Read Saluan YESAYA 29 Bible Online

YESAYA 29 - Saluan bible

YESAYA 29

¹Silakamo na kota' Yerusalem anu osa-osanggohi mezbah nu Tumpu! Silakamo na kota' tampat i Daud nombau kemah! Bakas na taun mobolo-bolos lelewa' aha mombau lamean.

²Panyo nu potokamo mae nu Tumpu na balaa' hi kota' aijo' sahingga mian molokihismo ka' mompele-pele'mo. Songko-songko na kota' aijo' sumomo ahi' mezbah anu kahomo baso'.

³Tumpu montumbuhimo kota' aijo' ka' montikumo songko-songko na pasu'nyo.

⁴Yerusalem sumomo ahi' mongkoek anu bala'usahamo mompohongo onyi'nyo lengkat mae i uno nu tano' panyo onyi'nyo madi'mo talalo kahongoan akaong lengkat mae i uno nu abu'.

⁵Panyo iwi-iwi' na mian anu lengkat mae isalipu'an ka' talalo buhingison aijo' saidi' mae madi'mo daagi' otoa susumo abu' kabai ota' anu nu puhimo nu mombun. Anu saintotolo ahi' tobungmo mae ka' anu madi' osangka-sangka.

⁶Tumpu Anu Daka' na Kuasanyo mompobebasmo kota' aijo' nu antong anu daka' hondo tiba luulu' anu daka' hondo. Ia mompotokamo mae antong anu daka' hondo ka' apu anu banyela-nyelakmo.

⁷Lantas iwi-iwi' na gombuan nu suludadu nu aha anu isalipu'an mae montumbuhimo Yerusalem, kota' nu mezbah nu Tumpu, iwi-iwi' na anu nontikumo ka' anu nontumbuhimo kota' aijo' saidi mae madi'mo daagi' otoa susumo anu ola ingipi pihi-pihi.

⁸To bansa-bansa anu sinihukmo kahanda'mo montumbuhi Yerusalem saidi' mae sumomo mian anu nongoa'imo ohop nongipimo na ia au'aitu ia hau-haunyo mongkaan lantas nobulamo padahan kompong madi'mo ko isinyo kabai susumo mian anu inegotmo nongipimo na ia au'aitu ia hau-haunyo monginum lantas nobulamo padahan gogohong pinakamo.

⁹Sabole-bolehmo kino banga-bangang ka' mompipidi'akon mata susumo mian anu napisokmo! Palangumo panyo misa' kalana nonginumo anggur. Lajangmo maha-mahasungonan panyo misa' kalana nonginumo ciu.

¹⁰ Nu pojadimo nu Tumpu matatundu' na belemiu ka' hoyot bobogonmo. Nu kukubimo na mata nu to nabi-nabi ka' mule' nongkukumbungimo mata nu aha anu saja montoa apa-apaa.

¹¹Alati'nyo nu anu otoa maninsulukmo hi belemiu susumo kitab anu osegelmo. De kitab aijo' oboa hi samian anu moko ala mombasa da ia na mombasa'akon hi belemiu, ia aijo' saidi' mae motataeje tukoonyo ia adi' moko ala mombasa' kalana kitab aijo' sinegelmo.

¹²De oboa hi mian anu madi' nonsikolai hulup, ia aijo' saidi' mae motataeje tukoonyo ia madi' monsumbu' mombasa'.

¹³ Tumpu motataemo, “Mian haha aijo' ola monsombah Aku nu potatae nu aha panyo kinyonyoa nu aha na majo'on ahi' hi beleng-Ku. Agama nu aha ola atulan nu manusia anu opokihapan.

¹⁴ Kalana aitu aha Ku potolokengkengmo nu pondoke anu ojojo'imo. Mian anu pande timbalimo ponga' ka' iwi-iwi na kapandean nu aha madi'mo mingkaliangan.”

¹⁵Silakamo na mian anu bala'usaha momposuluk tanga'annyo anu nolengkat mae hi Tumpu! Aha balabuat aijo' hoko-hokot ka' monsangka tukoonyo madi' ko samian anu montoa kabai monsumbu' apaa na anu binaumo nu aha.

¹⁶ Iwi-iwi' aijo' nubali-balikakonmo nu aha. Iya na anu lebe penting tukang anu mombau kuhon tano' kabai tano' ponto? Te toho' mule' anu binau timbali motate hi anu nombau ia, “Misa' beleyum na nombau aku”? Kabai toho' mule' na balang aijo' motatae hi ia, “Belento madi' moko ala mombau apa-apaa”?

¹⁷Daagi' kokantuang anu nontaloakon, “Madi'mo daagi' pin alas timbalimo tano' anu baumo pongale'an ka' mule' tano' anu pinongale'anmo po ule'mo timbali alas.”

¹⁸Toka itempo'nyo aijo' mian anu mabongon timbalimo mohongo potatae anu isa'angu' na kitab anu obasa'mo ka' anu mapisok anu u'utu mae tumuu' i uno nu kapintungan timbalimo montoa.

¹⁹Aha to mia-mian anu kasiasi ka' anu madi' ko angga'nyo poule'mo molasai kantumuu'an anu ma'ima' anu binee'mo nu Tumpu Israel anu susi'.

²⁰Aijo'mo na kamingkotannyo nu to mia-mian anu saja' mombee'i kasansala'an mian sangga'at ka' sola' montee Tumpu. Tumpu mompateimo iwi-iwi' na mian anu baladosa',

²¹mian anu saja' mompobau-bau mian sangga'at, mian anu montewa' da boli ohukum na miana nu ma'idek na kinyonyoanyo ka' mule' mian anu saja' molea-leangakon sisik anu toto bale-baleko' da mian anu madi' tageo' na kinyonyoanyo boli obee'i ka adilan.

²²Kalana aijo' Tumpu, Tumpu nu Israel anu nompobebasmo i Abraham uuka aiya motataemo, “O, bansang-Ku belemiu madi'mo daagi' saja' otee ka' ohup nu belemiu madi'mo daagi' me'es kalana ma'ambangmo.

²³Kalana de belemiu montoamo to ana-anak nu belemiu anu Ku bee'mo hi belemiu, saba' o, akuije nu belemiu taalu' Akumo ahi' aiya na Tumpu nu Israel anu susi'. Oholomatije nu belemiu na Aku ka' mongkabuhukmo Aku.

²⁴Mian anu ponga' balagulu'mo da mangalati' ka' mian anu saja' motusa' sanangmo na opogulu'.”