Read Saluan YESAYA 14 Bible Online

YESAYA 14 - Saluan bible

YESAYA 14

¹Tumpu po ule'mo nongkalibosi Israel mian anu palesayamo hi Ia, ka' po ulemo nompile'i aha da po ule ahi' Ia na tumpu-Nyo. Ia po ule'mo mompojoong ilipu' nu aha. Mian anu lengkat mae isalipu'an tokamo mae ka' maninggalumo hi aha.

²Manjoo' na bansa montulungimo bansa Israel da minsusule'mo ilipu' anu binee'mo nu Tumpu hi aha ka' ikiijo' mae bansa haha aijo' baumo posaihon nu aha Israel. Israel mompahahakopakonmo aha to mia-mian anu toho'mo nohakop ia ka' mule' mompalentahmo aha to mia-mian anu toho'mo nonsakisa i uno nu pakalaja'an.

³Tumpu mompobebasmo Israel lewa-lewa'mo sinakisa ka' mule' i kasansala'annyo, ka' lewa-lewa' nokalaja maboat opa-opakisakon hi aha.

⁴De nu posidamo nu Tumpu na aijo' nu alumo nu aha na itomundo' Babel sumo uuka, “Tomundo' anu buhingison pinatundu'mo! Ia madi'mo daagi mombee'i mae pakalaja'an anu monsakisa.

⁵Tumpu madi'mo mompobee' pamalentahan anu ma'idek na balakuasa

⁶ka' saja motambuha' na mombee'i kasansala'an nu to bansa-bansa ka' saja' monsakisa aha.

⁷Ahennyo songko-songko na dunia sanangmo madi'mo ko anu mompoposia ka' toto samian lame'mo na solaa' manyanyi.

⁸Kau' eru tiba kau' cemara i Libanon lame'mo kalana tomundo' buhi-buhingison aijo' pinatundu'mo ka' de ia mambamo madi' daagi' ko anu lewa' mompalentah montaa' aha!

⁹Dunia nu mian anu sinilakamo aijo' balame-lame'mo na molabot itomundo' Babel. Sahingga mobulamo na santuu' nu to mia-mian anu naipuan mae binalakuasa i dunia aiya ka' mule' santuu' nu to tomu-tomundo' tuminjomo mae aijo' i kasuhangan nu aha.

¹⁰Aha iwi-iwi' motataemo daka-daka' hi ia, ‘O!, Uuka aiya beleyum sumomo kami, madi'mo mahoson ka' mule' madi'mo moko ala mombau apa-apaa!

¹¹Naipuan mae beleyum oholomati nu kasapi' na okuti' panyo uuka aiya jinojoongmo itampat anu liing, dunia nu mian anu sinilakamo. Sagala ias timbalimo bau koi nu beleyum ka' onjoluate' timbalimo bau pinsabut nu beleyum'.’

¹² O, tomundo' nu Babel, naipuan mae beleyum mandala' tatumbongi' ohani mopatas anu majingka hondo, panyo uuka aiya nanabu'mo lengkat mae aita' ilangit! Naipuan mae beleyum nompatundu'mo bansa-bansa panyo uuka aiya ilumbu'akonmo mae i tano'.

¹³ Beleyum binalaniatmo da moliba'mo mokiita' ilangit, ka' mompokokomo kasuhangan nu beleyum aita' imandala' mata-matangkas hondo! Nu sangka nu beleyum timbali sumuhang salaku tomundo' aita' ibungkutnyo sasu utara, tampat nu to pilo-pilogot sihuk.

¹⁴Beleyum notataemo, tukooyum beleyum moliba'mo itampat anu matangkas hondo aita' mae ikundom ka' timbalimo susumo Tumpu Anu Daka' na Kuasanyo.

¹⁵Padahan beleyum tinuamo ibagian anu talalo hondo maleeng aijo'mo idunia nu mian anu sinilakamo.

¹⁶Aha anu ikiijo' montoamo ka' monjonohimo beleyum. Nu pokilawamo nu aha, ‘Aiyamo namian anu nonompokalangkabutmo dunia ka' mule' nompopangada'mo iwi-iwi na kalaja'an?

¹⁷Te iamo aiya na anu nonohansunimo kota-kota' ka' nombali'imo dunia sahingga timbalimo tampat anu kaho bone'nyo? Te iamo aiya na anu madi' toho' nompolapas mian anu lewa' ihakopnyo kabai madi' nompobee' da aha ninsusule'mo?’

