalu nu beleyum?

⁸Toho' mule' na beleyum monsumbu' tampatnyo, o anu handa anu aijo' hi aha to bou-boune? Batukimo na kalajangan nu gombuan nu domba, ka' olaya' na to memee' nu beleyum koko pinombauan kemah nu anu molaya'.

⁹Sindua'anku, beleyum sumomo ajahan behenyo, anu mohela' kareta i tomundo' Mesir.

¹⁰Gagising nu beleyum ma'ima' hondo atina' i olot nu palahiasan, gogohong nu beleyum pinohandamo nu lante anu ko mainannyo.

¹¹Beleyum binauanmo mami, palahiasan mosoni' ka' komainannyo salaka.

¹²Hau-haunyo tomundo'ku kiijo' ikamale'annyo, nanohongmo na minya-minya' nu narwastuku.

¹³Sindua'anku sumomo mur na nohongnyo, salatan ia natikalokosmo isaha'anku.

¹⁴Sindua'anku sumomo sampu'un na bunga-bunga pacar isinin na ale' i En-Gedi.

¹⁵Beleyum handa hondo kukalibosi, beleyum handa totu-totu'u. Mata nu beleyum mimbalu-balu' malapati'.

¹⁶Beleyum handa hondo, kukanonongi, totu-totu'u handa na beleyum. Kahoyotanto i hemput anu molumba'.

¹⁷Ohi' nu laiganto kau' aras, ka' lotengnyo kau' lontio'.