Read Saluan YESAYA 10 Bible Online

YESAYA 10 - Saluan bible

YESAYA 10

¹Silakamo na belemiu kalana nombaumo atulan-atulan anu madi' adin na mombei palentah anu monsakisa bansang-Ku.

²Tiba jalan anu sumo aijo' belemiu madi'mo mompobee' mian anu kasiasi mohumpak suele hak ka adilan ka' mongagoimo halata' nu aha mian anu singkapmo binalu tiba to ana-anak anu madi'mo ko tuumanyo ka' tinanyo.

³Apaa na daagi' obau nu belemiu de tokamo na sinaanyo nu Tumpu mohukum belemiu? Daagi' apaa na usaha nu belemiu de Ia mompotokamo mae balaa' anu lengkat mae ilipu' majo'on? Hihe na timbali pomoitan tulung nu belemiu? Iyamae na timbali pomposulukan kakaya'an nu belemiu?

⁴Uki' nu belemiu madi' kosangalasannyo olamo ahi' opatei i uno nu pahampatean kabai oboamo salaku mian anu ihakop. Panyo Tumpu daagi' sabole-boleh motambuha' ka' tataap monabu'akon hukuman.

⁵ Tumpu notataemo, “Silakamo na Asyur! Asyur Ku pakemo salaku pondoke ka' salaku amangkun bau pompan aha to mia-mian anu nukonamo nu tambuha'-Ku.

⁶Kusaimo na aha Asyur da mamba montumbuhi bansang-Ku anu madi'mo nompalesaya Aku ka' nonsabapimo da Aku notambuha'mo. Sinaing-Kumo na Asyur da mompahuhuakon mae ka' mule' da montomangi ka' mompahampeja'akon bansang-Ku susumo abu' aijo' ijalan.”

⁷Panyo tomundo' nu aha Asyur koposi tanga'annyo ahi'. Ia kokahanda' da obau ahi' kaganasan na mompalentah ka' mule' manjoo' ahi' na bansa opatei.

⁸Ia nombuulakonmo butongnyo, ka' notatae, “To tale-talenga'ku ka to tomu-tomundo'!

⁹Ku patundu'mo na kota' Kalno, tiba Karkemis, Hamat tiba Arpad. Kupantundu' mule' na kota' Samaria tiba Damsyik.

¹⁰Kupatundu'mo na kalaja'an-kalaja'an anu monsombah pilogot anu lebe balakuasa nulingkudui na anu daagi' i Yerusalem ti ba i Samaria.

¹¹Samaria ka' mule' iwi-iwi' na pilogotnyo noko pateankumo. Anu ku bau mule' i Yerusalem tiba iwi-iwi' na pilogotnyo anu osombah ikiijo'.”

¹²Panyo pinoto'imo nu Tumpu, “De anu kahanda' Ku bau i Puge'nyo nu Sion ka' i Yerusalem aijo' ilapasmo, Aku mohukumo tomundo' nu aha Asyur kalana ia buulon ka' talalo saja badaka.”

¹³Tomundo' nu aha Asyur talalo molabi-labi na motatae, ia nontaloakon, “Iwi-iwi' na anu binaungkumo aijo' kalana kakuasa'anku. Aku monsumbu' monggoliliakon ka' mule' aku pande. Madi'mo pinobee'ku na kobata-batasnyo bansa sa'angu' tiba bansa sangga'at ka' mule' pinahuhuakonkumo na talakonan nu aha. Susumo sapi' pinahampeja'akonkumo na aha mian anu pompalentah.

¹⁴Bansa-bansa idunia aiya pokakanamo susumo peta nu tomonsi'; dengke hondo na aku mongala halata' nu aha, sumomo ahi' mian mongkakup nggalau' anu pinala'ianmo aijo' i petaanyo. Madi' kopolipiknyo mompahasi mae ka'mule' madi' kotungkusnyo tolonganga' mae molokes.”

¹⁵Panyo pinoto'imo nu Tumpu, “Tetoho' mule' bobolo' mosi buulakonmo ia hi mian anu monggunakon ia? Pa' galagaji lebe penting nulingkudui na mian anu monggunakon ia? Misa amangkun na mohangkat mian, panyo mian ahi' na mohangkat amangkun.”