¹⁸Iwi-iwi' na anu toho'mo tinimbali tomundo' nu aha to bansa-bansa ilamun binau ahi' na adatnyo ima-ima' ikubulan nu aha toto samian,

¹⁹panyo beleyum madi' kinopinolamunan; bangke' nu beleyum ola ingalin susumo sumpe nu kau' anu madi' ko, angga'nyo tinabuhanmo nu bangke' nu to sulu-suludadu anu sinilakamo i uno nu pahampatean, ka' ilumbu'akonmo iliang nu batu susumo bangke' anu pinahampeja'akonmo.

²⁰Beleyum nonsilakaimo lipu' nu beleyum ka' mule' nosi pateimo posi bansa nu beleyum. Kalana aijo' beleyum madi' olamun susumo to tomu-tomundo' sangga'at. Madi' kosamian pe'e na to julu-julu mae nu beleyum anu toto ide-idek na kinyonyoa nu aha haha aijo' na oposalamat.

²¹Pongkolotan sampamo lia-lia' otampu'uni! Anak nu beleyum anu toto momo'ane silakamo kalana do'a nu mompolee' nu aha. Madi' kosamiannyo na anu aijo' hi aha timbali mompalentah idunia aiya kabai lewa' mombau kota'.”

²²Tumpu Anu Daka' na Kuasanyo notataemo, “Aku montumbuhimo Babel ka' mule' mohansunimo ia. Madi'mo daagi' kosamiannyo na anu daagi' Ku posalamat, maumo to ana-anak madi'mo ko anu Ku pobee' tumuu'. Aku, Tumpu notataemo,

²³Babel; Ku potimbalimo tampalang anu nu jojoongimo nu mongkoek. Babel Ku sapuimo sampe belesi'. Aku, Tumpu Anu Daka' na Kuasanyo notataemo.”

²⁴ Tumpu Anu Daka na Kuasanyo notataemo, “Anu tinanga'an-Kumo aijo' tionyo ahi' jadimo.

²⁵Aha mian nu Asyur anu jojoong i Israel lipu'-Ku aijo' Ku silakaimo ka' anu jojoong aita'mae ibungkutnyo anu Aku na tumpunyo, Ku pahampeja'akonmo. Aku mompobebasmo bansang-Ku da boli lewa' osakisa ka' lewa' obee'i pakalaja'an anu maboat opa-opakisakon nu aha mian Asyur hi aha.

²⁶Sumo uuka na tanga'an-Ku anu obau i dunia, botokon-Ku tangka-tangkamo kahanda' mohukumo bansa-bansa.”

²⁷Tumpu Anu Daka' na Kuasanyo nontantukanmo da obaumo sumo aijo'. Ia nontangkakonmo botokonnyo kahanda' mohukumo ka' madi' ko samian pe'e na moko ala montewa' Ia.

²⁸ Sumo uuka na potuunon anu binebakonmo itaun kikinasilakaanmo i Tomundo' Ahas.

²⁹ O, belemiu bansa Filistin, amangkun anu pinake pinompan belemiu nopato'mo. Panyo boli beleyum lame' kalana de sa'angu na ulo matemo, saba ulo anu sangga'at mule' tokamo mae mombolosakon ka' lebe ma'idek mule' na pombaunyo ka' nggalau' nu ulo ai-aijo' mimoso'mo naga' anu mimpolipik.

³⁰Belemiu monta'upmo tempo' anu kakulangan i anu okaan anu tahahumo na kosusa'nyo, ka' mule' iwi-iwi' na mian anu daagi' tontuha' opateimo. Panyo mule' ahi' mian anu talalo hondo kasiasi na aha mian anu palesayamo hi Tumpu, na mohumpak ahi' anu okaan, ka' mule' aha to mia-mian anu madi' moko ala mombau apa-apaa na tumuu' ahi' sanang madi' ko anu mompoposia.

³¹Polotando'mo na humang, ka' mule' poloboo'mo momoita tulung o, belemiu kota-kota' Filistin! Tionyo ahi' belemiu iwi-iwi' kalangkabutmo ka' mule' mabuhukmo! Abu' susumomo kundom na kopuha-puha lengkat mae i sasu utara montandaimo katokaan mae nu gombuan nu suludadu nu aha sampobali'; madi' ko anu tolokondon' na kinyonyoa nu aha aijo'.

³²Apaa na bau pontaaminto hi aha to mia-mian anu toka mae lengkat hi aha bansa Filistin? Opoto'into tukoonto hi aha Tumpu nombaumo Sion ka' mian anu palesayamo hi Ia anu nongoa'imo kasansalan ojagaimo ikiijo mae.