Read Saluan NYANYIAN ANU TALASANGGO 6 Bible Online

NYANYIAN ANU TALASANGGO 6 - Saluan bible

NYANYIAN ANU TALASANGGO 6

¹Nambamo noya na sindua'an nu beleyum, o, langkoyang anu tingkai'on hondo? Namba noya na sindua'an nu beleyum, da kami suele mompaha lio?

²Sindua'anku namba i ale'nyo, i ale' nu to lampa-lampa, da molaya' to domba-dombanyo i ale', ka' montipu mae sinin na bunga bakung.

³Aku aiya sindua'ankumo na tumpunyo, ka' mule' ia akumo an tumpunyo, ia nolaya'mo to domba-domba, aijo' i totonga' nu bunga bakung.

⁴Beleyum handa hondo, sintangku, sumo ko handanyo nu kota' Yerusalem, sumo ko ima'nyo nu kota' Tirzah. Beleyum talalo hondo momposanang nyawa, sumomo suludadu tiba bandela'nyo.

⁵Posiloian na ohup nu beleyum, boli montonto'i mae aku, kalana pontonto'i mae nu beleyum mompobingong aku. Bulu nu ubak nu beleyum sumomo sanggombu na mee' anu nintuamo mae lengkat i bungkutnyo nu Gilead.

⁶Bese' nu beleyum mopute' sumomo sanggombu na domba, anu sala'je kiniis ka' pinindi'; mojajalan toto ohua' susumo anak nu domba anu hapi', sa'angu' pe'e madi' ko anu nolapus.

⁷Gagising nu beleyum sumomo biha'an nu bua' nu dalima, anu sulu-suluk isambiha' nu kukumbung nu beleyum.

⁸Maumo daagi ko anom pulu' na bengkele' nu Tomundo', ka' mule' ualumpulu' na ambahue' tiba to lalangkoyang majoo',

⁹Panyo ola ahi' sa'angu' na malapati'ku na anu lewa' ku indi, anak sa'a-sa'angu'nyo anu nu kalibosi hondo nu tinanyo. To lalangkoyang montoa ia ka' mompuji ia, to bengke-bengkele' nu Tomundo' tiba to amba-ambahue' bangang na montoa ia.

¹⁰ihe na ia anu tinoka mae aijo' mimimbalu-balu' jingka anu bete'mo mae, sumomo bitu'on tumba na ko ima'nyo, ka' mule' sumomo jingka nu batu nu sinaa? Ia talalo hondo momposanang nyawa, sumomo suludadu tiba bandela'nyo.

¹¹Aku nambamo i ale' nu kanali', montoa bunga-bunga i bangka'nyo. Ugaat anggur daagimo ko buha'nyomo ka' mule' kau' dalima nimbungamo.

¹²Talalo hondo ku indi na beleyum mongka'ima'i mae, susumo mongindi na aku sumake i kareta anu opake mahampate sama-sama tiba to tu'a-tu'anyo anu talasanggo.

¹³Ponsaleleimo na belemiu langkoyang nu aha Sulam, pimpio-pio'mo da okabangangi mami. Kadaka' belemiu mongka'imai mae montonto'i aku, hau-haunyo aku sinumalelemo itotonga' nu aha mian anu mompopiakon?