Read Saluan NYANYIAN ANU TALASANGGO 7 Bible Online

NYANYIAN ANU TALASANGGO 7 - Saluan bible

NYANYIAN ANU TALASANGGO 7

¹O, langkoyang anu tingkai'on, ma'ima' hondo na tengke nu beleyum mompusok sandan atina' Pa'a nu beleyum sumomo pahahiasan, kapaden nu samian anu nontali.

²Puso nu beleyum sumomo mangko' timpodon, anu madi' toho' ko kamingkotanyo na anggur atina', anu madi' ko galo'nyo. Kompong nu beleyum mimbalu-balu'mo tambunan nu gandum, anu tinikubanmo nu bunga-bunga bakung.

³Susu nu beleyum mimbalu-balu' ohua' na anak nu jonga, ka' mule' sumo kijang anu hapi'.

⁴Gogohong nu beleyum sumomo manara gading, mata nu beleyum mimbalu-balu' kolam anu kiijo' i Hesybon, koko sabatan daka' Batrabim. Sung nu beleyum sumomo menara anu kiijo' i Bungkutnyo nu Libanon, anu mongahopi kota' Damsyik.

⁵Ubak nu beleyum mimbalu-balu' bungkutnyo nu Karmel; bulu nu ubak nu beleyum tinobinan sumomo anu pinokalekot, momposanangmo nyawa nu samian na tomundo'.

⁶Totu-totu'u tingkaion hondo na beleyum, anu osinta hondo i antala nu aha anu oka'ima'i.

⁷Butong nu beleyum sumomo kau' korma na ko ima'nyo susu nu beleyum sumomo sampumpung na bua'nyo.

⁸Ko kahanda' na aku mompai liba' kau' korma aijo', da mongala mae sinin na bua'nyo, de timbali da susu nu beleyum sumo pumpungan nu bua' nu anggur, da sawo nu beleyum nohongnyo sumo bua' nu apel,

⁹nganga' nu beleyum matami' sumo anggur! Bakas da anggur aijo' mo ili mokiijo' hi sindua'anku, ka' madi' ko kamingkotannyo, ka' momposumangat lebe mongka'ima'i sindua'an, ka' mule' hi to mia-mian anu daagi hau-haunyo hoyot.

¹⁰Aku aiya sindua'ankumo na tumpunyo, ia mongka'ima'i aku.

¹¹Imbo' da kita mamba i padang o, sindua'anku. ka'male' mae i ale' Itotonga' nu bunga-bunga pacar.

¹²Imbo' da kita mamba i ale' daagi subu-subu, da montoa pa' kau' anggur nimbuhakmo, ka' bunganyo tinimbokamo, pa' kau' dalima nimbungamo Ikiijo 'mae ku bee'je na sintangku hi beleyum.

¹³Kau' ara taalo hondo manohong na nohongnyo, koko sabatan nu laiganto daagi ko bua' nu kau' anu matami', anu pininmo tinipu ka' anu salaje'; aijo' ku po una' da bau bagi nu beleyum, sindua'anku.