Read Saluan YESAYA 28 Bible Online

YESAYA 28 - Saluan bible

YESAYA 28

¹Silakamo na kota' anu nunu takabunakon nu to mia-mian anu saja' malangu aijo' hi aha Israel! Kaimaannyo luso'mo sumomo bunga anu mangkalualemo aita' i ubak nu aha. Silakamo na kota' anu matangkas hondo itotonga' nu bangka'nyo anu ma omuk, nunu takabunakon nu to mia-mian anu taha-tahahumo na malangu.

²Tumpu monsaimo mamba hi aha samian anu mahoson ka' mule' baani. Ia toka mae sumo antong anu makansang hondo hingga-hinggat mae tiba ujan eis nu sumomo ahi ujan puhos ka' mule' iaba' anu timbali monganjuhakon. Kalana kabohosannyo nu lumbu'akonmo na aha mokiita' ikatano'an.

³Anu nunu takabunakon nu to pola-polaya' anu nalangu'mo aijo' saidi' mae opahampeja'akonmo.

⁴Katalasanggoan nu kota' nu aha anu montampu'unimo luso' aijo' saidi' mae mingkotmo. Sisi'nyo sumomo sisi' nu bua' nu ara anu misa' pe'e kamahannyo, salatan otoamo balomo otipu ka' okaanmo.

⁵Tumpu Anu Daka' na Kuasanyo na timbalimo bunga anu kaimai hi aha mian anu palesayamo hi Ia, aijo' aha anu daagi' tinontuha'.

⁶Tumpu mombalakatimo da adin na to mia-mian kopian ka' mule' da baani na to mia-mian anu monjaga kota' de bisuanyo ko anu mae montumbuhi.

⁷Suele to nabi-nabi ka' to ima-imam nalangumo kalana talalomo nanjoo' na nonginum anggur tiba siu. Aha lumajang mahasungonanmo ka' mahatosumpunanmo kalana pikilan nu aha pinusingmo. To nabi-nabi madi'mo daagi' mapaham i hahan anu nu toa nu aha mongkona apaa na anu nu bee' nu Tumpu hi aha. To ima-imam madi'mo daagi' moko ala momputusi palakala-palakala anu nu boa mae nu mian hi aha.

⁸Meja' dinas nu aha kahomo nu ilua' nu aha sahingga madi'mo daagi' kotampat anu belesi'.

⁹Aha notusamo hi belengku, koonyo nu aha, “Ugaat koonyo pa' mongajan ihe? Daagi' ihe na mompalalui katalangan hi ia? Ugaat koonyo kita aiya daagi'anak ise' anu sala'je gina'at isusu nu tinanyo?

¹⁰Te toho' mule' na ia mongajan kita toto sa'angu' na huruf, ka' mule' toto sa'angu' na kata, ka' mule' toto sa'angu' nakalimat.”

¹¹ De belemiu madi'mo mongka'oho' mohongo aku, saba Tumpu monsaimo mae mian anu i salipu'an mae da mongajan belemiu ipotatae anu sangalasan tiba mule'basa' nu aha anu isalipu'an.

¹²Tumpu monsale'akonmo tampat da bau pilawean nu belemiu iwi-iwi' panyo belemiu madi' ahi' mongka'oho' mompotombihing Ia.

¹³Kalana aijo' Tumpu mongajanmo belemiu toto sa'angu' na huruf ka' mule' toto sa'angu' na kata, ka' mule' toto sa'angu' na kalimat. Ka' salatan belemiu lumajangmo, belemiu tombahangkangmo tiba-tibaha sahingga belaonmo, nu konamo nu so'o ka' ohakopmo.

¹⁴Potombihing mae apaa na anu pinoto'imo nu Tumpu o belemiu anu sola moletakon lelewa' mompalentah mian da'isan i Yerusalem!