¹⁶Kalana aha mian nu Ayur nombuulakonmo butong nu aha, sahingga Tumpu Anu Daka' na Kuasanyo mompotokamo mae panyakit anu molele da bau pohukum to sulu-suludadu anu toto tangka-tangkas na pangkatnyo ka' mule' toto hoso-hoson. Aha molasaimo pipin sakit nusihabi anu taha-tahahumo pokakanamo susumo apu anu madi'mo kokamingkotannyo na montoyo'i.

¹⁷Tumpu anu susi', Jingka nu aha Israel, timbalimo susumo moak nu apu anu ola i uno nu sansinaa timbalimo montanggoti iwi-iwi na apaa ka' mule' iwi-iwi na kuhat anu kohii'nyo.

¹⁸Alas anu toto daka-daka' tiba ale' anu toto molu-molumba' ilipu' nu aha Asyur ohansunimo ingko-ingkot susumo mian masakit anu tahahumo sansala ahennyo silakamo.

¹⁹Iwi-iwi' na kau' me tontuha' sangkiding, sahingga maumo anak anu daagi' ise' moko alamo mombilang.

²⁰Tempo'nyo tokamo saidi' mae, tuha' nu bansa Israel anu madi' pinatean madi'mo daagi' saja' montaha'imani kantumuu'annyo hi bansa anu balakuasa anu me ise-ise' nompateimo aha, panyo hi Tumpumo ahi nu aha Israel anu susi'.

²¹Tuha'nyo meme sangkiding na aha bansa Israel balatobatmo hi Tumpu anu balakuasa.

²² Maumo aha bansa Israel tempo uuka aiya konjoo'nyo sumomo bone' i ambai, panyo me to pia-piangkuka na minsusule'. Hukuman nu Tumpu malia'mo mae toka, ka' memang pantasmo ka' adinmo ahi' de bansa aijo' osilakaimo.

²³Memang konanyomo na lipu' aijo' songko-songko nu hansunimo nu Tumpu Anu Daka na Kuasanyo; aijo'mo na kaputusan nu Tumpu, ka' madi'mo daagi' obabali'i.

²⁴Tumpu Anu Daka' na Kuasanyo nompoto'imo hi mian anu palesayamo hi Ia, anu jojoong i Sion, “Boli mabuhuk hi aha mian nu aha Asyur, mau mule' aha mombee'i palentah anu monsakisa ka' monsansala belemiu susumo anu binaumo nu aha mian nu Mesir naipuan mae.

²⁵Madi'mo daagi' pin pusa-Ku hi belemiu madi'anmo, lantas aha Ku pateimo.

²⁶Aku Tumpu Anu Daka' na Kuasanyo mondokemo aha nu pondoke, susumo Aku nontahutu'mo aha mian nu Midian ibungkutnyo nu batu Oreb. Aha Asyur Ku hukumo susumo Aku nohukumo Mesir.

²⁷Tempo'nyo aijo' Ku pobebasmo na belemiu da bolimo lewa' nu bee'i nu aha palentah Asyur anu saja' mombee'i palentah monsakisa, ka' aha madi'mo daagi' balakuasa mompalentah belemiu.”

²⁸Suludadu nu aha Asyur nompatundu'mo kota' Ayat. Aha noliu-liumo Migron! Posadia'on anu nu kaan nu aha pinala'ianmo nu aha i Mikhmas!

²⁹Aha noliu liumo potaapan ka' daagi' inale' i Geba! Mian anu jojoong i kota' Rama nabuhukmo tiba aha mian anu jojoong i Gibea, kota' i Tomundo' Saul, nopalaimo.

³⁰Poloboo'mo, o, belemiu anu jojoong i Galim! Potombihing, o, mian anu jojoong i Laisya! Taami mae, o, mian anu jojoong i Anatot!

³¹Mian anu jojoong i Madmena tiba Gebim nopalaimo.

³²Sinaa uuka sampobali' tinokamo i kota' Nob, ka' ikiijo' mae aha nontangkakonmo pajagun nu aha i sasu Puge'nyo nu Sion, mambamo i kota' Yerusalem.

³³Tumpu Anu Daka' na Kuasanyo mompobahangkangmo aha susumo panga' nu kau' anu otutu'akonmo i batangnyo. Anu talalo hondo ma'ima' ka' matangkas hi aha aijo' otaa'mo ka' otua'akonmo.

³⁴Nu tua'akonmo nu Tumpu na aha susumo kau i uno nu alas otaa'mo nu bobolo'. Maumo ahi' aha mahoson susumo kau' anu daka' hondo i Libanon panyo aha tionyo ahi' motua'mo!