Read Saluan YESAYA 24 Bible Online

YESAYA 24 - Saluan bible

YESAYA 24

¹Tumpu monsilakaimo tano' sahingga mategesmo ka' mule' liingmo. Nu bali-balikakonmo na aita' kilitnyo nu tano' ka' mule' mongga'a-ga'atakonmo miana nu monjojoongi.

²Iwi-iwi' na mian mongoa'imo katantuan nu kantumuu'an anu pokakana: aha to ima-imam tiba mian da'isan, botuan tiba anu mompojoong, anu mompobaluk tiba anu mongoli, anu monsabon tiba anu momposabonakon, kaya tiba anu kasiasi.

³Tano' tabuntala'mo ka' mule' ohansunimo. Tumpu nontaloakonmo, ka' han aijo' tionyo ahi' jadi.

⁴Tano' mapenggesmo ka' magayoumo, songko-songko na dunia mongoa'imo kasusa'an. Langit tiba tano' mongoa'imo kasusa'an hingga-hinggat.

⁵Tano' mahumimi'mo kalana nu saduakon nu palabuatan nu mian anu monjojoongi nolanggaimo iwi-iwi na palentah nu Tumpu, nongabali'mo iwi-iwi na anu tinantukannyomo ka' madi'mo nontoongi palajanjian anu binau-Nyomo tiba aha sampe toka sidu-sidutu'.

⁶Kalana aijo' Tumpu mongkutukimo tano' ka' mohukumo mian anu monjojoongi kalana palabuatan nu aha. Aha opapuimo ka' madi' manjoo' na aha anu oposalamat.

⁷Anggur mateekmo na tumuu' ka' ueenyo nu anggur susa'mo na mohumpak. Miana nu naipuan mae lame' uuka aiya susa'mo.

⁸Madi'mo daagi' ko anu ohongo na mian mongkuti' kasapi' anu taha-tahahumo na lame' ka' onyi' nu gandang anu taha-tahahumo na kolame'nyo. Lamean anu taha-tahahumo na kolame'nyo madi'mo daagi ko anu mombau.

⁹Madi'mo daagi ko anu monginum anggur ka' otendeakon, madi'mo daagi' ko anu mongoa'i ima'nyo nu inumon anu timbali molangui.

¹⁰Songko-songko na kota' singkapmo notomuhuk, iwi-iwi' na tumban nu sabatan singkapmo ginunsing kalana tumpunyo nabuhukmo.

¹¹Aha to mia-mian maha loboo'anmo aijo' ijalan kalana anggur anu o, inum ningkotmo. Madi'mo daagi' kokalame'annyo ilipu'aijo' sampe toka sidu-sidutu'.

¹²Kota' nohintutumo ka' sabatannyo anu toto daka-daka' nohobo'mo ka' mule' notanatamo.

¹³Sumo aijo'mo na anu jadi' isongko-songko na dunia saidi' mae hi iwi-iwi' na bansa. Sumomo ahi' itempo' nu pompadakan salatan bua' nu zaitun o, alamo sampe mingkot ka' mule' bua' nu anggur anu kamingkotannyomo otipumo aijo' i pumpungannyo.

¹⁴Mian anu salamat lame'mo na manyanyi. Mian anu isasu kinsoban mombebakonmo katalasanggoan nu Tumpu

¹⁵ka' mian anu isasu kinsoban mompuji'mo Ia. Mian nu jojoong isonibi nu ambai mompuji'mo katalasanggoan nu Tumpu, Tumpu Israel.

¹⁶Lengkat mae i puusnyo nu dunia na onyi' nu nyanyian mompuji' Israel, bansa anu tulu-tulutan hi Tumpu. Panyo silakamo na aku! Aku mongoa'imo kasusa'an. Mian anu saja' mombau palabuatan anu ma'idek daagi' ahi' saja' mombau palabuatan ma'idek ka' aha ola mule' ahi' mompaka bau palabuatan anu ma'idek.

¹⁷Potombihing mae, o, belemiu anu jojoong isongko-songko na dunia! Tinogi lelemo na lele anu ma'idek, anu bau pohakop tiba so'o nontanda'imo belemiu.

¹⁸Mian anu nopalaimo kalana lele anu ma'idek aijo' nu konamo nu pohakop ka' anu madi' nu kona nu pohakop nu konamo nu so'o. Ujan anu daka' hondo tombulokmo engkat mae ilangit, ka' lananyo nu tano' tolohunjongmo.

¹⁹Tano' mobiha'mo, mohintutumo ka' gayu'anmo.

²⁰Loda nu tano' mahasulonanmosusumo mian anu nalangumo ka' gayu'anmo susumo tahop tinuda'mo nu tobusisi'. Tano' mohobo'mo kalana piniboatanmo nu dosa'nyo. Ia hansunmo ka' madi'mo po ule' tuminjo.

²¹Tempo'nyo aijo' Tumpu mohukumo to mia-mian anu balakuasa aita' ilanga tiba to tomu-tomundo' idunia aiya.

²²Aha posihukmo hingga-hinggat susumo anu otahanmo i uno nu liang, ka' oposoopmo i uno nu talungku'sampe toka na tempo'nyo obee'imo hukuman na aha.

²³Bitu'on pikatmo, ka' mule' batu nu sinaa madi'mo majingka, kalana Tumpu Anu Daka' na Kuasanyo mompalentahmo salaku tomundo'. Ia mompalentahmo i Yerusalem aita' mae i Puge'nyo nu Sion ka' mompotoamo katalasanggoan-Nyo hi to pola-polaya' nu aha mian anu palesayamo hi Ia.