¹⁵Belemiu notatae tukoonyo nu belemiu, belemiu nombaumo palajanjian tiba kapatean ka' mule' nombaumo palasitujuan tiba dunia nu mian anu sinilakamo. Pinastikanmo nu belemiu na balaa' anu saidi' mae toka madi' koko mongkona butong nu belemiu, kalana belemiu nompakemo kapandean anu timbali monjagai butong nu belemiu.

¹⁶ Kalana aijo' Tumpu Anu Matangkas na Kuasanyo notataemo sumo uuka, “Ku potimpasmo na usoi anu mahoson hondo aita' i Sion; sa'angu' na batu bau usoi anu mahan na olinyo ka' kotulisannyo: ‘Ihe na palesaya totu-totu'u madi' mangaku kala'.’

¹⁷Kaadilan Ku pojadimo kahohon bau pongukuli, ka' kajujunan Ku pojadimo kahohon bau ponsupati.” Ujan batu na mombelesi'imo iwi-iwi' na kabaleko'an anu ota-otaha'imani nu belemiu. Iaba' na monganjuhakon tampat anu lewa' paninsulukan nu belemiu.

¹⁸Palajanjian nu belemiu tiba kapatean ka' mule' palasitujuan nu belemiu tiba dunia nu mian anu sinilakamo osampomo, sahingga de balaa' aijo' tokamo mae belemiu mohintutumo na opahampeja'akon.

¹⁹Belemiu nu tokaimo mae nu kasusa'an anu madi'ko kamingkotannyo ka' otanggungmo ahi' nu belemiu na aijo' sansina-sinaa, daagi' subu ka' mule' de pihimo. Belemiu nulakatmo bau nu buhuk de belemiu mompahamimo potuunon nu Tumpu.

²⁰Belemiu sumomo ahi' mian anu kahanda'mo hoyot ikoi anu madi' mantan da timbali opohodi' na butong nu belemiu. Sabut anu opusok nu belemiu madi' bola sahingga madi' sukup na bau ponsabuti butong nu belemiu.

²¹ Tumpu totinjomo mae susumo i Bungkutnyo nu Perazim. Ia mahampatemo susumo i Bangka'nyo nu Gibeon kalana mompojadimo anu kinahanda'an-Nyomo, kahanda'anu madi' minsoop ipikilan nu manusia! Ia mopojadimo kalaja-Nyo anu mompobangang hondo.

²²Aku nohongomo kaputusan nu Tumpu Anu Matangkas na Kuasanyo ka' mule' Anu Daka' na Kuasanyo monsilakaimo iwi-iwi' na lipu'. Boli mompisala'i potatae anu bau pompo'ingat, anu pinotokangkumo aiya. Dumo lebe momposusa' mule' belemiu koko kahanda'mo momposalamat butong nu belemiu!

²³Potombihing mae na potataengku.

²⁴Samian na anu topo ale' madi' mesaja' mompajeko mompason ka' lewa' mongkahuk tano'nyo da osu'animo.

²⁵De tano'nyo aijo' na'ima'mo na nomposadia, nu saumo na bine', umpamanyo jintan mo'itom ka' jintan mopute'. Ia montuganmo ohua' nangahannyo nu gandum opojiji' ka' isohipi'nyo osu' ani sosu'anon sangga'at.

²⁶Nu sumbu' mosia na mokalaja kalana ingajanmo nu Tumpunyo.

²⁷Ia madi' mompake' gilingan anu kobolanyo bau pongutun jintan mo'itom kabai anu susumo bola nu loda bau pongutut jintan mopute'. Kalana mokalaja aijo' ia ola mompake ponsulung da laing.

²⁸Tempo'nyo mongututmo gandum ia madi' monsapahi' sampeje hansun. Madi' ahi'! Nusumbu' mosia na mongutut anu memang totu'u, anu totu'u aijo'mo osake'i na loda na bau pongutut ka' madi' mohansuni batu nu gandum anu o, utut aijo'.

²⁹Kapandean aijo' nolengkat mae hi Tumpu Anu Daka' na Kuasanyo. Iwi-iwi' na anu tinanga'anmo nu Tumpu tinanga'anmo nu kapandean ka' saja' mingkaliangan.